Lajme

AKI denoncon presionet politike ndaj aktivistëve dhe bizneseve në Tearcë

Aleanca Kombëtare për Integrim (AKI) ka reaguar ashpër ndaj, siç i cilëson ajo, presioneve të vazhdueshme politike dhe institucionale ndaj aktivistëve, bizneseve dhe qytetarëve që e mbështesin këtë subjekt.

Në një reagim zyrtar drejtuar mediave, AKI ka deklaruar se gjatë ditëve të fundit “po vërehet një tendencë e hapur për ushtrim frike dhe presioni psikologjik”, duke shtuar se disa prej aktivistëve të saj “ndalohen deri në tre apo katër herë në ditë, vetëm për të krijuar klimë pasigurie”.
“Në mënyrë të organizuar dhe të koordinuar, operatorët ekonomikë po sulmohen, ndërsa aktivistët tanë po përballen me ndalime të shpeshta nga organet e rendit. Këto veprime janë në kundërshtim me ligjin, me parimet demokratike dhe me standardet që garantojnë një proces zgjedhor të lirë e të ndershëm,” – thuhet në reagim.
Subjekti opozitar thekson se ka njoftuar zyrtarisht OSBE-në, Ambasadën e SHBA-së dhe Ministrinë e Punëve të Brendshme për “shkeljet serioze dhe klimën e frikës që po tentohet të krijohet në komunën e Tearcës”.
AKI kërkon ndërhyrje të menjëhershme të institucioneve kompetente për të ndalur këto veprime, si dhe monitorim nga afër të situatës nga Komisioni Shtetëror i Zgjedhjeve, Prokuroria Publike dhe institucionet ndërkombëtare.
“Fushata duhet të zhvillohet me ide, plane dhe argumente — jo me frikësime, kërcënime e shantazhe. Ne do të vazhdojmë rrugën tonë me dinjitet, qetësi dhe besim se qytetarët e Tearcës e dinë mirë kush po punon për zhvillim dhe kush po përdor aparatin e shtetit për presion politik,” – përfundon reagimi i AKI-së.

Lajme

Në Qafë Thanë ndalohet hyrja e 26 tonëve kofsha pule të ngrira nga Brazili

Shërbimet inspektuese të Agjencisë së Ushqimit dhe Veterinarisë (AUV), në pikën kufitare Qafë Thanë, kanë ndaluar importin e mbi 26 tonëve kofsha pule të ngrira pa kockë, për shkak të mosplotësimit të kushteve për import, përcjell INA.

Ngarkesa me 2.167 paketime nga 12 kilogramë mish pule të ngrirë, pas Vendimit për ndalim importi të marrë nga veterinerët zyrtarë të AUV-së, është kthyer në vendin eksportues – Brazil.

Ndalimi i importit është shqiptuar pasi ngarkesa ka qenë në kundërshtim me vendimin për ndalim të importit të kafshëve të gjalla, produkteve dhe nënprodukteve me origjinë shtazore nga Brazili, me qëllim mbrojtjen nga futja e virusit të influencës aviare me patogjenitet të lartë (gripi i shpendëve). Sipas këtij vendimi, ndalohet importi i ngarkesave që rrjedhin nga kafshë të therura, të ngarkuara dhe të certifikuara para datës 1 gusht 2025.(INA)

Lajme

Mbrëmë ka shpërthyer një zjarr i madh në një magazinë në Shkup

Mbrëmë ka shpërthyer një zjarr i madh në një magazinë brenda kompleksit industrial “Makstil” në Shkup.

Mbrëmë zjarri përfshiu zonën e kompleksit industrial “Makstil”, ku u dogj plotësisht një magazinë që përdorej për përpunimin e drurit,

Falë ndërhyrjes së shpejtë dhe në kohë të ekipeve të Brigadës së Mbrojtjes Kundër Zjarrit të Qytetit të Shkupit, zjarri u vu nën kontroll dhe nuk u përhap në objektet e tjera të kompleksit.

Për momentin nuk ka informacione për persona të lënduar, as për shkaqet e shpërthimit të zjarrit. Në terren ndërhynë disa ekipe zjarrfikëse, të cilat u angazhuan për të frenuar flakët dhe për të parandaluar dëme më të mëdha materiale.

Shërbimet kompetente po kryejnë inspektim në vendngjarje.

Lajme

Fëmija i rrahur në Saraj përfundon me thyrje të hundës, lëndime në kokë dhe lëndime në trup

Një ngjarje e dhimbshme ka tronditur opinionin publik, pas pamjeve të dhunshme të goditjeve brutale të një fëmije nga bashkëmoshatarët e tij, pas një rrahjeje në grup në oborrin e një shkolle fillore në Saraj të Shkupit, përcjell INA.

Sipas Prokurorisë Themelore Publike, dy fëmijë 14-vjeçarë u sulmuan me grushte dhe shqelma nga një grup të miturish tjerë të moshave 14, 15 por edhe 13 vjeç, në momentin kur po largoheshin nga shkolla.

Si pasojë e dhunës, njëri prej tyre pësoi lëndime të rënda, përfshirë goditje serioze në kokë dhe tru, thyerje të hundës si dhe hematoma në trup, ndërsa fëmija tjetër pësoi me lëndime më të lehta. Pamjet e rënda vërshuan rrjetet sociale.

Ngjarja ka shkaktuar shqetësim të thellë edhe te nxënësit e tjerë që ndodheshin në oborrin e shkollës, duke rikthyer në vëmendje problemin e dhunës mes të miturve dhe pasojat e rënda që ajo mund të lërë mbi fëmijët dhe familjet e tyre.

Prokuroria ka nisur procedurë ndaj pesë të miturve dhe ka kërkuar masa mbrojtëse, me qëllim mbrojtjen e viktimave dhe parandalimin e dhunës së mëtejshme.(INA)