Lajme

Kurti: Lëvizjen tonë s’e ndali dot as bashkimi i të gjithë kundërshtarëve

Kryeministri i Kosovës, Albin Kurti, ka falënderuar qytetarët për pjesëmarrjen në balotazhin e zgjedhjeve lokale, duke vlerësuar angazhimin e tyre si kontribut të rëndësishëm për demokracinë dhe zhvillimin e vendit.

Përmes një mesazhi publik, Kurti u shpreh mirënjohës ndaj çdo qytetari që ushtroi të drejtën e votës, duke theksuar se pjesëmarrja e tyre tregoi pjekuri politike dhe ndikoi drejtpërdrejt në orientimin e qeverisjes lokale.

Po ashtu, ai bëri thirrje që tani kryetarët e zgjedhur të mbahen përgjegjës për premtimet dhe për gjendjen reale në komunat që do të udhëheqin.

“Ju falemnderit për pjesëmarrjen në balotazh. Treguat vullnet dhe pjekuri, i kontribuat demokracisë në Kosovë dhe orientimit të politikave publike në komunat tuaja. Mbajeni përgjegjës tani secilin kryetar për premtimet e dhëna dhe gjendjen në qytete e fshatra,” tha Kurti.

Duke iu drejtuar aktivistëve të Vetëvendosjes, kryeministri theksoi rritjen e fuqisë politike të partisë, e cila tashmë do të udhëheqë në shtatë komuna – më shumë se kurrë më parë.

“Tash do të qeverisim në shtatë komuna të Republikës, pra më shumë se kurdoherë më parë. Lëvizjen tonë s’e ndali dot as bashkimi i të gjithë kundërshtarëve. Ju falemnderit çdonjërit për angazhimin. Na presin shumë punë e sfida, që do të thotë se para nesh ndodhen shumë suksese e fitore,” u shpreh ai.

Kurti e mbylli mesazhin me falënderime të përzemërta, duke theksuar se angazhimi i aktivistëve e strukturave të Lëvizjes ishte vendimtar në rezultatet e arritura.

Lajme

Kamioni nga Serbia kapet me 5.000 bokse cigare në kufi me Greqinë, Mustafa: po godasim fuqishëm krimin ndërkufitar

Zëvendësdrejtori i Doganave, Mustafa Dauti, ka njoftuar për një aksion të suksesshëm kundër kontrabandës në pikën kufitare Bogorodicë, ku doganierët kanë zbuluar një sasi të madhe cigaresh pa akcizë.

Sipas tij, gjatë kontrollit të një kamioni që po kalonte transit nga Greqia drejt Serbisë, janë gjetur rreth 5.000 boksa cigare të fshehura, me një vlerë të përafërt prej 9 milionë denarësh.

Cigaret ishin kamufluar mbi paleta me lesh guri të deklaruara si material ndërtimor, ndërsa shoferi i kamionit, shtetas i Serbisë, është ndaluar nga autoritetet.

Rasti është proceduar si vepër e kontrabandës, ndërsa Dauti theksoi se ky aksion dëshmon përkushtimin e Doganave në luftën kundër tregtisë së paligjshme dhe krimit ndërkufitar, duke garantuar mbrojtjen e interesit publik dhe zbatimin e ligjit.

https://www.facebook.com/share/r/183rrUCzsD/

Lajme

Uji në Gostivar pastrohet nga ndotja

Më në fund uji në Gostivar është pastruar nga ndotja fekale dhe tash mund të përdoret si ujë teknik, por jo për pije dhe për përgatitje të ushqimit. Kjo u bë e ditur nga Komiteti Drejtues për menaxhim me kriza. Emilija Anevska nga “Ujësjellësi i Shkupit” tha se janë marrë gjashtë mostra nga konsumatorët në Gostivar dhe për tri ditë radhazi nuk janë evidentuar baktere koliforme. Megjithatë, monitorimi do të vazhdojë deri në konfirmimin se uji është i sigurt edhe për pije.

“Dua të them se uji mund të përdoret teknikisht, por gjithsesi qytetarët të mos e përdorin për pije dhe gatim. Në ditët në vazhdim do ta rrisim numrin e vendeve matëse në komunën e Gostivarit dhe do ta bëjmë kontrollin themelor në përputhje me rregulloren për ujë të pijshëm. Me monitorim të vazhdueshëm do të mund të vërtetojmë se uji në ditët në vazhdim do të mund të përdoret edhe për pije”, tha Emilija Anevska nga “Ujësjellësi i Shkupit”.

Ministri i Punëve të Brendshme, Pançe Toshkovski, u bëri apel drejtorëve të ndërmarrjeve publike dhe të gjithë personave që kanë lidhje direkte ose indirekte me cilësinë e ujit, që të veprojnë me përgjegjësi maksimale. Ai tha se shëndeti dhe siguria e qytetarëve duhet të jenë prioritet dhe se çdo përgjegjës duhet t’i zbatojë obligimet ligjore, veçanërisht në sigurimin e ujit të sigurt për pije.

“Dua t’u dërgoj një mesazh për të ardhmen të gjithë përgjegjësve në kuadër të komunave në territorin e Maqedonisë. Shpresoj që kjo të shërbejë si mësim dhe që, njëherë e përgjithmonë, në të ardhmen të veprojnë me profesionalizëm maksimal dhe në përputhje me kompetencat e tyre të përcaktuara me ligj sa i përket kontrollit të cilësisë së ujit. Sepse me shëndetin dhe sigurinë e qytetarëve nuk bëhet lojë. Çdo përgjegjësi duhet të merret me seriozitetin dhe profesionalizmin më të madh, veçanërisht përgjegjësia që lidhet me ujin, qoftë ujë teknik për përdorim apo ujë për pije”, tha , Pançe Toshkovski.

Edhe nga Komuna e Gostivarit njoftuan se uji nga rrjeti i ujësjellësit tashmë mund të përdoret për qëllime teknike.
Nga Komuna thanë se falë angazhimit të institucioneve lokale dhe qendrore, si dhe të gjitha palëve të përfshira në proces, po ndërmerren masat e nevojshme për sanimin e gjendjes.

Lajme

Nga 1 gushti shtrenjtohet ngrohja qendrore në Shkup, faturat rriten për rreth 140 denarë

Komisioni Rregullator për Energjetikë (KRRE) ka vendosur që çmimi i ngrohjes për konsumatorët e EMV-së të rritet mesatarisht me 5,96%, duke e rritur faturën mesatare mujore për rreth 140 denarë (nga 2.353 në 2.493 denarë), përcjell TV21. Për konsumatorët që furnizohen përmes ish-Ngrohtores “Shkup Veri”, tani kompania Energy Ecolink, çmimi do të rritet mesatarisht me 3,6 për qind, ndërsa për shfrytëzuesit e ESM Energjetika shtrenjtimi do të jetë rreth 5 për qind. Sipas KRRE-së, vendimi është marrë pas analizave ekonomike dhe teknike, ndërsa gjatë sezonit të kaluar sistemit të ngrohjes i janë bashkuar 1.521 konsumatorë të rinj.