Lajme

Mexhiti: Pa pëlqimin e palës shqiptare Ligji për Arsimin e Lartë nuk do të miratohet

Izet Mexhiti ka deklaruar se nuk ka vend për shqetësim, kur bëhet fjalë për propozim ligjin e ri për Arsimin e Lartë. Mexhiti tha se procesi po ndiqet në dy nivele, atë politik dhe atë akademik dhe se asnjë vendim nuk do të merret pa pëlqimin e plotë të palës shqiptare dhe ekspertëve akademikë. Sipas tij, qëllimi parësor i kësaj reforme mbetet rritja e standardeve akademike, gjë që do të krijojë diploma më të fuqishme dhe më të njohura ndërkombëtarisht për gjeneratat e reja.

“Duhet ta kemi parasysh që ligji në fund sillet me badenter dhe patjetër të ketë pëlqimin e palës shqiptare dhe duhet të jetë në interes edhe të universiteteve shqiptare. Mendoj që në esencë Ligji pretendon për rritjen e kualitetit në arsimin e lartë dhe këtu e përshëndesim. Ne jemi që të rriten standardet, të rritet kualiteti sepse në fund ajo është vlerë për fëmijët tanë të cilët nesër do të dalin studentë nga aty dhe do të kenë një diplomë më të verifikuar, më të njohur dhe me vlera më të larta. Nuk ka nevojë për brengosje, edhe si përfaqësues politik edhe në nivel akademik po I bëjmë analizat në detaje dhe ligji do të jetë në frymën e ngritjes së kualitetit për të gjitha universitetet dhe arsimin e lartë në tërësi pa diskriminuar asnjë universitet”, deklaroi Izet Mexhiti, Kryetar i LD-së, VLEN.

Sipas dikasterit të Arsimit, rritja e cilësisë dhe kritere më të forta akademike janë ndër pikat më diskutuara të ligjit të ri. Çdo profesor do të jetë i detyruar të ketë nga 6 deri në 7 punime shkencore përpara zgjedhjes në titull, prej të cilave 3 ose 4 duhet të jenë të publikuara në revista me faktor impakti. Ndryshimet parashikohen në organizimin dhe financimin e universiteteve. Studentët që kanë studiuar në njërin nga 100 universitetet më të mira botërore me bursa shtetërore do të kenë përparësi punësimi në universitetet shtetërore. Mandati i rektorëve kthehet në 4 vite nga 3 që është aktualisht dhe ndryshon modeli i zgjedhjes së tyre. Propozim ligji i ri u kritikua edhe nga Forumi për Ndryshime në Arsim. Sipas Forumit, Qeveria po kërkon të marrë në dorë universitetet, duke kontrolluar statutet e tyre, gjë që e quan kundër Kushtetutës. Gjithashtu, Forumi akuzon se ligji vendos kritere të forta për profesorët e rinj, por i fal ata që janë tashmë në punë. Madje ata thonë se ky ligj përveç se po bëhet për të mbrojtur profesorët po i hap rrugë edhe nepotizmit, duke dëmtuar rëndë cilësinë në fakultete. /Alsat.mk

Lajme

Artan Grubit nesër i përfundon arresti shtëpiak

Ish zëvendëskryeministrit të parë Artan Grubi nesër i mbaron arresti shtëpiak. Vendimi ekzekutohet sipas fuqisë së ligjit pasi kalojnë 60 ditë nga dita e dorëzimit të propozim-akuzës. Megjithatë, Grubi i cili gati 8 muaj ka qëndruar në arrest shtëpie kërkon që t’i kthehet edhe pasaporta. Për këtë ka ofruar prona si garanci në vlerë mbi 335 mijë euro. Nga Gjykata Penale e Shkupit theksojnë shkurt për Alsat se për këtë propozim ende nuk kanë vendosur pasi e presin mendimin nga Prokuroria, e cila pritet që ta japë gjatë kësaj jave.

Ndërkohë vazhdon gjykimi për Grubin lidhur me keqpërdorimet në “Lotarinë Shtetërore”, megjithatë për dallim nga herët e kaluara, Grubi do të paraqitet në Gjykatë pa shoqërim policor.

Grubi gjykohet për “keqpërdorimin e detyrës zyrtare” pasi ka udhëhequr mbledhjen e Qeverisë ku është miratuar pika e rendit të ditës për nisjen e organizimit të pavarur të lojërave elektronike të fatit, ndonëse sipas Prokurorisë kjo nuk ka qenë e ligjshme. Sipas tyre, këtë e ka bërë në bashkëpunim me të akuzuarin e parë, ish drejtorin Përparim Bajrami.

Me këtë, Prokuroria pretendon se Grubi ka hapur rrugën që Lotaria Shtetërore t’i blejë VLT aparatet në vlerë mbi 9,7 milionë euro edhe pse të njëjtat nuk kanë qenë të nevojshme.

Pretendimet e këtilla Grubi i ka hedhur poshtë nën arsyetimin se për vendimin në mbledhje të Qeverisë kanë votuar 20 anëtarë, të gjithë “për”. Nga ana tjetër, teza e mbrojtjes së Grubit, por edhe të akuzuarve të tjerë është se ata kanë mbrojtur interesin shtetëror, me qëllim që përfitimi të shkojë direkt te Lotaria Shtetërore dhe jo të ndahet me partnerë të tjerë.

Lënda u hap në dhjetor të vitit 2024, rreth një javë pasi Shtetet e Bashkuara të Amerikës e futën në Listë të Zezë për korrupsion së bashku me ish gjyqtarin e Apelit Enver Bexheti. SHBA-ja i akuzoi për përfshirje në korrupsion të rëndësishëm, duke pretenduar se kishin pranuar ryshfet për të penguar proceset gjyqësore të lidhura me dënimin e ish shefit të Policisë Sekrete Sasho Mijallkov.

Megjithatë, Artan Grubi u largua nga Maqedonia më 15 dhjetor, duke kaluar pikën kufitare të Bllacës drejt Kosovës. Pas alarmit për arratisje, Grubi njoftoi në Facebook se ka udhëtuar për vizitë private dhe sapo t’i kryejë obligimet do të kthehet në shtëpi.

Megjithatë, obligimet e Grubit zgjatën mbi 14 muaj, për çka shteti shpalli fletëarrest të brendshëm ndërkombëtar. Në mëngjesin e 23 shkurtit, Grubi në Maqedoni hyri nga kishte dalë. Nëpër media dolën filmimet në të cilat shihej Grubi me pranga, pasi ishte vetëdorëzuar. Prej Pikës Kufitare Bllacë, Grubi dërgohet në Burgun e Shutkës, megjithatë vetëm pas disa orësh ai dërgohet në shtëpi pasi organet e sigurisë kishin alarmuar se rrezikohet jeta e Grubit në paraburgim. Për vendimin e këtillë pati reagime të ashpra në opinion.

Lajme

Astrit Iseni pas suspendimit të gjashtë policëve: Askush nuk është mbi ligjin

Gjashtë policë janë suspenduar pas dhunës brutale të ushtruar ndaj dy të rinjëve nga Saraji, Institucionet reaguan në kohë rekord, rasti nuk u la pa përgjigje, kështu deklaroi zëvendësministri i Punëve të Brendshme, Astrit Iseni, nga VLEN, I cili theksoi se MPB-ja ka kryer pjesën e saj të punës, ndërsa procedurat e mëtejshme i udhëheq Prokuroria. Sipas tij dhuna policore nuk ka vend në vendin tone dhe se uniforma është për ta mbrojtur qytetarin, jo për ta rrahur.

Iseni tha se sapo dolën pamjet, opozita shqiptare ka tentuar ta kthente dhunën ndaj dy të rinjve në betejë politike. Ku sic tha Iseni filluan akuzat, propaganda dhe përpjekjet për t’i dhënë ngjyrim etnik këtij rasti.

ASTRIT ISENI-ZËVENDËSMINISTËR I PUNËVE TË BRENDSHME

“Nuk harrohet “Sopoti”, ku i latë njerëzit të kalben burgjeve. Nuk harrohet djegia e dyqaneve shqiptare, ndërsa ju vazhdonit të rrinit si dekor në pushtet. Nuk harrohet “Monstra”, as fyerja ndaj shqiptarëve me termin “indijanci”. Nuk harrohet vdekja e Rexhail Qerimit në burg. Nuk harrohet vrasja e Harun Aliut. Nuk harrohet as vrasja e Xhemail Rexhepit (Komandant Shqiponjës). Për të gjitha këto raste, dhe shumë të tjera, çka bëtë JU? Asgjë. Heshtët!”.

Iseni theksoi se BDI për njëzet vjet ishin në pushtet, dhe se gjatë qeverisjes së tyre kanë ndodhur ngjarjet makabre, ku shumë prej rasteve janë lidhur me veprimet e policisë dhe të institucioneve të drejtësisë. Ai gjithashtu shtoi se sado që BDI mundohen t’i fshehin me gomë nga memoria kolektive e shqiptarëve, nuk do t’ia dalin sepse sic tha ai shqiptarët e mbajnë mend mirë. Ju jeni parti me shumë mëkate, fund e krye, deklaroi Iseni.

Lajme

40 kamera të reja në funksion, “Safe City” shtrihet në pesë komuna!

Sistemi i kamerave “Safe City” ka nisur funksionimin edhe në rajonin e Ohrit, me rreth 40 kamera të vendosura në disa komuna dhe akse të rëndësishme rrugore.

Kamerat do të mbulojnë Ohrin, Strugën, Kërçovën, Debërcën dhe Dibrën, si dhe rrugët drejt pikës kufitare Qafasan, Shën Naumit dhe autostradën Ohër–Kërçovë.

Sistemi do të regjistrojë shkeljet në trafik, përfshirë tejkalimin e shpejtësisë, parkimin e parregullt dhe kalimin në semafor të kuq.

Nga policia u bëjnë thirrje shoferëve të respektojnë rregullat dhe kufizimet e shpejtësisë, me qëllim rritjen e sigurisë dhe uljen e aksidenteve rrugore.