Lajme

Çdo vit nga një shkollë më pak: Numri i nxënësve të shkollave të mesme në rënie alarmante

Me fillimin e vitit të ri shkollor, dyert e shkollave të mesme dhe fillore në Maqedoninë e Veriut u hapën për rreth 245 mijë nxënës, prej të cilëve mbi një e treta janë gjimnazistë dhe nxënës të shkollave profesionale. Këtë vit në arsimin e mesëm janë regjistruar 67.200 nxënës, mes tyre 17.230 fillestarë. Për procesin mësimor janë angazhuar 6.709 profesorë, ndërsa për herë të parë u përfshinë edhe 130 asistentë për nxënësit me nevoja të veçanta.

Megjithatë, pas shifrave zyrtare fshihet një realitet shqetësues – numri i nxënësve po zvogëlohet ndjeshëm. Vetëm në dhjetë vitet e fundit, bankat shkollore kanë humbur mbi 8.600 nxënës, që është sa popullsia e komunës së Jegunovcës. Në vitin shkollor 2015/2016 kishte 72.799 nxënës, ndërsa këtë vit vetëm 64.167. Në total, për një dekadë numri i gjimnazistëve është ulur me mbi 16 për qind, ose 13.152 nxënës më pak, informon Pari.mk, përcjell PressOnline.al.

Rënia më e madhe është regjistruar në rajonin e Pollogut me një ulje prej 20,4% ose 2.598 nxënës më pak. Rënie të theksuara ka edhe në rajonet Juglindore dhe Lindore (rreth 26%), ndërsa më e ulëta është në rajonin e Shkupit me 7,6%.

Edhe pse numri i klasave dhe profesorëve mbetet pothuajse i qëndrueshëm, trendi i vazhdueshëm i rënies së nxënësve është pasojë e drejtpërdrejtë e krizës demografike dhe emigrimit masiv. Ekspertët paralajmërojnë se kjo prirje jo vetëm që do të zbrazë më tej shkollat, por do të sjellë edhe pasoja serioze për tregun e punës dhe ekonominë në tërësi.

Sipas tyre, problemet nuk mund të zgjidhen vetëm me rritje të natalitetit, por me politika që do t’i mbajnë të rinjtë dhe familjet brenda vendit.

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.