Lajme

Arrestohet shkupjani, dyshohet se është fajdexhi

Nga Ministria e Punëve të Brendshme njoftojnë se gjatë ditës së djeshme, në Shkup është arrestuar një 41-vjeçar, i dyshuar për fajde, përcjell TV21. Sipas Policisë, një 41-vjeçar tjetër e kishte raportuar rastin, pasi i njëjti i kishte marrë para të dyshuarit.

“Më 10.09.2025, në orën 15:00 në Shkup, zyrtarë policorë nga SPB Shkup e privuan nga liria M.J. (41) nga Shkupi, për shkak të dyshimit për kryerjen e veprës penale “fajde” sipas nenit 260 të Kodit Penal. Sipas kallëzimit, në janar të vitit 2025, J.A. (41) nga Shkupi kishte marrë 4.500 euro nga M.J., të cilat i duheshin për operacionin e nënës së tij. Gjithashtu, sipas kallëzimit, në shkurt të vitit 2025, M.J. i kishte kërkuar J.A.-s t’i kthejë paratë, por ky i fundit kishte thënë se nuk kishte mundësi t’i kthente. Pas kësaj, në disa raste M.J. i kishte kërkuar atij të paguajë interes prej 36.000 denarësh për shumën e dhënë. Siç është raportuar, më 09.09.2025 ata janë takuar, ku M.J. i kishte treguar një fletore J.A.-s, në të cilën ishte shënuar shuma që ai i detyrohej, dhe ku ishin të shënuar edhe borxhlinj të tjerë. Me urdhër gjyqësor është kryer bastisje në shtëpinë e M.J., ku janë gjetur sende që dyshohet se janë të lidhura me veprën. Personi është ndaluar në stacion policor dhe pas dokumentimit të plotë të rastit, ndaj tij do të ngrihet kallëzim përkatës”, thonë nga MPB.

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)