Lajme

Sulm në një taksi në Shkup: 40-vjeçari godet pasagjerin dhe i grabit telefonin

Prokuroria Themelore Publike e Shkupit ka nisur procedurë penale kundër një 40-vjeçari, i dyshuar për veprën penale “Vjedhje e rëndë në mënyrë të pacipë”, në bazë të nenit 236 paragrafi 1 pika 3 të Kodit Penal.

Ngjarja ka ndodhur më 4 tetor, në mbrëmje, përballë garazhit me kate në rrugën “Mirçe Acev” në Shkup. I dyshuari kishte vërejtur dy persona nga Valandova teksa hipnin në një taksi. Ai u ishte afruar nga pas, kishte hapur me forcë derën e automjetit dhe kishte goditur me shqelm njërin nga pasagjerët, duke bërë që t’i binte telefoni nga dora.

Pas kësaj, i dyshuari kishte marrë telefonin dhe ishte larguar me shpejtësi nga vendngjarja, duke përfituar paligjshëm rreth 6.360 denarë.

Duke pasur parasysh rrezikun e arratisjes dhe mundësinë që i dyshuari ta përsërisë veprën – veçanërisht pasi më parë është dënuar disa herë për vepra kundër pasurisë – prokurori publik ka kërkuar nga gjykata caktimin e masës së paraburgimit.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.

Lajme

Burri nga Shkupi “ankohet” në polici se e ka rrahur gruaja

MPB njofton se më 25.07.2026, në orën 10:30, në SPB Shkup, një 42-vjeçar nga Shkupi denoncoi se në shtëpinë familjare, pas një grindjeje të mëparshme, ishte sulmuar fizikisht nga bashkëshortja e tij 44-vjeçare. Po ndërmerren masa për zbardhjen e plotë të rastit.

Lajme

Mickoski: Kemi çmimet e naftës më të ulëta në rajon

“Ndjekim situatën me naftën. Ne ende jemi vend, i cili është me çmimet më të ulëta në rajon kur bëhet fjalë për benzinën dhe dizelin. Do të reagojmë ashtu siç kemi reaguar edhe deri më tani. Qytetarët duhet të jenë të qetë. Ne do të vazhdojmë të jemi shteti me çmimin më të ulët të benzinës dhe dizelit edhe pse është prodhim i bursës dhe nuk është prodhim që varet nëse është biznesmen më i mirë apo më i keq, politikan më i mirë apo më i keq. Të gjithë blejmë nga vendi i njëjtë”, deklaroi Hristijan Mickoski, Kryeministër./Alsat.mk.