Lajme

10 hafëzë të rinj për çdo ditë në xhaminë e Duqanxhikut lexojnë vargje Kurani

Leximi i vargjeve nga Kurani gjatë muajit të Ramazanit është një traditë që praktikohet në pothuajse çdo xhami të Shkupit dhe më gjerë. Megjithatë, kjo praktikë merr një dimension të veçantë në Xhaminë e lagjes së Duqanxhikut në Shkup, ku çdo ditë krijohet një atmosferë e veçantë shpirtërore.

Për çdo ditë, dhjetë hafizë mblidhen në këtë xhami, afërsisht 1 orë para faljes së namazit, për të lexuar vargje nga Kurani. Leximin e tyre e ndjekin me përkushtim edhe xhemati i pranishëm në xhami, i cili në këtë mënyrë, deri në fund të Ramazanit, arrin të përfundojë një hatme të plotë të Kuranit.

Atmosferë

Në mesin e hafizëve që sot lexuan vargje nga Kurani ishte edhe hafizi 13 vjeçarë, Diar Ibrahimi i cili hifzin e kishte kryer 3 vjet më parë dhe për tre vjet me radhë lexon në këtë xhami.

Atmosferë

Imami i xhamisë, Abdulkerim Ebibi duke folur për TV Shenja, thekson se kjo praktikë jo vetëm që forcon lidhjen e besimtarëve me Kuranin, por edhe krijon një ndjenjë të veçantë bashkësie dhe përkushtimi gjatë muajit të shenjtë.

ABDULKERIM EBIBI – IMAM

E organizojmë këtë traditë profetike nga viti kur është hapur Xhamia., pra prej vitit 2007-të, ramazani që tani e përjetojmë është ramazani i 20-të që ne vazhdojmë me këtë traditë. E kemi fillu me tre hafiza, pastaj është rrit numri me shtatë dhe tetë, dhe ka 10-12 vite që kemi dhjetë hafiza dhe e praktikojmë këtë praktikë.

Ramazani njihet si muaji i Kuranit, por në Shkup ai është shndërruar edhe në një periudhë të veçantë për të rinjtë që përmbyllin rrugëtimin e tyre të hifzit. Çdo vit, gjatë këtij muaji të bekuar, shumë të rinj arrijnë të përfundojnë memorizimin e Kuranit, duke e bërë Ramazanin jo vetëm muaj adhurimi, por edhe një kohë krenarie dhe gëzimi për familjet dhe komuniteti

Lajme

BDI braktisë seancën e Parlamentit, pasi që nuk arriti bllokimin e heqjen e Qeverisë teknike

Në lidhje me Ligjin për Qeverinë, koordinatorja e Rina Ajdari, deputete e BDI-së, kërkoi ndërprerjen e seancës së Kuvendit dhe që ky propozim-ligj të diskutohet shtesë edhe në Komitetin për Marrëdhënie Ndërmjet Bashkësive.

Nënkryetari i Kuvendit, pas disa ndërhyrjeve procedurale dhe sqarimeve, e hodhi në votim propozimin e Rina Ajdarit.

Nisma e BDI-së për ndërprerjen e seancës u refuzua me 65 vota KUNDËR dhe vetëm 14 vota PRO.

Pas këtij votimi, duke e cilësuar si majorizim, grupi parlamentar i BDI-së së bashku me deputetët Sali Murati dhe Halil Snopçe u larguan në mënyrë demonstrative nga seanca.

Është interesante që deputetët Ilire Dauti, Ziadin Sela dhe Elmi Aziri mbetën në seancë dhe morën pjesë në debatin për ligjin, shkruan portali maqedonas Express.

Edhe pse formalisht këta deputetë ende janë pjesë e koalicionit “Fronti Evropian”, ata nuk iu përgjigjën thirrjes së BDI-së dhe nuk e braktisën sallën e Kuvendit.

Kjo sjellje përputhet me paralajmërimet e Izet Mexhiti se dera e shumicës parlamentare është pjesërisht e hapur për partinë e Ziadin Selës.

Seanca ende po vazhdon dhe pritet që gjatë mbrëmjes deputetët të votojnë për propozim-ndryshimet në Ligjin për Qeverinë, ku propozohet shtyrja e shfuqizimit të qeverisë teknike, pas zgjedhjeve të ardhshme parlamentare.

Deputetët e LSDM janë në sallë dhe po marrin pjesë në debatin për ligjin.

Lajme

A do të pranojnë ftesën për në Qeveri? Ja çka thonë nga ASH-Sela!

Lidhur me këtë deklaratë të Mexhitit janë prononcuar për portalin Lideri.mk nga ASH-Sela.
Prej atje, as nuk e kanë mohuar e as nuk e kanë konfirmuar mundësinë që subjekti i udhëhequr nga Ziadin Sela të bëhet pjesë e Qeverisë.

“Për momentin merremi me kongresin e partisë”, kanë deklaruar nga ASH Sela për portalin Lideri.mk.

Ndryshe, në një paraqitje në “TV24”, Mexhiti tha se dera për Selën është hapur dhe se po shqyrtohet mundësia e përfshirjes së tij të mundshme në shumicën qeveritare.

“Ekziston një mundësi që Ziadin Sela të bashkohet me Qeverinë. Dera është hapur, ne komunikojmë në nivele të ndryshme”, tha ai.

Lajme

Aliu: Ligji për Mbrojtje nga Duhani, pas dy javësh në Kuvend

Ministri i Shëndetësisë, Azir Aliu, njoftoi se teksti i Ligjit për Mbrojtje nga Duhani është finalizuar dhe pritet që brenda dy javësh të hyjë në procedurë kuvendore.

Ai bëri të ditur se javën e ardhshme do të mbahet takimi përfundimtar me palët e interesuara, pas të cilit dokumenti do të kalojë në procedurat administrative në nivel qeverie, për t’u proceduar më pas në Kuvend.

“Kemi tekstin përfundimtar. Të mërkurën tjetër kemi takimin përfundimtar me të gjithë stakeholder-ët, pas këtij takimi do të vazhdojë procedura administrative në nivel të qeverisë, me idenë që për dy javë të jetë pjesë procedurale në Parlament”, deklaroi Aliu.

Gjatë një vizite në Gostivar, ministri theksoi gjithashtu se janë siguruar pajisje moderne mjekësore për katër spitale rajonale, në partneritet me Project HOPE.

Sipas tij, përmes projektit PeriMAC janë siguruar pajisje në vlerë prej rreth gjysmë milioni dollarësh, të destinuara për spitalet në Gostivar, Veles, Strumicë dhe Strugë. Vetëm për Spitalin e Përgjithshëm në Gostivar, vlera e pajisjeve arrin rreth 130 mijë dollarë.

Aliu theksoi se këto investime synojnë përmirësimin e kujdesit për nënat, të porsalindurit dhe pacientët që kanë më shumë nevojë për trajtim në këto institucione shëndetësore.