Lajme

Kapet me mbi 30 kilogram marijuhanë, Prokuroria kërkon paraburgim

Prokuroria Themelore Publike Manastir lëshoi Urdhër për procedurë hetimore kundër një personi të dyshuar për vepër penale “Prodhim dhe lëshim i paautorizuar në qarkullim i drogave narkotike” sipas nenit 215 paragrafi 1 të Kodit Penal.

Siç njoftojnë nga Prokuroria, dje në autostradën A3 Manastir-Prilep, pranë rreth-rrotullimit për fshatin Topolçan, zyrtarët e policisë ndaluan dhe kontrolluan një makinë Volkswagen Golf me targa të Prilepit në të cilën i dyshuari po transportonte ilegalisht dy çanta.

“Brenda çantave ishin gjithsej 35 pako najloni me drogë narkotike marijuhanë. Pesha totale e drogës së zbuluar në bagazhin e makinës është 32.575 kilogramë. Gjatë procedurës hetimore, prokurori publik do të ndërmarrë gjithashtu disa veprime për të identifikuar personin/personat nga të cilët i dyshuari i ka siguruar drogat narkotike, si dhe dëshmitarët e mundshëm në lidhje me transferimin e paligjshëm. Për shkak të rrezikut që i dyshuari 36-vjeçar nga Prilepi të përpiqet të fshehë ose shkatërrojë prova të caktuara dhe të ndikojë tek dëshmitarët, si dhe rrezikut të arratisjes dhe mundësisë së përsëritjes së krimit, prokurori publik sot i paraqiti propozim gjyqtarit të procedurës paraprake të Gjykatës Themelore në Manastir për caktimin e masës së paraburgimit”, thonë nga Prokuroria.

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.