Lajme

Gashi: Integrimi evropian nuk ndërtohet në Bruksel, por në shtëpi

Integrimi evropian nuk ndërtohet në Bruksel, por në vend, në vendimet tona dhe mënyrën në të cilën arrijmë konsensus, porositi kryetari i Kuvendit, Afrim Gashi, në konferencën e tetë plenare në Konventën Kombëtare për Bashkimin Evropian (KKBE-MK), të mbajtur sot në Kuvend.

Gashi theksoi se asnjë çështje dypalëshe nuk guxon të jetë pengesë për progresin drejt BE-së, duke shtuar se shembujt e Shqipërisë dhe Malit të Zi tregojnë se procesi është real dhe i arritshëm.

“Gara jonë nuk duhet të zhvillohet në retorikë, por në gjetjen e zgjidhjeve të përbashkëta për problemet e përbashkëta”, theksoi ai.

Kryetari i Këshillit Kombëtare për Integrim Evropian, Venko Filipçe, paralajmëroi se shteti humb kohë për shkak të mungesës së vullnetit politik për reforma thelbësore.

“Qartë tregon raporti i BE-së, reforma nuk ka, po e humbim kohën. Ky është një nga raportet më të këqij të cilët i ka marrë shteti”, tha Filipçe, duke theksuar se nuk ka përparim në sfera kyçe si gjyqësori, lufta kundër korrupsionit dhe reformat mediatike.

Ai shtoi se është i nevojshëm konsensus i gjerë politik për zbatimin e reformave dhe ndryshimeve kushtetuese, sepse, siç tha, Kuvendi është vendi i vetëm ku duhet të arrihet marrëveshje për të ardhmen evropiane të vendit.

Zëvendëskryetari i Komisionit për Çështje Evropiane, Igor Zdravkoski theksoi se Konventa Kombëtare është forum kyç për debat publik gjithëpërfshirës, ku janë përfshirë Qeveria, Parlamenti, shoqëria civile dhe akademia.

“Reformat duhet të vazhdojnë, sepse çdo ngecje ose devijim nga reformat evropiane do të na shtyjë në qorrsokak dhe do të nënkuptojë vetëm humbje kohe dhe energjie”, theksoi ai, duke kujtuar se Plani i Rritjes së Ballkanit Perëndimor, i miratuar nga KE, ofron ndihmë financiare për reforma gjithëpërfshirëse dhe të qëndrueshme.

Potencoi se ligji në sferën e shtetit juridik duhet të jetë rezultat i konsensusit të gjerë politik, ekspert dhe shoqëror.

Sipas tij, keqpërdorimi i flamurit evropian më nuk do të ndodhë, ndërsa Kuvendi do të jetë garant për proces transparent dhe të parashikueshëm.

“Së pari ta kryejmë detyrën e shtëpisë, ndërsa pastaj të shohim drejt dialogut”, përfundoi ai.

Ngjarja mbahet nën moton “Reforma nga ana tjetër e retorikës: Sfida rajonale në rrugën drejt Bashkimit Evropian”, me pjesëmarrje të deputetëve, ambasadorëve, ekspertëve nga gjyqësori, akademikë dhe përfaqësues nga Sllovakia, Shqipëria dhe Serbia.

Lajme

EVN: Vjedhje e energjisë elektrike me vlerë mbi 22,000 euro u zbulua në Kodrën e Diellit

EVN-Maqedoni ka bërë të ditur se në koordinim me Policinë e Tetovës dhe ekipet e tyre në Qendrën e Energjisë së Konsumatorëve në Tetovë zbuluan përdorim të paautorizuar të energjisë elektrike në një kompleks biznesi në Kodrën e Diellit, shkruan Portalb.mk.

Sipas tyre, gjatë inspektimit është zbuluar përdorim i paligjshëm i energjisë elektrike përmes një kutie lidhëse të kabllove, lidhje e drejtpërdrejt e paautorizuar me një kabllo me tension të ulët (4x16mm2).

“U përpilua një procesverbal për përdorim të paautorizuar. U parashtrua një ankesë për përdorim të paautorizuar të energjisë elektrike në Ministrinë e Brendshme sipas nenit 235-a të Kodit Penal. U përgatit një faturë për kompensim dëmi në shumën prej 1,361,599.00 denarësh apo rreth 22.000 euro”, thonë nga atje.

Gjithashtu edhe nga MPB për Portalb.mk e kanë konfirmuar aksionin policor në Kodrën e Diellit. Nga atje thonë se bashkë me punonjësit e EVN-Maqedoni kanë kryer inspektime mbi dyshimet për vjedhje të energjisë elektrike.

“Më datë 28.03.2026, në periudhën nga ora 15:00-18:00, është kryer kontroll në dy lokacione në Kodrën e Diellit, përkatësisht në një hotel në pronësi të L.Sh.(42) nga fshati Pirok dhe në një market në pronësi të B.M.(31) nga Tetova. Aksioni është realizuar në bashkëpunim me punonjësit e EVN-Maqedoni, të cilët kanë denoncuar veprën penale ‘vjedhje e energjisë elektrike’. Pas inspektimit, punonjësit e EVN-së kanë konstatuar se lokalet nuk posedonin njehsor elektrik, ndërkohë që në ato momente ishin të furnizuara me energji elektrike”, thonë nga MPB.

Pas dokumentimit të plotë të rastit, ndaj pronarëve të objekteve do të dorëzohen parashtresat përkatëse ligjore.

Lajme

Pas rebelimit ndaj VLEN-it, Arben Fetai ka kohë që mungon në punë dhe në seancat qeveritare

“Sa për ironi, zv kryeministri për Qeverisje të Mirë, Arben Fetai nuk paraqitet në punë. Nga Qeveria pa përgjigje konkrete, ata thonë se pyetjet tona duhet t’i adresojmë direkt te Arben Fetai.”

Si trup kolektiv, Qeveria funksionon pa pengesa dhe me kapacitet të plotë. Lidhur me pyetjet që kanë të bëjnë me angazhimin në punë, ju udhëzojmë që direkt t’i adresoni te Arben Fetai”, deklaruan nga Qeveria.

*Qeveria funksionon pa pengesa dhe me kapacitet të plotë
*Lidhur me angazhimun në punë, ju udhëzojmë që direkt t’i adresoni te Arben Fetai

Alsat kërkoi sqarim nga Arben Fetai nëse janë të vërteta këto pretendime, por nuk morëm përgjigje.

Rebelimi i Arben Fetait, vjen pas papajtueshmërive të tij me liderët e VLEN-it, ndërsa është një nga emrat më të përfolur që mund të përfshihet në rikonstruimin e Qeverisë në qershor. Përndryshe, Arben Fetai dhe Azir Aliu u ndanë nga Arben Taravari në maj të vitit 2025 kur ky i fundit braktisi Qeverinë dhe përfundoi në koalicion me BDI-në./Alsat.mk

Lajme

LSDM: Gruevski ka pasaportë hungareze dhe serbe

Nga partia opozitare maqedonase LSDM thonë se, sipas informacioneve të fundit që kanë siguruar, Nikolla Gruevski tashmë posedon pasaporta hungareze dhe serbe.

“Nëse i arratisuri nga drejtësia ka marrë pasaportë serbe dhe hungareze, atëherë është e qartë se pas kësaj qëndrojnë aleatët dhe mbrojtësit e tij politikë, Orban dhe Vuçiç – të cilët i konsiderojmë mentorë politikë të Mickoskit. Mosveprimi i qeverisë dhe refuzimi i vazhdueshëm për të dërguar një kërkesë të re për ekstradim tregon për një përpjekje të qëllimshme për t’i krijuar hapësirë dhe për ta mbrojtur Gruevskin”, thonë nga LSDM.

Ata shtojnë se, ndërkohë që vende të tjera si Polonia veprojnë shpejt në raste të ngjashme, sipas tyre, Mickoski po i jep kohë Gruevskit.

“Mickoski dhe VMRO-DPMNE nuk po ndërmarrin asnjë hap. Ata nuk duan që Gruevski të kthehet në Maqedoni dhe të përballet me drejtësinë. Kjo përbën një mbrojtje klasike të Nikola Gruevskit nga ana e Hristijan Mickoskit”, deklarojnë nga LSDM.