Lajme

“Qyteti i Sigurt” në Tetovë, semaforë të rinj dhe rregullim i kryqëzimeve

“Qyteti i Sigurt” ka vendosur rend e rregull në dy rrugët ku janë të vendosura në Tetovë. Por, mungesa e një semafori për kthim në të majtë apo në të djathtë tek shkolla e mesme medicinale i penalizon shumë vozitës.

Vozitësit futen në të gjelbër, por mungesa e kohës për t’u larguar nga udhëkryqi bënë që të njëjtët t’i regjistrojë si shkelës të rregullave dhe kalim në të kuqen.

I pari i Tetovës, Bilall Kasami, tha se do t’i ndërrojë të gjithë semaforët e këtij udhëkryqi.

“Veç më kemi zgjedhur firmën që do ta bëj instalimin e semaforëve të rinj dhe heqjen e këtyre aktual, pra të gjitha kryqëzimet do të kenë semafor të ri modern dhe sigurisht që do të rregullohet edhe problematika që është paraqitur në afërsi të shkollës së mjekësisë.”, – deklaroi kryetari i Komunës së Tetovës, Bilall Kasami.

Deri në vendosjen e semaforëve të rinj dhe zgjidhjes së këtij problemi, qytetarët që marrin dënime në këtë udhëkryq, duhet të paraqiten te zyra e “Qytetit të Sigurt” në SPB-Tetovë.

Komandanti i SPB-Tetovë, Muhamed Ademi, tha se në Tetovë ka dy kamera të “Qyteti i Sigurt”, ndërsa kamerat tjera janë për siguri dhe rend publik, tha Ademi.

“Qytetarët të cilët momentalisht ngelin në udhëkryq, por kanë hyrë në të gjelbër, të njëjtëve nuk iu shqiptohen dënime, por nëse ndodh eventualisht t`iu shqiptohen dënime, duhet të drejtohen tek SPB-Tetovë për ta shqyrtuar rastin. Ka dy vende ku janë vendosur kamerat e “Qytetit të Sigurt” në Tetovë, njëra është tek rruga VS Bato, afër Ekologut, dhe tjetra tek medicina. Pjesët tjera të kamerave janë për rendin dhe sigurinë publike.”, – u shpreh komandanti i SPB-Tetovë, Muhamed Ademi.

Nga ana tjetër, kreu i Tetovës, Bilall Kasami, tha se të gjitha shenjat e komunikacionit në territorin e komunës së Tetovës duhet të jenë në dy gjuhë, duke theksuar se do të ketë komunikim me drejtuesit e rrugëve të Maqedonisë.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!