Lajme

Izraeli planifikon të kufizojë hyrjen në Xhaminë Al-Aksa gjatë Ramazanit

Autoritetet izraelite kanë planifikuar të kufizojnë aksesin e myslimanëve në Xhaminë Al-Aksa për lutje gjatë muajit të shenjtë islam të Ramazanit, tha në një intervistë me Anadolu një dijetar i njohur mysliman dhe ish-myfti i madh i Kudsit.

Shejh Ekrima Sabri, ish-myfti i madh i Kudsit dhe kreu i Këshillit Suprem Islam në Kuds, shprehu keqardhje për planin e administratës izraelite për të kufizuar aksesin në xhaminë e tretë më të shenjtë për myslimanët gjatë Ramazanit, i cili fillon në mesjavë.

Qëllimet e këqija të Izraelit ishin të qarta kur Gjeneral Major Avshalom Peled u emërua si komandant i ri i policisë në Kudsibn Lindor të pushtuar në javën e parë të janarit, një veprim i parë si një përpjekje për të çuar përpara planet e ministrit të Sigurisë Kombëtare të ekstremit të djathtë, Itamar Ben-Gvir, për xhaminë Al-Aksa.

Gazeta izraelite Haaretz ka shkruar: “Duket se Ben-Gvir po bën gjithçka që mundet për të ndezur flakët”.

“Myslimanët e mirëpresin Ramazanin me optimizëm, duke ndjekur traditën e Profetit Muhamed, i cili e mirëpriste muajin në fund të muajit Shaban”, tha Shejh Sabri për Anadolu. “Por në lidhje me Kudsin, na vjen keq për masat e ashpra që autoritetet pushtuese do të vendosin ndaj myslimanëve që vijnë në Xhaminë Al-Aksa”, shtoi ai.

“Autoritetet izraelite tashmë kanë ndaluar dhjetëra të rinj të hyjnë në xhami dhe kanë njoftuar se nuk do të lehtësojnë kufizimet gjatë Ramazanit për besimtarët që vijnë nga Bregu Perëndimor i pushtuar”, theksoi ai.

“Kjo do të thotë se do të ketë kufizime më të rrepta”, tha Sabri. “Numri i besimtarëve në Al-Aksa do të jetë më i ulët se në vitet e kaluara. Kjo bie ndesh me lirinë e adhurimit dhe prish respektimin e muajit të agjërimit nga myslimanët”, theksoi Shejh Ekrima Sabri, ish-myfti i madh i Kudsit.

Qindra mijëra palestinezë nga Bregu Perëndimor zakonisht udhëtojnë gjatë Ramazanit në Kudsin Lindor të pushtuar për t’u lutur në Xhaminë Al-Aksa.

Megjithatë, që nga fillimi i luftës më 7 tetor 2023, autoritetet izraelite kanë shtrënguar kufizimet në pikat e kontrollit ushtarake, duke kufizuar aksesin e banorëve të Bregut Perëndimor në Kuds.

Gjatë dy viteve të fundit, vetëm një numër i vogël kanë marrë leje të lëshuara nga ushtria izraelite, të cilat palestinezët thonë se janë të vështira për t’u marrë. Autoritetet nuk kanë njoftuar ndonjë rregullim të veçantë për Ramazanin këtë vit.

Ditët e fundit, autoritetet izraelite lëshuan gjithashtu urdhra të përkohshëm kundër qindra banorëve palestinezë të Kudsit Lindor – shumica e të cilëve të rinj – duke i ndaluar ata të hyjnë në Al-Aksa gjatë Ramazanit. Disa nga urdhrat zgjasin deri në gjashtë muaj.

Masat vijnë ndërsa qeveria e krahut të djathtë e Izraelit, e udhëhequr nga kryeministri Benjamin Netanyahu, përballet me kritika nga zyrtarët palestinezë për atë që ata e përshkruajnë si ndryshime në “status quo”-në e gjatë në vend.

Megjithatë, policia lokale ka lejuar në mënyrë të njëanshme ekstremistët izraelitë të hyjnë me forcë në kompleksin e xhamisë që nga viti 2003, pavarësisht kërkesave të përsëritura nga Departamenti i Vakëfit Islam për të ndaluar inkursionet.

“Nuk ka dyshim se qeveria e krahut të djathtë synon të zbatojë planin e saj agresiv në lidhje me Xhaminë al-Aksa,” tha Sabri. “Për vite me radhë, ata kërkuan hyrje publike, lutje të hapura, përdorimin e brirëve ritualë dhe sexhde. Ato që dikur ishin ambicie të fshehura tani janë bërë publike”, theksoi ai.

Ish-myftiu i madh i Kudsit shtoi: “Ne kemi paralajmëruar prej kohësh se Izraeli kërkon të imponojë sovranitet mbi vendin dhe të zvogëlojë autoritetin e Vakëfit Islam”.

Megjithatë, masat izraelite nuk kufizohen vetëm në Xhaminë Al-Aksa. Ato shtrihen edhe në prishjen e lagjeve palestineze në Kudsin Lindor të pushtuar në përgjithësi, dhe veçanërisht në ato pranë xhamisë.

“Politika e prishjes është një politikë raciste, e padrejtë, e paligjshme dhe çnjerëzore, dhe është një zgjatim i politikës së padrejtë të Britanisë në Palestinë gjatë periudhës së sundimit kolonial britanik”, u ankua ai.

Sabri u bëri thirrje popujve arabë dhe myslimanë që t’u ofrojnë ndihmë palestinezëve në Kuds dhe u bëri thirrje udhëheqësve arabë dhe myslimanë të mbajnë përgjegjësitë e tyre ndaj Kudsit dhe Xhamisë Al-Aksa.

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.

Lajme

Kasami mirëpret kryetarin e Kukësit, në fokus projektet ndërkufitare

Kryetari i Komunës së Tetovës, Bilall Kasami, ka pritur në një takim kryetarin e Bashkisë së Kukësit, Albert Halilaj, me të cilin ka diskutuar për sfidat dhe perspektivat e zhvillimit lokal.

Kasami bëri të ditur se takimi shërbeu për shkëmbimin e mendimeve dhe përvojave lidhur me çështje me interes për të dy komunat, ndërsa theks i veçantë iu kushtua mundësive për realizimin e projekteve ndërkufitare.

Sipas tij, projekte të tilla mund të kontribuojnë në zhvillimin e qëndrueshëm, shkëmbimin e përvojave dhe krijimin e përfitimeve konkrete për qytetarët në të dy anët e kufirit.

Takimi u vlerësua si një hap i rëndësishëm drejt forcimit të bashkëpunimit ndërmjet Tetovës dhe Kukësit, me synim realizimin e iniciativave të përbashkëta në të ardhmen.

Lajme

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Ministria për Çështje Evropiane organizoi takimin e nivelit të lartë në kuadër të Misionit Monitorues të Kornizës Investuese për Ballkanin Perëndimor (WBIF), me pjesëmarrjen e përfaqësuesve të Komisionit Evropian, Delegacionit të Bashkimit Evropian, institucioneve financiare ndërkombëtare, ministrive resore dhe institucioneve zbatuese.

Në hapje të takimit, Zëvendëskryeministri i parë dhe Ministri për Çështje Evropiane, Bekim Sali, theksoi se WBIF mbetet një nga instrumentet më të rëndësishme për mbështetjen e zhvillimit ekonomik, përmirësimin e lidhshmërisë rajonale dhe avancimin e procesit të integrimit evropian të vendit.

“Përgjegjësia jonë nuk përfundon me sigurimin e financimit. Matësi i vërtetë i suksesit është implementimi. Çdo projekt i realizuar do të thotë më shumë mundësi për qytetarët, ekonomi më konkurruese dhe standard më të lartë jetese”, theksoi ministri Sali.

Ai nënvizoi se monitorimi duhet të shihet si një instrument strategjik i qeverisjes që mundëson identifikimin e hershëm të sfidave, koordinim më efikas ndërinstitucional dhe vendimmarrje të bazuar në rezultate.

Gjatë takimit u diskutuan sfidat kryesore në implementimin e projekteve infrastrukturore, përfshirë kapacitetet e njësive implementuese, procedurat e prokurimit, ndryshimet në fushëveprimin e projekteve, koordinimin ndërmjet institucioneve dhe procedurat administrative për leje dhe miratime.

Sali theksoi se Agjenda e Reformave dhe Instrumenti për Reforma dhe Rritje kanë krijuar një qasje më strategjike në planifikimin e investimeve, ndërsa fokusi në periudhën e ardhshme duhet të jetë rritja e efikasitetit të implementimit dhe sigurimi i rezultateve konkrete për qytetarët.

Pjesëmarrësit riafirmuan përkushtimin e përbashkët për forcimin e mekanizmave të monitorimit, rritjen e kapaciteteve institucionale dhe përshpejtimin e realizimit të projekteve strategjike që kontribuojnë në zhvillimin ekonomik dhe afrimin e vendit me Bashkimin Evropian.

Misioni Monitorues i WBIF do të vazhdojë gjatë dy ditëve të ardhshme me takime tematike në fushën e transportit, energjetikës dhe mjedisit jetësor, si dhe me vizitë në terren në projektin e Impiantit për Trajtimin e Ujërave të Zeza në Shkup.