Pas erës së fuqishme që goditi Tetovën dhe shkaktoi dëme në disa pjesë të qytetit, ekipet e Ndërmarrjes Publike Komunale “Tetova” dolën menjëherë në terren për të ndërhyrë dhe për të normalizuar gjendjen.

Drejtori i NPK “Tetova”, Samet Bislimi, bëri të ditur se menjëherë pas përkeqësimit të motit u mobilizuan ekipet operative, të cilat nisën me largimin e drunjve dhe degëve të rrëzuara, pastrimin e rrugëve dhe hapësirave publike, si dhe eliminimin e pengesave që rrezikonin qarkullimin e qytetarëve dhe automjeteve.

“Prioriteti ynë ishte reagimi i shpejtë në çdo pikë ku u paraqitën probleme, me qëllim që qytetarëve t’u rikthehej sa më parë normaliteti dhe të garantohej lëvizje e sigurt në të gjitha zonat e prekura,” theksoi Bislimi.

Ai shtoi se ekipet e NPK “Tetova” vazhdojnë të jenë të angazhuara në terren dhe po punojnë pa ndërprerje për sanimin e plotë të pasojave të shkaktuara nga moti i lig.

Bislimi falënderoi punëtorët për profesionalizmin dhe përkushtimin e treguar gjatë ndërhyrjeve, duke theksuar se NPK “Tetova” mbetet në shërbim të qytetarëve dhe e gatshme të reagojë në çdo situatë që kërkon ndërhyrje urgjente.

Tre personat e arrestuar në lidhje me dyshimet për ndotjen e ujit të pijshëm në Gostivar janë sjellë sot në Prokurorinë Themelore Publike, ku pritet të merren në pyetje në kuadër të procedurës hetimore.
Arrestimi i tyre u bë pas veprimeve të ndërmarra nga policia në koordinim me Prokurorinë, ndërsa autoritetet po hetojnë rrethanat që çuan në ndotjen e rrjetit të ujësjellësit, ngjarje e cila preku mijëra qytetarë të Gostivarit.

Prokuroria pritet të vendosë për masat e mëtejshme ndaj të dyshuarve, ndërsa hetimet vazhdojnë për zbardhjen e plotë të rastit dhe përcaktimin e përgjegjësisë së secilit të përfshirë.

Ministri i Drejtësisë, Jeton Shasivari, sot zhvilloi takim me Nicole Varns, ushtruese e detyrës së shefes së Misionit në Ambasadën e Shteteve të Bashkuara të Amerikës, ku u konfirmua bashkëpunimi i fortë dhe i vazhdueshëm ndërmjet Ministrisë së Drejtësisë dhe SHBA-së si partner strategjik në zbatimin e reformave në sistemin e drejtësisë.

Në takim u diskutua për prioritetet kyçe të Ministrisë së Drejtësisë, me theks të veçantë te reformat në drejtësi, sundimi i ligjit, digjitalizimi i sistemit gjyqësor, agjenda legjislative dhe lufta kundër korrupsionit. Ministri i Drejtësisë, Jeton Shasivari, kërkoi që në periudhën e ardhshme të mundësohet shkëmbimi i përvojave dhe ofrimi i ndihmës ekspertësh nga SHBA-ja në fushën e legjislacionit penal.

Ministri Shasivari shprehu mirënjohje për mbështetjen e vazhdueshme që SHBA-ja i ofron Ministrisë së Drejtësisë dhe proceseve reformuese në vend, duke theksuar se ajo luan një rol të rëndësishëm në forcimin e kapaciteteve institucionale, veçanërisht në luftën kundër krimit të organizuar ndërkombëtar, si dhe në avancimin e bashkëpunimit ndërmjet institucioneve vendore dhe partnerëve ndërkombëtarë.

Në fokus të bisedimeve ishte edhe reforma e legjislacionit penal, e cila mbetet një nga prioritetet strategjike të Ministrisë së Drejtësisë. Në këtë drejtim, u theksua se ka filluar zbatimi i projektit “Mbështetje për zbatimin e Strategjisë Kombëtare për Drogat në Republikën e Maqedonisë së Veriut”, i financuar nga Byroja për Çështje Ndërkombëtare të Narkotikëve dhe Zbatimit të Ligjit (INL) pranë Departamentit Amerikan të Shtetit.

Në takim u konfirmua angazhimi i përbashkët për thellimin e mëtejshëm të partneritetit përmes projekteve të reja të përbashkëta, mbështetjes së ekspertëve dhe shkëmbimit të përvojave në fushat me interes të përbashkët.

Ministria e Drejtësisë mbetet e përkushtuar fuqishëm në zbatimin e reformave, forcimin e sundimit të ligjit dhe përmbushjen e standardeve evropiane, në interes të qytetarëve dhe të integrimit evropian të shtetit.