Sport

Jon Fejzullahu shkëlqen në Selanik fiton turneun Vardaris 2026 pa asnjë humbje

Një sukses i madh për talentin e ri të shahut Jon Fejzullahu. 12 vjeçari nga vendi ynë ka triumfuar në turneun C për lojtarë deri në 1600 rejting në kuadër të turneut ndërkombëtar Vardaris 2026 që u mbajt në Selanik.

Joni e mbylli garën me 6 pikë nga 7 ndeshje duke mos pësuar asnjë humbje dhe duke dominuar ndaj kundërshtarëve të tij. Performanca e tij e sigurt dhe e qëndrueshme i solli jo vetëm vendin e parë por edhe 76 pikë të reja në rejting çka e afron edhe më shumë drejt niveleve më të larta të shahut.

Ajo që e dallon Jon Fejzullahun nuk është vetëm rezultati por edhe pasioni i jashtëzakonshëm për lojën e shahut. Energjia e tij dashuria për çdo parti dhe entuziazmi me të cilin analizon çdo lëvizje tregojnë qartë se kemi të bëjmë me një talent që premton shumë për të ardhmen.

Ekipi i tij tashmë është i fokusuar në analizimin e ndeshjeve për të identifikuar hapësirat për përmirësim dhe për ta përgatitur për sfida edhe më të mëdha. Sfida e radhës për Jonin do të jetë turneu Berger Kalorësi i Vogël 2026 për fëmijë deri në 12 vjeç ku ai pritet të jetë një nga pretendentët kryesorë për vendin e parë.

Urime të veçanta shkojnë edhe për nënën e tij Adrianën e cila është mbështetja dhe forca më e madhe në rrugëtimin e tij drejt suksesit.

Historia e Jon Fejzullahut sapo ka filluar por hapat që po hedh tregojnë se e ardhmja e tij në shah pritet të jetë e ndritur.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Sport

Shkëndijën ska kush e ndal, fiton edhe në Kratovë ndaj Sileksit

Shkëndija e Tetovës vazhdon me rezultate pozitive në kampionat, raporton SHENJA. Kuqezinjtë tetovarë regjistruan fitoren e pestë radhazi, pasi në kuadër të xhiros së 5-të të elitës mposhtën Sileksin me rezultat 2:0. Pjesa e parë e takimit u mbyll pa gola, ndërsa Shkëndija e zhbllokoi rezultatin në minutën e 53-të. Meliqi realizoi për epërsinë 1:0 të miqve. Kuqezinjtë vazhduan të kërkonin golin e dytë dhe e gjetën atë në minutën e 87-të, kur Xengue shënoi për 2:0, duke vulosur edhe rezultatin përfundimtar të ndeshjes.

Me këtë fitore, Shkëndija shkon në kuotën e 15 pikëve pas pesë xhirove, ndërsa Sileksi mbetet me 7 pikë. /SHENJA/

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.