Lajme

Flamur Gjoleka: Fushata në Dollnen duhet të zhvillohet me qetësi, sinqeritet dhe kulturë demokratike

Me rastin e fillimit të fushatës zgjedhore për zgjedhjet lokale të tetorit 2025, kandidati i koalicionit Aleanca Kombëtare për Integrim (AKI) për kryetar të Komunës së Dollnenit, Flamur Gjoleka, ka përcjellë urimet e tij për qytetarët dhe ka bërë thirrje për një proces të qetë dhe demokratik.

Gjoleka u bëri apel të gjithë qytetarëve dhe përkrahësve që fushata të zhvillohet me maturitet, qetësi dhe sinqeritet maksimal, duke dëshmuar respekt të ndërsjellë deri në përfundim të saj.

“Besoj fuqishëm se vetëm përmes bashkëpunimit dhe unitetit mund të ndërtojmë një Komunë Dollneni më të mirë, ku secili qytetar do të ndihet i përfaqësuar dhe i vlerësuar”, theksoi kandidati i AKI-së.

Ai gjithashtu shprehu mirënjohje për bashkëpunëtorët dhe përkrahësit e tij, të cilët me përkushtim e mirëkuptim po e mbështesin në këtë rrugëtim politik.

Flamur Gjoleka garon për mandatin e parë si kryetar i Komunës së Dollnenit, me vizionin për zhvillim të qëndrueshëm dhe përfaqësim të barabartë për të gjithë qytetarët.

I njohur si një personalitet i angazhuar në jetën shoqërore e publike, Gjoleka ka ndërtuar besimin e qytetarëve përmes punës së tij të palodhur dhe përkushtimit ndaj komunitetit. Kandidatura e tij mbështetet në idenë e një Dollneni modern, me infrastrukturë funksionale, shërbime cilësore dhe mundësi të reja për të rinjtë.

Në programin e tij, Flamur Gjoleka thekson rëndësinë e zhvillimit të bujqësisë si shtyllë kryesore e ekonomisë lokale, përmirësimin e kushteve në arsim e shëndetësi, si dhe krijimin e hapësirave të reja publike që do ta bëjnë Dollnenin më të gjallë dhe më tërheqës për jetesë.

“Qëllimi ynë është që Dollneni të mos mbetet prapa, por të bëhet një komunë e zhvilluar dhe funksionale, ku qytetarët ndihen krenarë të jetojnë e të investojnë”, ka deklaruar Gjoleka gjatë prezantimit të tij.

Me përkrahjen e koalicionit AKI, ai synon të sjellë një qeverisje transparente dhe bashkëpunuese, duke e vendosur qytetarin në qendër të çdo vendimmarrjeje.

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.