Lajme

“AKI vazhdon e bashkuar”! Ademi: BDI nuk mbanë përgjegjësi për Kërçovën, adresa për të kërkuar llogari është diku tjetër

Pas mbledhjes së Kryesisë Qendrore të BDI-së, nënkryetari Arbër Ademi njoftoi se BDI po hyn në zgjedhje të brendshme, që siç tha, janë tejkaluar afatet për shkak të angazhimeve me zgjedhjet lokale, shkruan TV21. Ademi bëri të ditur se deri më 23 dhjetor duhet të mbahet Kongresi i BDI-së.

“BDI hyn në zgjedhje të brendshme, për arsye se edhe afatet kanë skaduar për shkak të zhvillimeve politike me të cilat është përballur vendi”, tha Arbër Ademi.

Sa i përket rezultateve të zgjedhjeve, Ademi tha se BDI dhe koalicioni janë fitues, që siç shtoi, AKI e konfirmoi legjitimitetin e shqiptarëve pasi pati mbi 23 mijë vota më shumë se VLEN. E për rezultatin në Kërçovë ku BDI humbi pas 13 viteve, Ademi tha se nuk mbajnë përgjegjësi për këtë rezultat dhe se llogaria duhet kërkuar në adresa të tjera.

“BDI për në Kërçovë nuk mund të mbajë përgjegjësi. Të gjithë e dinë, të gjithë qytetarët janë dëshmitarë se këtu me vota edhe të koalicionit VLEN është zgjedhur kandidati i VMRO-DPMNE-së në Kërçovë. Me votat e koalicionit VLEN po ashtu është zgjedhur kandidati i VMRO-së në Bërvenicë. Nëse do të duhet dikush të jap llogari para opinionit lidhur me këtë çështje, adresa është diku tjetër jo te BDI”, deklaroi Arbër Ademi.

Ademi komentoi edhe nëse AKI do të vazhdojë rrugën së bashku. Siç tha, kanë beteja të tjera dhe do të performojnë së bashku.

“Sigurisht s ene kemi edhe disa beteja para nesh. I kemi zgjedhjet në Gostivar ku dallimi është i madh në favor të kandidatit të AKI-së, kemi zgjedhjet në Vrapçishtë dhe kuptohet se ne do të performojmë së bashku”, u shpreh Admei./tv21.tv

Lajme

4 gra të vrara nga partnerët gjatë këtij viti!

Këtë vit, 4 gra janë vrarë nga ish-ose partnerët e tyre aktualë. Në periudhën nga 2014 deri në 2024, gjithsej 115 gra janë viktima të femicidit, pra vrasjeve dhe tentativave për vrasje. Shteti duhet të angazhohet jo vetëm deklarativisht, por realisht për parandalimin dhe ri-integrimin e grave, viktima të dhunës së bazuar në gjini – thonë nga Rrjeti Kombëtar kundër dhunës ndaj grave dhe dhunës familjare.

“Këtë vit ndodhën 4 femicide, sepse të gjithë autorët ishin partnerë, aktualë ose ish-partnerë të grave të vrara. Në periudhën paraprake nga 2014 deri në 2024, kemi gjithsej 115 vrasje, por këtu përfshihen edhe tentativat për vrasje të grave. Ajo që po bëjmë tani është të analizojmë rastet gjyqësore të përfunduara me vendime të formës së prerë për të parë sa nga këto 115 vrasje dhe tentativa janë femicide”, tha Elena Dimushevska, Rrjeti kombëtar kundër dhunës ndaj grave dhe dhunës familjare.

Ata thonë se ri-integrimi është më i rëndësishmi. Megjithatë, edhe pse ligji ka hyrë në fuqi në maj 2021 dhe ri-integrimi është parashikuar në të gjitha shtyllat, shteti nuk është i përkushtuar në këtë çështje. Pasi nuk ka ndihmë nga shteti për ri-integrimin e viktimave, shumë prej tyre kthehen sërish tek partneri. Eksperiencat e tyre tregojnë se shtëpia nuk është vendi më i sigurt për gratë viktima të dhunës, madje 70 për qind e vrasjeve ndodhin aty.

“Dhunën ndaj grave nuk mund ta parandalojmë nëse nuk parashikojmë fonde financiare për shërbimet që u nevojiten më së shumti viktimave. Ajo që ekziston tani është një ndihmë vetëm një herë monetare, do të theksoj vetëm një herë, në shumën prej 15.000 denarësh. Dhe ajo nuk varet nga të ardhurat ose gjendja financiare e viktimës. Por kjo është e vetmja gjë që viktimat mund të marrin në këtë moment si ndihmë nga shteti”, u shpreh Elena Dimushevska, Rrjeti kombëtar kundër dhunës ndaj grave dhe dhunës familjare.

Rrjeti ofron ndihmë financiare për viktimat, përfshirë qiranë e banesës, mbulimin e shpenzimeve të ujit, rrymës dhe blerjen e ushqimit, por thonë se buxhetet e tyre janë të kufizuara dhe nuk mund të mbulojnë shpenzimet për të gjitha gratë dhe në një afat më të gjatë. Llogaritjet e tyre tregojnë se për një grua janë të nevojshme të paktën 25.000 deri në 30.000 denarë në muaj.

Lajme

Zjarri në Çarshinë e Vjetër të Shkupit vihet nën kontroll

Zjarri që shpërtheu sonte në një shtëpi të vjetër pranë kishës “Shën Spasi” në hyrje të Çarshisë së Vjetër të Shkupit është nën kontroll. Shkaku i zjarrit ende nuk dihet, dhe ekipet e Ministrisë së Brendshme do të kryejnë një inspektim.

“Në orën 19:43, u mor një njoftim për një zjarr në një shtëpi të braktisur në rrugën “Samoilova”. Menjëherë u dërguan tre automjete zjarrfikëse, të cilat me të mbërritur gjetën një zjarr në një fazë zhvillimi. Flakët ishin përhapur përtej strukturës së çatisë dhe dimensioneve të vetë ndërtesës”, tha Zvonko Tomevski, komandant i Departamentit të Zjarrfikësve të Shkupit.

Pastaj, siç deklaroi ai, u dërguan dy automjete shtesë dhe 20 zjarrfikës janë në vendngjarje duke ndërhyrë.

“Zjarri u vu nën kontroll në një kohë të shkurtër. Ndërhyrja ishte e suksesshme dhe zjarri nuk u lejua të përhapet në objektet fqinje. Tani po punohet për shuarjen e zjarrit dhe pastrimin e zonës, tha Tomevski.

Shkaqet e zjarrit, siç tha ai, duhet të përcaktohen më tej nga policia.

Sipas informacioneve jozyrtare, në shtëpinë tanimë të djegur shumë shpesh janë mbledhur njerëzit e pastrehë.

Lajme

Kasami: Gostivari gati për ndryshimin e madh

Kryetari i Tetovës dhe kryetar i Lëvizjes Besa Bilall Kasami ka qëndruar në Tetovë bashkë me liderët e tjerë të VLEN-it duke siguruar se edhe në këtë komunë do ta fitojnë pushtetin lokal sikurse në dhjetë komunat e tjera.

“Gostivari gati për ndryshimin e madh më 11 janar!

Gostivari VLEN! 🫶”, ka shkruar Bilall Kasami në Fejsbuk ku ka shpërndarë fotografi nga takimi me strukturat lokale të koalicionit dhe qytetarë.

Zgjedhjet lokale në Gostivar dhe Vrapçisht mbahen më 11 janar, pasi më 18 tetor dështoi të arrihej censusi në këto dy komuna. Qeveria ka caktuar Fadil Xhelilin si ushtres detyre kryetar i Gostivarit deri në zgjedhje, ndërsa ushtrues detyre në Vrapçisht u caktua Bujamin Kadriu.

Në zgjedhjet lokale në vjeshtë, VLEN fitoi 10 komuna, përfshirë komunat kryesore me shumicë shqiptare.