Lajme

“Sindikata” kërkon që pagat e funksionarëve të ulen për 80%!

Lidhja e Sindikatave të Maqedonisë e dorëzoi në Kuvend iniciativën me të cilën pagat e funksionarëve duhet të ulen për 80%. Nëse pranohet iniciativa e tyre, me të cilën kërkojnë që baza për përllogaritje të jetë paga minimale, e jo paga mesatare si tani, funksionarët në vend do të kishin pagë deri rreth 1.000 euro, në vend të 2.000 deri 3.000 eurove sa janë tani. Deputetëve u japin afat deri të martën që në seancë të miratohet kjo zgjidhje, përndryshe thonë se do të mbledhin 10.000 nënshkrime dhe si propozues i autorizuar vetë do t’i dorëzojnë ligjet në Kuvend.

“Iniciativa është në drejtim që edhe ata, ashtu si punëtorët, ashtu siç i bindin punëtorët se jetohet mirë me pagë minimale, të ndryshohet neni 11 i të njëjtit ligj dhe në vend që si deri tani baza për përllogaritjen e pagës së funksionarëve të jetë paga mesatare, të jetë paga minimale. Për më tepër kërkojmë që koeficienti i kompleksitetit për përcaktimin e kompensimit të pagave të përcaktuara me këtë ligj të ulet për 40 për qind, ose gjithsej 80 për qind ulje të pagave të funksionarëve”, tha Sllobodan Trendafillov, Kryetar i LSM-së.

Ndërkohë, funksionarët tani me pagën e shkurtit, të cilën do ta marrin në mars, duhet të marrin rritje prej 200 deri 300 euro, pra për aq për qind sa është rritur paga mesatare vitin e kaluar. Enti Shtetëror i Statistikave më 20 shkurt duhet ta publikojë të dhënën për dhjetorin, por sipas vlerësimeve të analistëve ajo vitin e kaluar ka rritje mbi 9 për qind. Nuk ka vendim të Qeverisë, ndërsa ministri i Ekonomisë Besar Durmishi dje tha se po presin të dalin të dhënat e statistikave dhe pastaj do të marrin vendim. Tha se vendimi me shumë gjasë do të jetë si vitin e kaluar, kur rritja e pagave të funksionarëve u ndal me uljen e koeficientëve për përllogaritjen e pagave.

“Në muajin shkurt do të dalin të dhënat nga Enti Shtetëror i Statistikave ku do të shohim se cila është situata dhe në përputhje me këtë pastaj do të veprojmë. Qëndrojmë në atë qëndrim se nuk kemi, që kur kemi ardhur ne, nuk kemi sjellë asnjë vendim, dhe as nuk do të sjellim vendim me të cilin do të rriten pagat e funksionarëve”, u shpreh Besar Durmishi, ministër i Ekonomisë dhe Punës.

Por sindikalistët janë kategorikë se një vendim nuk mund të zhbëj ligjin. Paralajmërojnë se gjyqtarët dhe prokurorët tashmë kanë dorëzuar iniciativë në Gjykatën Kushtetuese që të “shkrijnë” ngrirjet përmes koeficientëve që i bëri qeveria, për të mos u rritur pagat e funksionarëve. Thonë se nëse miratohet ajo iniciativë, pagat e funksionarëve momentalisht do të rriteshin rreth 40 për qind, ose në një pagë prej 2.000 euro kjo do të ishin edhe 600 euro shtesë. Thonë se një vendim i tillë një herë është marrë dhe asgjë nuk e pengon të merret sërish. Pikërisht me vendimin e gjyqtarëve kushtetues të vitit 2023, pagat e funksionarëve u rritën për 78 për qind.

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)