Lajme

Lloga: E sfidoj VLEN-in, ejani të dalim në zgjedhje

Krenar Lloga në studion e “Hajde flasim” në TV21, ka sfiduar koalicionin VLEN duke u kërkuar që të dalin në zgjedhje.

Lloga tha se nëse votat e fituara në zgjedhjet lokale do të përktheheshin në deputetë, AKI do të kishte 20 ndërsa VLEN vetëm 15.

Siç tha Lloga, VLEN i kërkoi edhe kryeministrit Mickoski që të tërheq fjalën ku përmendi zgjedhjet e parakohshme, që siç tha Lloga, u bënin dëm VLEN-it.

“Nëse ato pretendojnë që kanë fituar dhe janë trimëruar nga këtë rezultate që pretendojnë që i kanë, hajde shkojmë në zgjedhje dhe e shikojmë. Edhe me mandate të përkthyera në deputetë, AKI-ja do të kishte 20 mandate dhe VLEN-i vetëm 15 mandate. Unë i kuptoj dhe i dëgjoj në studio televizive, që duan ta mbulojnë me një retorikë boshe se janë fitues të referendumit, por unë po sfidojë siç i ka sfiduar çdo eksponentë i AKI-së, bujrum hajdi në zgjedhje, pse keni frikë. Sepse gjatë gjithë kësaj periudhe kohore kur kryeministri e shprehu për zgjedhje të parakohshme, ata kanë ndenjtur para tij duke qarë dhe lutur që t’i tërheq këto fjalë se u bën dëm”, tha Lloga.

Lajme

Në Qafë Thanë ndalohet hyrja e 26 tonëve kofsha pule të ngrira nga Brazili

Shërbimet inspektuese të Agjencisë së Ushqimit dhe Veterinarisë (AUV), në pikën kufitare Qafë Thanë, kanë ndaluar importin e mbi 26 tonëve kofsha pule të ngrira pa kockë, për shkak të mosplotësimit të kushteve për import, përcjell INA.

Ngarkesa me 2.167 paketime nga 12 kilogramë mish pule të ngrirë, pas Vendimit për ndalim importi të marrë nga veterinerët zyrtarë të AUV-së, është kthyer në vendin eksportues – Brazil.

Ndalimi i importit është shqiptuar pasi ngarkesa ka qenë në kundërshtim me vendimin për ndalim të importit të kafshëve të gjalla, produkteve dhe nënprodukteve me origjinë shtazore nga Brazili, me qëllim mbrojtjen nga futja e virusit të influencës aviare me patogjenitet të lartë (gripi i shpendëve). Sipas këtij vendimi, ndalohet importi i ngarkesave që rrjedhin nga kafshë të therura, të ngarkuara dhe të certifikuara para datës 1 gusht 2025.(INA)

Lajme

Mbrëmë ka shpërthyer një zjarr i madh në një magazinë në Shkup

Mbrëmë ka shpërthyer një zjarr i madh në një magazinë brenda kompleksit industrial “Makstil” në Shkup.

Mbrëmë zjarri përfshiu zonën e kompleksit industrial “Makstil”, ku u dogj plotësisht një magazinë që përdorej për përpunimin e drurit,

Falë ndërhyrjes së shpejtë dhe në kohë të ekipeve të Brigadës së Mbrojtjes Kundër Zjarrit të Qytetit të Shkupit, zjarri u vu nën kontroll dhe nuk u përhap në objektet e tjera të kompleksit.

Për momentin nuk ka informacione për persona të lënduar, as për shkaqet e shpërthimit të zjarrit. Në terren ndërhynë disa ekipe zjarrfikëse, të cilat u angazhuan për të frenuar flakët dhe për të parandaluar dëme më të mëdha materiale.

Shërbimet kompetente po kryejnë inspektim në vendngjarje.

Lajme

Fëmija i rrahur në Saraj përfundon me thyrje të hundës, lëndime në kokë dhe lëndime në trup

Një ngjarje e dhimbshme ka tronditur opinionin publik, pas pamjeve të dhunshme të goditjeve brutale të një fëmije nga bashkëmoshatarët e tij, pas një rrahjeje në grup në oborrin e një shkolle fillore në Saraj të Shkupit, përcjell INA.

Sipas Prokurorisë Themelore Publike, dy fëmijë 14-vjeçarë u sulmuan me grushte dhe shqelma nga një grup të miturish tjerë të moshave 14, 15 por edhe 13 vjeç, në momentin kur po largoheshin nga shkolla.

Si pasojë e dhunës, njëri prej tyre pësoi lëndime të rënda, përfshirë goditje serioze në kokë dhe tru, thyerje të hundës si dhe hematoma në trup, ndërsa fëmija tjetër pësoi me lëndime më të lehta. Pamjet e rënda vërshuan rrjetet sociale.

Ngjarja ka shkaktuar shqetësim të thellë edhe te nxënësit e tjerë që ndodheshin në oborrin e shkollës, duke rikthyer në vëmendje problemin e dhunës mes të miturve dhe pasojat e rënda që ajo mund të lërë mbi fëmijët dhe familjet e tyre.

Prokuroria ka nisur procedurë ndaj pesë të miturve dhe ka kërkuar masa mbrojtëse, me qëllim mbrojtjen e viktimave dhe parandalimin e dhunës së mëtejshme.(INA)