Lajme

Alarm i rremë bombe në disa shkolla në Tetovë, Policia: Po punohet për zbardhjen e rastit

Për të katërtën herë me radhë, në shkollat e Tetovës dërgohet një email i rremë për alarm bombe. Këtë herë, alarmi nuk arriti në email-et e shkollave, por në Ministrinë e Punëve të Brendshme në Shkup, me ç’rast u dha urdhër që nxënësit e dy gjimnazeve në Tetovë të evakuohen. Drejtori i gjimnazit “Kiril Pejçinoviq” e konfirmon rastin, duke thënë se pas kontrolleve të policisë së Tetovës, mësimi ka vazhduar.

“Në mëngjes, afër orës 7 e 45 pasi filloi ora e parë, alarmin e dhanë organet e rendit, pra policia. Ngjashmëria është evidente por kësaj radhë dallimi është se nuk na kanë ardhur emale tek shkolla por ju ka shkuar emaili në polici dhe ne nuk dinim gjë. Në mëngjes nxënësit hynë në klasa dhe pastaj erdhi policia dhe kërkoi që nxënësit ta lëshojnë objektin shkollor. Dhe kështu ndodhi, policia bashkë me përgjegjësit e ndërrimit nxorën nxënësit nga mësimi dhe vijon kontrolli”, theksoi Jeton Kamberi – drejtor i Gjimnazit “Kiril Pejçinoviq”.

Rasti është konfirmuar edhe nga Sektori për Punë të Brendshme në Tetovë, nga ku bëjnë të ditur se po punohet për zbardhjen e rastit dhe identifikimin e vendit nga është dërguar emaili.

“SPB Tetovë ka ndërmarrë menjëherë gjitha masat dhe aktivitetet dhe ka evakuuar shkollën nga nxënësit dhe janë siguruar në pjesët e jashtme. Janë marrë masat për kontroll të objektit, por u konstatua se bëhet fjalë për alarm të rrejshëm. Viteve të fundit këto alarme janë shpeshtuar, andaj MPB ndërmerr masa dhe sektori për krim kompjuterik dhe forenzik marrin masat për ta locuar personin që ka dërguar këtë email”, u shpreh Fatmir Rexhepi.

Sipas të dhënave brenda Ministrisë së Punëve të Brendshme, emaili dyshohet të jetë shkruar në gjuhën maqedonase, pastaj përkthyer me Google në gjuhën shqipe, dhe është i ngjashëm me email-et apo alarmet e rreme të dërguara edhe më herët. Ndryshe, brenda një periudhe njëvjeçare, në shkollat e Tetovës kanë ndodhur katër raste të dërgimit të alarmeve të rreme për bomba të vendosura nëpër shkolla./TV21/

Lajme

Ali Ahmeti pret sportistin e ri nga Tetova, Muhammed Dauti

Kryetari i Bashkimit Demokratik për Integrim, z. Ali Ahmeti, sot priti në takim sportistin e ri 12-vjeçar nga Tetova, Muhammed Dauti, i cili ka arritur një sukses të veçantë në paraqitjen e tij të parë në disiplinat Kickboxing & MMA.

Muhammed Dauti u shpall fitues në Garat Ballkanike të Sporteve Marciale, të zhvilluara në Tetovë, duke dëshmuar talentin, disiplinën dhe përkushtimin e tij në këtë fushë sportive.

Gjatë takimit, z. Ali Ahmeti e përgëzoi sportistin e ri për këtë rezultat të rëndësishëm dhe vlerësoi angazhimin e tij, duke theksuar rëndësinë e mbështetjes së të rinjve që me punë, vullnet dhe përkushtim arrijnë suksese dhe bëhen shembull për gjeneratat e reja.

Me këtë rast, Muhammed Dauti shprehu mirënjohjen e tij për pritjen dhe përkrahjen, duke i dedikuar z. Ali Ahmeti medaljen dhe diplomën e tij të parë si shenjë respekti dhe falënderimi për mbështetjen gjatë rrugëtimit të tij.

Ky takim ishte një moment motivimi për sportistin e ri, i cili synon të vazhdojë me përkushtim rrugën e tij sportive dhe të sjellë shumë suksese të tjera për Tetovën dhe vendin tonë.

Urime Muhammed Dautit për këtë arritje dhe suksese të mëtejshme në karrierën e tij sportive!

Ja postimi plotë:

Sot pata kënaqësinë të mirëpres sportistin e ri 12-vjeçar nga Tetova, Muhammed Dauti, i cili ka arritur një sukses të jashtëzakonshëm në paraqitjen e tij të parë në disiplinat Kickboxing & MMA, duke u shpallur fitues në Garat Ballkanike të Sporteve Marciale, të organizuara në Tetovë.

Ky sukses është dëshmi e talentit, përkushtimit dhe punës së palodhur të Muhammedit, si dhe një motivim për të gjithë të rinjtë që merren me sport.

I urova Muhammedit suksese të vazhdueshme në rrugëtimin e tij sportiv, me bindjen se ky është vetëm fillimi i një karriere të ndritur dhe i shumë arritjeve të tjera që do ta bëjnë krenare Tetovën dhe vendin tonë.

Urime për këtë sukses të merituar!

Lajme

Zeqiri: Uji në Tetovë është i pijshëm, qytetarët mund ta konsumojnë lirisht

Pas rastit me ndotjen e ujit në Gostivar, në Tetovë po bëhen çdo ditë analizat e ujit, përcjell TV21. Drejtor i NPK “Sharri”, Valon Zeqiri siguroi se në Tetovë uji është i pijshëm.

“Analizat na tregojnë se uji në Tetovë është i pijshëm dhe nuk ka asnjë problem, prandaj qytetarët mund ta konsumojnë lirisht”, tha mes tjerash Zeqiri.

Lajme

Një grua e moshuar është lënduar nga rënia e një peme në Karposh

Më 20.7.2026 në orën 20:25, SPB Shkup ka marrë njoftim se në zonën e Karposhit ka rënë një pemë dhe K.M. (86) nga Shkupi ka pësuar lëndime të rënda trupore, pas së cilës është transferuar në Institucionin Shëndetësor Publik “Shën Naumi i Ohrit” për ndihmë mjekësore.

Gjithashtu, një qytetar ka raportuar se, gjatë kërkimit të çantës së gruas së lënduar, ka gjetur një mjet shpërthyes, i cili më vonë është marrë nga vendi i ngjarjes për veprime të mëtejshme.

Prokurori publik është njoftuar dhe po merren masa për sqarim të ngjarjes./Telegrafi/