Lajme

Gjesti i Ambasadës së Shqipërisë: Nxënësit e Butelit në radhë të parë në pritjen për 28 Nëntorin

Nxënësit e shkollës fillore “Zhivko Brajkovski” dhe “Petar Zdravkovski Penko” në Butel, të cilëve disa ditë më parë iu ndalua të festonin 28 Nëntorin në mjediset e shkollës së tyre, sonte ishin mysafirë të veçantë në pritjen zyrtare të organizuar nga Ambasada e Shqipërisë në Shkup me rastin e Festave të Nëntorit.

Me një gjest simbolik, por thellësisht domethënës, ambasadori i Shqipërisë, Denion Meidani, i vendosi vogëlushët në radhën e parë të të ftuarve, duke i bërë pjesë të ceremonisë zyrtare shtetërore. Ky veprim u vlerësua lart nga të pranishmit, të cilët përshëndetën me respekt dhe ngrohtësi nxënësit që vetëm pak ditë më parë ishin përballur me një vendim të padrejtë që u mohoi të drejtën për të festuar Ditën e Flamurit.

Pritja e Ambasadës së Shqipërisë u shndërrua kështu jo vetëm në një festë kombëtare, por edhe në një mesazh të qartë: tradita, identiteti dhe gjuha nuk ndalen, përkundrazi – nderohen dhe mbrohen. Ky gjest i ambasadorit Meidani u cilësua nga të pranishmit si shembull institucional që forcon ndjenjën e dinjitetit dhe përkatësisë te shqiptarët në Maqedoninë e Veriut. (koha.mk)

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net