Lajme

Pse po fshihen emrat e kompanive përfituese nga kredia hungareze?

As Qeveria, as Banka për Zhvillim nuk i zbulojnë të dhënat për kompanitë private që kanë përfituar nga kredia hungareze. E vetmja institucion që ka shprehur interes për ta hetuar këtë “logjikë” është Komisioni Shtetëror për Parandalimin e Korrupsionit. Deri tani, vetëm një kompani ka vendosur vetë ta publikojë emrin dhe shumën e marrë nga ky kredi, përcjell INA.

Bëhet fjalë për gjigantin në fushën e ndërtimit “Granit”, i cili vetë njoftoi se ka marrë 3 milionë euro nga e ashtuquajtura kredi hungareze. Në raportin e dorëzuar në Bursën e Maqedonisë për rezultatet e nëntëmujorit të parë të vitit, kompania thekson aty se është përfituese e kësaj kredie, pjesa më e madhe do të harxhohet në makineri dhe pajisje, të financuara nga bankat komerciale përmes nënkredisë hungareze”, njofton “Granit”.

Që nga mesi i majit, Qeveria u mundësoi kompanive të aplikojnë për mjetet e kredisë që shteti e mori nga Hungaria. Nga ky financim, 250 milionë euro janë paraparë për mbështetje të sektorit privat, përmes kredive të favorshme që do të realizohen nga bankat komerciale me fonde të siguruara përmes Bankës për Zhvillim.

Megjithatë, sipas opozitës, të dhënat për kompanitë përfituese nuk jepen, edhe pse janë kërkuar zyrtarisht përmes Ligjit për Qasje të Lirë në Informata, me arsyetimin se përbëjnë “sekret bankar”. Maksimumi që një kompani mund të marrë është 10 milionë euro. Deri tani, thuhet se pothuajse gjysma e shumës së shpërndarë është dhënë për investime në sektorin e ndërtimtarisë, përcjell INA.

Për kredinë hungareze, Kuvendi më 17 shtator të vitit të kaluar miratoi një ligj të veçantë, ndërsa marrëveshja u nënshkrua më 8 tetor në Budapest. Në total, bëhet fjalë për 1 miliard euro, të ndara si vijon: 250 milionë euro për kompani private, 250 milionë euro për komunat, 500 milionë euro për shlyerje të borxheve të vjetra të shtetit. (INA)

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.