Lajme

Bekim Qoku: Amnistimi i Grubit është alarm kombëtar – BDI po gëlltit partitë e vogla dhe po normalizon tradhtinë

Deputeti i VLEN-it, Bekim Qoku, ka reaguar ashpër ndaj zhvillimeve të fundit politike, duke theksuar se parimi i prezumimit të pafajësisë duhet të respektohet në çdo sistem me demokraci liberale, por pa u bërë mburojë përballë akuzave serioze.

Sipas tij, nuk mund të injorohen akuzat që vijnë nga autoritetet e Shteteve të Bashkuara të Amerikës, një partner historik i shqiptarëve. Qoku përmendi bashkëpunimin e pretenduar të Artan Grubi me Sasho Mijallkov, si dhe rolin e mundshëm në shmangien e vuajtjes së dënimit me burg dhe në parashkrimin e lëndëve të Nikolla Gruevski.

“Të heshtësh përballë këtyre fakteve nuk i shërben së vërtetës dhe interesit publik. Ata që e duan vërtet popullin e tyre nuk mund të relativizojnë tradhtinë. Adhurimi i tradhtisë është mohim i atdhedashurisë”, theksoi Qoku, duke shtuar se “amnistimi kaq i shpejtë është frymëzues për bashkëpunime të tilla”.

Në reagimin e tij, deputeti i VLEN-it ngriti edhe një analizë më të gjerë politike, duke theksuar se partitë e vogla, të zhveshura nga ideologjia dhe kauzat e mëdha, bien lehtë pre e partive të mëdha dhe të organizuara. Ai vlerësoi se disa subjekte që kanë hyrë në koalicion me Bashkimi Demokratik për Integrim nuk i kanë bërë mirë llogaritë.

Sipas tij, simpatizantët dhe aktivistët e këtyre partive, të mësuar për vite të tëra të vepronin kundër BDI-së, sot janë “asimiluar pothuajse plotësisht” brenda saj.

Qoku theksoi se reagimet pas arrestimit të Grubit tregojnë një “konvertim radikal” të qëndrimeve të disa strukturave satelite, duke e cilësuar këtë si dëshmi të fuqisë absorbuese politike të BDI-së në skenën shqiptare në Maqedoninë e Veriut. (INA)

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net