Lajme

Miloshoski i reagon Ambasadës së Kinës

Në lidhje me reagimin e Ambasadës së Republikës Popullore të Kinës në Maqedoni, do të dëshiroja me respekt të theksoj disa pika:

Së pari, politika zyrtare e Maqedonisë ndaj RPK-së mbetet e pandryshuar, duke respektuar parimin e sovranitetit dhe integritetit territorial të një Republike të vetme Popullore të Kinës. Jam i bindur se projektet e përbashkëta dhe bashkëpunimi në të gjitha fushat do të vazhdojnë me intensitet të pandërprerë, nga të cilat të dyja shtetet, si partnerë të barabartë, do të kenë përfitime të ndërsjella.

Së dyti, përfaqësuesit e zgjedhur në Kuvendin e Republikës së Maqedonisë kanë legjitimitet dhe të drejtë të zhvillojnë takime me çdo individ apo delegacion mirëdashës, duke u udhëhequr nga fryma e shkëmbimit të hapur të mendimeve për tema relevante ndërkombëtare. Takimi me përfaqësuesit e Zyrës së Taipeit Zyrtar në Romë u realizua si një takim i sjellshëm kurtuazie, pa asnjë karakter diplomatik dhe pa asnjë qëllim për të rishikuar marrëdhëniet ose politikën zyrtare të Maqedonisë ndaj RPK-së. Përkundrazi, takimi u mbajt në shenjë mirënjohjeje për mbështetjen e tyre ndaj Klinikës Universitare të Pediatrisë dhe si mundësi për dialog paqësor dhe informues. Në takim morën pjesë deputetët Rashela Mizrahi, Fatmir Bitiki dhe unë, Antonijo Miloshoski.

Dhe në fund, mendimet dhe qëndrimet e ndryshme janë një dukuri normale dhe e pritshme në çdo shoqëri demokratike. Besoj se edhe përfaqësuesit e RPK-së do ta kuptojnë këtë takim si një mundësi për informim më të madh dhe për një kuptim më të mirë të temave që tërheqin vëmendjen e opinionit të gjerë diplomatik ndërkombëtar.

Me respekt,
Antonijo Miloshoski

Lajme

Deputetja Imerlije Saliu në Haxh: Falë mirësisë së Zotit këtë vit mu dha mundësia t’i përgjigjem thirrjes hyjnore

Deputetja e koalicionit VLEN, , ka bërë të ditur se këtë vit po kryen Haxhin, një nga obligimet më të rëndësishme fetare për besimtarët myslimanë.

Përmes një postimi nga vendet e shenjta në Arabinë Saudite, Saliji shprehu mirënjohjen që iu dha mundësia t’i përgjigjet thirrjes për këtë udhëtim shpirtëror, duke cituar fjalët e njohura të telbijes: “Lebbejke Allahumme Lebbejk, Lebbejke la sherike leke Lebbejk”.

Ajo tha se nata në Arafat, vend që në traditën islame njihet si vendi i takimit të parë mes Ademit dhe Havasë, e bën njeriun të kuptojë më thellë madhështinë e Krijuesit dhe përkohshmërinë e kësaj bote.

“Edhe pse kisha mundësinë ta përjetoja Haxhin në rrethana shumë më komode, zgjodha ta përjetoj si çdo besimtar tjetër, sepse Arafati ta rikujton fuqishëm se para Zotit nuk ka dallim pozite, pasurie, kombi apo titulli. Aty të gjithë qëndrojmë njësoj, vetëm si robër të Zotit”, shkroi Saliji.

Në mesazhin e saj, deputetja u lut që Allahu t’i pranojë lutjet e besimtarëve, t’u dhurojë zemra të qeta dhe faljen e Tij, duke kujtuar edhe thënien e Profetit Muhamed (paqja qoftë mbi të): “Haxhi është Arafat”.

Lajme

Çairi bëhet me pishinë të re

Kryetari i komunës së Çairit, Izet Mexhiti, ka njoftuar për hapjen e pishinës në Çair, një projekt që sipas tij ka kushtuar 1 milion euro.
Mexhiti, ka thënë se ata po realizojnë një nga një projektet të cilat i kanë realizuar.
“Pishina sportive, me investim prej 1 milion eurosh, sot hap dyert. Një projekt i madh që për shumë kohë ka qenë nevojë dhe kërkesë e qytetarëve, e që sot bëhet realitet.
Premtim pas premtimi, po i realizojmë. Një nga një. Çdo projekt që kemi zotuar ka hyrë në rrugën e realizimit dhe çdo ditë po dëshmojmë se puna, përkushtimi dhe përgjegjësia japin rezultate. Javë pas jave, bashkë me qytetarët, po përurojmë vepra që mbeten. Si sot këtë pishinë sportive.
Kjo është qeverisja jonë. Ky është VLEN. Fjalët i kthejmë në punë, ndërsa zotimet në rezultate.
Urime!”, ka shkruar Mexhiti.

Lajme

Deputeti Bytyqi: Qytetarët do të paguajnë mbi 60 milionë euro vetëm kamatë për borxhin e ri

Deputeti i LSDM-së, Fatmir Bytyqi, në konferencën e sotme për shtyp në Kuvend, tha se huamarrja e re qeveritare prej 260 milionë eurosh do të jetë shumë më e shtrenjtë, duke marrë parasysh normën e lartë të interesit, me shtetin që paguan midis 58 dhe 64 milionë euro vetëm për interesa.

Bytyqi theksoi se çmimi për huamarrje kaq të shtrenjtë do të paguhet nga qytetarët edhe para se të ndihet ndonjë efekt ekonomik.
“Sipas EURIBOR-it aktual gjashtëmujor prej 2.562% dhe marzhit të dakorduar prej 2.10 pikë përqindjeje, kjo kredi aktualisht do të kushtojë rreth 4.66% në vit. Në varësi të orarit përfundimtar të shlyerjes, shteti do të paguajë afërsisht midis 58 dhe 64 milionë euro vetëm për interesa, dhe me tarifën e njëhershme prej 3.64 milionë eurosh, barra e drejtpërdrejtë financiare varion nga 61 deri në 67 milionë euro, pa kosto shtesë të agjencisë dhe kosto të tjera. Ky është çmimi i vërtetë që qytetarët do të paguajnë edhe para se të ndiejnë ndonjë efekt ekonomik”, tha Bytyqi.

Në të njëjtën kohë, Bytyqi theksoi se paratë nga borxhi i ri nuk do të përdoren për të përmirësuar standardin e jetesës së qytetarëve, por për tenderët kriminalë të Qeverisë.
“Gjëja më e frikshme është se këto para nuk shkojnë te qytetarët, nuk shkojnë për një standard më të lartë, por për tenderët partiakë, kompanitë e preferuara dhe luksin e qeverisë. Prandaj, LSDM, siç njoftoi, do ta kundërshtojë këtë borxh”, tha Bytyqi.