Lajme

Kush po i merr 250 milionë eurot nga kredia hungareze dhe pse fshihen emrat e kompanive?

Bizneset në Maqedoninë e Veriut do të përfitojnë mbështetje të re financiare në formë kredie prej 14.2 milionë euro, ndërsa Ministria e Financave ka realizuar pagesën e dy transeve të reja drejt Bankës për Zhvillim të RMV-së, në vlerë prej 873 milionë denarësh. Me këtë pagesë, shuma totale e mjeteve të plasuar nga kredia hungareze ka arritur në 217.5 milionë euro, nga gjithsej 250 milionë euro të planifikuara, përcjell INA.

Sipas Ministrisë së Financave, mjetet janë siguruar përmes një linje kreditore nga Banka Eksport-Import e Hungarisë, me qëllim mbështetjen e ekonomisë vendore, investimeve private dhe nxitjen e rritjes ekonomike. Kreditë ofrohen përmes bankave komerciale, me normë interesi 1.95%, afat shlyerjeje deri në 15 vjet dhe periudhë grejs deri në 3 vjet.

Sekret shtetëror për përfituesit privatë

Megjithatë, edhe pse bëhet fjalë për kredi që do të shlyhen nga qytetarët e Maqedonisë së Veriut në 15 vitet e ardhshme, institucionet refuzojnë të zbulojnë se cilat kompani private kanë përfituar nga këto mjete dhe në çfarë shume.

As Qeveria dhe as Banka për Zhvillim nuk publikojnë të dhëna për kompanitë përfituese, duke u thirrur në ligjin për sekret bankar. Nga Banka për Zhvillim thonë se informacionet për klientët individualë përbëjnë sekret bankar sipas nenit 111 dhe 112 të Ligjit për Bankat dhe nuk mund të bëhen publike.

Dyshime për mungesë transparence dhe rrezik korrupsioni

Ndërkohë, Komisioni Shtetëror për Parandalimin e Korrupsionit (DKSK) ka konfirmuar se po ndjek procesin, për të vlerësuar nëse ekziston rrezik për keqpërdorim apo konflikt interesi, në një situatë ku kreditë tashmë janë miratuar, por pa transparencë publike.

Nga Qeveria thonë se interesi i kompanive është shumë i madh, por përgjegjësia për përzgjedhjen e përfituesve bie ekskluzivisht mbi Bankën për Zhvillim dhe bankat komerciale.

Cilat kompani dihen deri tani?

Deri më tani, vetëm kompania “Granit” ka dalë publikisht dhe ka konfirmuar se ka përfituar 3 milionë euro nga kredia hungareze. Për kompanitë shqiptare, nuk ka të dhëna zyrtare të publikuara nga institucionet shtetërore.

Burime jozyrtare nga sektori bankar pohojnë se edhe kompani me pronësi shqiptare kanë aplikuar dhe kanë përfituar kredi, por mungesa e transparencës institucionale e bën të pamundur verifikimin publik të këtyre informacioneve.

250 milionë euro kredi – 300 milionë euro investime?

Sipas Ministrisë së Financave, ky mekanizëm financiar pritet të gjenerojë një cikël investimesh prej rreth 300 milionë euro, por pa publikimin e përfituesve, opinioni publik mbetet pa përgjigje për pyetjen thelbësore: Kush po i merr paratë dhe mbi çfarë kriteresh? (INA)

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.