Lajme

BDI: VLEN premtoi Europën, solli “Botën Serbe”

Bashkimi Demokratik për Integrim (BDI) ka lëshuar një deklaratë të ashpër ndaj qeverisjes së koalicionit VLEN, duke e akuzuar për dështim të thellë në përmbushjen e premtimeve për ndryshimet kushtetuese dhe për devijim nga kursi evropian i vendit.

Sipas BDI-së, premtimet fillestare të VLEN-it për realizimin e ndryshimeve kushtetuese “para formimit të Qeverisë” janë zëvendësuar me afate të paqarta dhe justifikime të vazhdueshme. “Fillimisht premtuan ndryshimet kushtetuese para formimit të Qeverisë, më pas brenda 100 ditëve, pastaj në tre muaj dhe në fund gjashtë. Sot, pas një viti, shqiptarët dëgjojnë vetëm arsyetime nga Izet Mexhiti dhe bashkëpunëtorët e tij se ‘koha nuk ka mjaftuar’,” thuhet në deklaratë.

BDI shprehet se mungesa e rezultateve nuk është çështje kohe, por “mungesë vizioni, guximi dhe vullneti politik”.

Në reagimin e tyre, VLEN akuzohet për hapje të rrugës ndaj ndikimeve të dëmshme nga Beogradi dhe Moska, duke minuar Marrëveshjen e Ohrit dhe duke rrezikuar të ardhmen evropiane të vendit.

“Në vend të rrugës drejt BE-së, sollën partnerë që promovojnë ‘Botën Serbe’, ndërsa përfaqësimin e shqiptarëve e zbehën duke emëruar Ivan Stoilkovic zëvendëskryeministër për Marrëveshjen e Ohrit,” vijon deklarata.

BDI rendit një sërë premtimesh të pambajtura nga ana e VLEN-it:

2500 vende pune të premtuara – të papërmbushura;
mbështetje financiare për të rinjtë – zero realizim;
projekte kombëtare – të zëvendësuara me aleanca të diskutueshme politike.

Ish-ministri i Jashtëm, Bujar Osmani, citohet në komunikatë duke theksuar se shmangia nga temat e integrimit dhe refuzimi i monitorimit evropian janë pjesë e një strategjie për të “fshehur korrupsionin dhe dështimet” e qeverisë.

Në përmbyllje, BDI deklaron se muaji tetor do të jetë vendimtar, duke u bërë thirrje qytetarëve që përmes referendumit të refuzojnë atë që e cilësojnë si “mashtrim politik dhe turp kombëtar”. “Qytetarët meritojnë përfaqësim dinjitoz dhe vizion të qartë europian – jo premtime boshe dhe shërbime ndaj interesave të huaja. Askush nuk do t’i shpëtojë përgjegjësisë politike dhe juridike,” përfundon deklarata.

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)