Sport

Adrian Hadribeaj, kampioni që po pushton botën, gjen qetësinë në bregdetin shqiptar: Pushim i merituar përpara sfidave të reja

Pas një sezoni të jashtëzakonshëm në arenën ndërkombëtare, ku ka përfaqësuar me krenari flamurin kuqezi në ringje të mëdha dhe ka fituar zemrat e shqiptarëve anembanë globit, kampioni Adrian Hadribeaj ka zgjedhur bregdetin e mrekullueshëm shqiptar për të kaluar disa ditë pushimi dhe rigjenerimi para kthimit në Shtetet e Bashkuara të Amerikës, vend ku jeton dhe vepron bashkë me familjen e tij.

Fotot e fundit të ndara nga kampioni e tregojnë atë të relaksuar, të buzëqeshur dhe në formë të shkëlqyer fizike, duke shijuar diellin dhe qetësinë e bregdetit shqiptar. I ulur në një shezllon nën hijen e çadrave buzë detit, apo i ngjitur mbi shkëmbinjtë me ujërat kristal të Jonit në sfond, Adrian Hadribeaj duket më i motivuar se kurrë për të vijuar rrugëtimin e tij si luftëtar dhe ambasador i Shqipërisë në sportin ndërkombëtar.

“Pushimet në Shqipëri janë më shumë se relaks – janë kthim te rrënjët, te njerëzit e mi, te energjia që më ka formuar si sportist dhe si njeri. Këtu mbush bateritë, mendërisht dhe shpirtërisht,” ka thënë Hadribeaj në një prononcim të shkurtër.

Me një karrierë që flet vetë – e ndërtuar me sakrificë, përkushtim dhe krenari – ai është kthyer në një simbol të suksesit shqiptar, jo vetëm në sportet e kontaktit, por në mënyrën si përfaqëson me dinjitet kulturën dhe vlerat tona kudo ku shkon.

Ndërkohë që ndjekësit e tij presin me padurim njoftimet për ndeshjet e ardhshme, Adrian po shfrytëzon këto ditë për të reflektuar, për të qëndruar pranë familjes dhe natyrës, dhe për të rikthyer atë qetësi të brendshme që i nevojitet çdo kampioni përpara një sfide të madhe.

Pushimet kalojnë, por misioni vazhdon. Kampioni është gati të rikthehet në ring, më i fortë, më i fokusuar dhe më i motivuar se kurrë.

Sukseset e tij nuk janë vetëm personale – ato janë fitore për çdo shqiptar, për çdo të ri që beson te fuqia e ëndrrave dhe e punës së ndershme.

Lajme

Mbrëmja e “Duelit Sportiv” përfundon me incident në mes të Liridon Lecit dhe Edonisa Aliut

Televizioni Dukagjini ka njoftuar ndërprerjen e menjëhershme të bashkëpunimit me panelistin Liridon Leci, pas një incidenti që ka ndodhur të dielën mbrëma, pas përfundimit të emisionit “Dueli Sportiv”.

Sipas reagimit të televizionit, incidenti ka ndodhur mes Lecit dhe mysafires së emisionit, ish-futbollistes Edonisa Aliu.

Drejtori i Informacionit në TV Dukagjini, Dibran Istrefi, ka bërë të ditur përmes një njoftimi në rrjetin social Facebook, se vendimi është marrë pas shqyrtimit të rrethanave të rastit.

Televizioni ka theksuar se situata të tilla janë të papranueshme, ndërsa ka bërë të ditur se me rastin po merren organet e rendit dhe të drejtësisë.

TV Dukagjini ka shprehur gatishmërinë për bashkëpunim të plotë me organet përkatëse, të cilat pritet të sqarojnë rrethanat e incidentit.

Lajme

“Ballistët” formojnë strukturën e re organizative!

Tifogrupi i Shkëndijës ka formuar sonte strukturën e re organizative, pas mbledhjes së mbajtur më 4 tetor. Kryesia e ngushtë do të përbëhet nga 6 anëtarë, ndërsa për kryetar është zgjedhur Shaban Zeneli.

Kryesia e re do të ketë përkrahjen edhe të një grupi punues, i cili do të funksionojë si strukturë më e gjerë në mbështetje të kryesisë dhe tifogrupit.

Organizimi i parë i këtij kapitulli të ri do të jetë të dielën, më 11 tetor, në udhëtimin për ndeshjen Shkëndija e Haraçinës – Shkëndija, që do të zhvillohet në stadiumin e Çairit.

Lajme

Shkëndija dhe Universiteti i Tetovës bashkojnë sportin me dijen

KF Shkëndija dhe Universiteti i Tetovës kanë nënshkruar Memorandum Bashkëpunimi, duke formalizuar një bashkëpunim të ri institucional, me synim lidhjen më të ngushtë mes sportit, arsimit dhe shkencës, si dhe krijimin e mundësive konkrete për zhvillimin e të rinjve.

Memorandumi është nënshkruar në Tetovë nga Drejtori Ekzekutiv i KF Shkëndijës, Valdrin Uka, dhe Rektori i Universitetit të Tetovës, Prof. Dr. Kushtrim Ahmeti. Marrëveshja parasheh bashkëpunim në disa fusha, duke nisur nga praktika profesionale e studentëve pranë strukturave të klubit, deri te ligjëratat, seminaret dhe punëtoritë praktike me ekspertë të të dyja institucioneve.

Një fokus i rëndësishëm i marrëveshjes është edhe kërkimi shkencor dhe testimet sportive, ku kapacitetet akademike dhe laboratorike të Universitetit të Tetovës mund të kontribuojnë në monitorimin dhe zhvillimin e performancës së futbollistëve, përgatitjes fizike, rikuperimit dhe metodologjive bashkëkohore të stërvitjes.

Bashkëpunimi hap gjithashtu mundësi për projekte të përbashkëta vendore dhe ndërkombëtare, përfshirë Erasmus+ Sport, organizimin e konferencave dhe aktiviteteve sportive, si dhe mbështetjen e futbollistëve të rinj të Shkëndijës në ndjekjen e studimeve universitare përmes konceptit të karrierës së dyfishtë.

Memorandumi, i cili është i vlefshëm për një periudhë trevjeçare, krijon bazën për iniciativa dhe projekte të reja që mund të konkretizohen në vazhdim, me zhvillimin e sportit, dijes dhe gjeneratave të reja në qendër të këtij bashkëpunimi.