Lajme

Zëvendësdrejtori Dauti nuk ndalet, gjuhën shqipe e kthen edhe në tabelën e Bllacës

Zëvëndësdrejtori i Doganave të Maqedonisë së Veriut, Mustafa Dauti, ka njoftuar përmes një shkrimi në rrjetin e tij social, që edhe tabela në pikën kufitare të Bllacës do të frymojë edhe në shqip.

“Pas tabelës në Bellanoc dhe Qafë Thanë, tashmë edhe pika kufitare e Bllacës e ka marrë pamjen e duhur e të merituat tabela në gjuhën shqipe në vendin e saj.Për shumë vite, edhe në këtë pikë hyrëse e dalëse të vendit tonë, gjuha shqipe mungonte padrejtësisht. Në një tokë ku kalojnë çdo ditë mijëra qytetarë shqiptarë, mungesa e shqipes në tabelën zyrtare ishte më shumë se neglizhencë ishte shenjë e shpërfilljes institucionale ndaj identitetit tonë kombëtar. Por kjo padrejtësi po merr fund, hap pas hapi, kufi pas kufiri. Pas Bellanocës e Qafë Thanës, Bllaca është dëshmia e radhës se përkushtimi ynë për dinjitetin kombëtar nuk ndalet. Tabela në gjuhën shqipe është vendosur me krenari e respekt, si shenjë se për ne shqipja nuk është zbukurim e simbol fushate, por themel i barazisë dhe dinjitetit tonë qytetar!“, ka shkruar zëvëndësdrejtori, Mustafa Dauti.

Ai tutje ka shtuar që këtë padrejtësi e kanë zgjidhur me vepra dhe jo vetëm me fjalë. Në këtë drejtim, Dauti thotë se ka ardhur epoka e dinjitetit dhe barazisë.

“Ata që për vite të tëra e panë këtë padrejtësi dhe zgjodhën të heshtin, e humbën rastin për të bërë atë që ishte detyrim ligjor dhe moral. Ne, në vend të fjalëve, po bëjmë vepra konkrete. Sot, në Bllacë, shqipja qëndron aty ku i takon në tabelë, në institucion, në zemrën e çdo shqiptari.

Nuk është thjesht një tabelë, por një hap drejt respektit të ndërsjellë dhe epokës së dinjitetit gjuhësor“, ka përfunduar zëvëndësdrejtori, Dauti.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.