Lajme

Kim Mehmeti: Vleni është vlerë e shtuar e VMRO’s e jo e shqiptarëve!

Shkruan: Kim Mehmeti

Njësoj si dikur BDI’ja, e cila votat shqiptare ia dorëzonte Gruevskit, që ai të kishte edhe legjitimitetin shqiptar, sot VLEN’i është ai i cili i kërkon votat e shqiptarëve sa për t’ia dhënë ato VMRO’së qeveritare, duke ia mundësuar kështu Kryeministrit aktual që t’u dëshmojë maqedonasve se ua ka kthyer Maqedoninë e grabitur nga shqiptarët dhe se, sido që të votojnë, nuk do jenë shqiptarët, por ai do vendosë kush do i përfaqësojë ata nëpër institucionet më të larta shtetërore.
Pra mund të thuhet se deri dje BDI-ja, sot VLEN’i i forcon partitë maqedonase ne pushtet duke u bërë vasal i tyre.
Me atë dallim që BDI’ja ishte dhe është parti që e kishte dhe e ka legjitimitetin e shqiptarëve, ndërsa VLEN’i ishte dhe mbeti vëllazëri ‘sektashësh’ të cilëve shqiptaria e xhamia u shërben vetëm për të ardhur në pushtet.
Pra BDI’ja ishte dhe është parti, që për nga numri i votave, me të vërtet i përfaqëson shqiptarët, e VLEN’i është një klub interesaxhinjsh pa dinjitet të cilët Mickovski i mban në qeveri ngaqë e din se nuk kanë ku i ikin.
E ne dikur e mendonim se nuk ka vasal më të mirë se ata të BDI-së, duke harruar se edhe vasalët e përsosin vetveten dhe arrijnë të bëhen atë që sot është VLEN’i: dega shqiptare e VMRO-DPMNE’së.
Dhe andaj VMRO’ja do bëjë çmos qe në zgjedhjet vendore të mos dështojë kjo degë e saj partiake, kjo treshe ‘sektash’ që nuk kanë mjaftueshëm anëtarë as për t’i plotësuar të gjitha postet me të cilat i shpërblen Kryeministri.
Pra drejtuesit e VMRO’s, për shembull, nuk do lejojnë që ‘nëndega’ e tyre shqiptare – Alternativa, të zhbëhet e të shpërfaqet si kompani fitimprurëse e pesë-gjashtë ‘aktivistëve’ të saj që kanë kontribuar që shqiptarët të jenë pronarë te shpronësuar të Maqedonisë dhe sundues të pa pushtetshëm të saj.
Andaj duhet thënë qartë e shqip: njësoj si në të shkuarën kur shqiptarët e votonin BDI’në që ajo t’i forconte qeveritë maqedonase, sot, duke e votuar VLEN’in, shqiptarët e këtushëm në të vërtet e mbështesin VMRO-DPMNE’n.
Dhe kështu do jetë përderisa partitë shqiptare nuk e kuptojnë se pronar të shtetit nuk te bënë bashkëqeverisja, por Kushtetuta.
Pra përderisa nuk e kuptojnë se kur në kushtetutë nuk të përmendet emri, por figuron si 20 për qindësh, në qeveri mund të jesh vetëm vasal.

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.