Lajme

VLEN: Vota për AKI-në është votë për “Levicën”

VLEN sot ka akuzuar AKI-në për bashkëpunim me partinë e “Levicës” në raundin e dytë zgjedhor.

“Në Tetovë po ndodh skandali më i rëndë politik i këtyre zgjedhjeve. Fotografia që po qarkullon në media, ku shihet përfaqësuesi i shtabit të AKI-së në Tetovë, Ardi Ismaili, në takim me kandidaten e Levica-s Katka Bozhinovska, është dëshmia më e qartë se ky koalicion është gati të shesë çdo vlerë kombëtare vetëm që të fitojë pushtet.

Le të mos harrojmë kush është Levica, parti që: ka fyer shqiptarët publikisht, është deklaruar kundër Kosovës së pavarur, kundërshton anëtarësimin në NATO, ka kërkuar mbylljen e xhamive dhe kufizimin e të drejtave të shqiptarëve!

Dhe sot, AKI ulen në tavolinë me ta, për një marrëveshje të pistë zgjedhore. Kjo nuk është politikë, kjo është pazar i turpit. Kjo nuk është strategji, është fundosje morale.

Tani çdo qytetar e ka të qartë: për ta ruajtur karrigen, këta janë gati të shiten tek çdo forcë që urren shqiptarët.

Tetova, Dibra, Struga dhe çdo komunë shqiptare duhet ta dine, më 2 nëntor, vota për AKI është votë për Levicën, për antishqiptarizmin dhe për turpin politik”, thonë nga VLEN.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!