Lajme

Banesa me e shtrejtë është shitur në ‘Aerodrom’ (Shkup) për 3784 euro për metër katror

Tregu i patundshmërive në vitin 2025 mbetet i stabilizuar, aktiv dhe mjaft atraktiv për investime, duke shënuar një dominim të qartë të zonave urbane dhe trende pozitive ekonomike, sipas raportit vjetor të Regjistrit të Çimeve dhe Qirave nga Agjencia për Kadastër të Patundshmërive. Gjatë këtij viti janë realizuar gjithsej 33,381 transaksione, që përbën një rritje prej 7.6% krahasuar me vitin 2024, ndërsa vlera e përgjithshme financiare e tregut arriti në 1.14 miliardë euro, me një rritje prej 12.9%.

Banesat vazhdojnë të mbeten segmenti më dominant, duke marrë pjesë me 33% në numrin e përgjithshëm të shitblerjeve dhe me rreth 48% të vlerës totale të tregut. Megjithëse numri i banesave të shitura shënoi një rënie të lehtë prej 3.9%, vlera e tyre u rrit me 10.8%. Komunat më aktive mbeten Qendra, Aerodromi dhe Karposhi, të cilat prijnë edhe me çmimet mesatare më të larta, përkatësisht 1,692 euro/m² në Qendër, 1,558 euro/m² në Aerodrom dhe 1,419 euro/m² në Karposh.

Sa i përket rekordeve specifike, banesa më e shtrenjtë u shit në Aerodrom për 166,500 euro, ndërsa shtëpia më e shtrenjtë u regjistrua në komunën e Qendrës me vlerë prej 1,500,000 euro. Po ashtu, në Qendër u shit edhe hapësira afariste më e shtrenjtë për 6,800,000 euro, ndërsa çmimi më i lartë për metër katror u arrit në Aerodrom me 3,784 euro/m².

Tregu i ndërtimeve të reja mbetet dinamik sidomos në Shkup, ku në komunën e Qendrës çmimet nga investitorët u rritën me 31%, ndërsa në Ohër u vërejt një rënie prej 4%. Përveç banesave, një rritje të ndjeshme prej 36% në vlerën e shitblerjes shënoi edhe toka ndërtimore, ndërsa shtëpitë shënuan rritje vlere prej 37% krahasuar me vitin paraprak.

Tregu i qirave gjithashtu shënoi aktivitet të lartë me 9,911 kontrata të regjistruara, një rritje prej 17% krahasuar me vitin paraprak, me një vlerë totale mujore prej 4 milionë eurosh. Banesat dhe hapësirat afariste zënë pjesën kryesore të këtij tregu, me një rritje të çmimit të qirasë prej 15% deri në 24%. Për vitin 2026, parashikimet flasin për një rritje të moderuar të tregut, me interes të shtuar për investime dhe rritje të mëtejshme të kërkesës për marrje me qira, duke konfirmuar stabilitetin e këtij sektori në Republikën e Maqedonisë së Veriut.

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.