Lajme

Çfarë më tha Menduh Thaçi për vrasjen e komandant Telit

Shkruan: Xhezair Shaqiri, komandant Hoxha

Shkrimi im i fundit për fillimin e luftës së vitit 2001 në Tanushë dhe në Kalanë e Tetovës i paska prekur shumë aktivistë të PDSH-së, dhe po insistojnë që të flas për “tradhtinë e Kom Telit” me shokë, me qëllim – sipas tyre – që do të më zënë ngushtë. Jo, pasha Allahun.

Unë kam treguar vetëm të vërtetën për atë çka kam qenë dëshmitar në vitin 2001.

Sa i përket “tradhtisë së Kom Telit”, e kanë shumë lehtë: PDSH ka qenë në pushtet në atë kohë dhe le ta lusin Menduh Thaçin dhe Rafet Elmazin, i cili në kohën kur u vra Teli në Gazi Babë ka qenë zëvendësministër i Policisë, le t’i publikojnë emrat lirshëm, madje edhe nëse unë kam gisht.

Pasha Allahun, as që kam guxuar në mendje të mendoj për tradhti; prej Allahut tim, se nuk i do tradhtarët Allahu. Me krejt shqiptarët edhe mund t’i prishi punët, por me Allahun kurrë jo.

Në vitin 2005 jemi takuar me Menduh Thaçin në Kondovë, te shtëpia e Agim Krasniqit, ku ka qenë prezent edhe Matoshi dhe disa persona të tjerë, për të biseduar për zgjedhjet presidenciale, kur si kandidat ishte Branko C. Bëmë një marrëveshje, ku në shumë vende unë nuk i lashë të mbushen kutitë dhe Branko kaloi në disa vende me 0 vota. Unë i pata vënë kusht Menduhut që të më tregonte si ndodhi tradhtia dhe nga kush, pasi ai si pushtetar në atë kohë i dinte dhe i di shumë mirë kush e tradhtoi. Më pati treguar shumë pak dhe më dha fjalën se do të më tregonte në detaje, por nuk tregoi më vonë.

Mes tjerash, i pata thënë: nëse mi jep informacionet se kush ka marrë pjesë në këtë tradhti, unë do të ndihmoj në çdo cikël zgjedhor pa kushte të tjera.

Ai më tha: ka qenë një njeri brenda rrethit të Telit, nga shtëpia dhe një nga shtabi.

Tani ju të tjerët do të vërsuleni tek A.A. për ta akuzuar. Ne kemi bërë hetime për më shumë se 20 vjet dhe e dimë se kush ka qenë në atë shtëpi dhe kush ka dalë i gjallë atë natë të kobshme. E dimë edhe kur është biseduar në shtab për vrasjen time dhe të Telit, kush çka ka folur dhe kush ka qenë prezent, e vetëm ka dëgjuar pa folur asnjë fjalë.

Nuk po flas me emra, se pasha Allahun nuk keni për ta besuar edhe nëse jua them emrat dhe fjalët. Por një gjë po jua tregoj: kur personat kanë folur për vrasjen time – sepse është biseduar për këtë para vrasjes së Telit – i vetmi A.A. ka marrë fjalën dhe u ka thënë: “Djema, a jeni në vete çka po flisni? Lërini këto punë se nuk bën.” Dhe pas insistimit të personave pro vrasjeve, A.A. prapë flet dhe i thotë njërit: “Pse ti nuk dhe suksese në luftën e Kosovës, o Hoxhë? Pse ti nuk punove në fshatin tënd sa gjysma e punës që ka bërë Hoxha?” etj.

Unë mund t’ju them se ka shumë vite që s’jam parë me A.A., edhe pse kemi qenë shokë, dhe as që do të takohem ndonjëherë. Ju mund edhe të befasoheni për këtë shkrim – kush pro e kush kundër – por e keni të vështirë ta besoni të vërtetën. E unë po i shoh të respektuar nga shumica juaj ata të cilët e vranë Telin, mua dhe disa të tjerë.

Po e lë me kaq.

Le të tregojë Menduh Thaçi publikisht se si dhe kush e tradhtoi Telin. Unë, edhe pse jam tërhequr nga jeta politike, do ta përkrah PDSH-në.

Shqip, qartë e shkurt.

Lajme

Artan Grubit nesër i përfundon arresti shtëpiak

Ish zëvendëskryeministrit të parë Artan Grubi nesër i mbaron arresti shtëpiak. Vendimi ekzekutohet sipas fuqisë së ligjit pasi kalojnë 60 ditë nga dita e dorëzimit të propozim-akuzës. Megjithatë, Grubi i cili gati 8 muaj ka qëndruar në arrest shtëpie kërkon që t’i kthehet edhe pasaporta. Për këtë ka ofruar prona si garanci në vlerë mbi 335 mijë euro. Nga Gjykata Penale e Shkupit theksojnë shkurt për Alsat se për këtë propozim ende nuk kanë vendosur pasi e presin mendimin nga Prokuroria, e cila pritet që ta japë gjatë kësaj jave.

Ndërkohë vazhdon gjykimi për Grubin lidhur me keqpërdorimet në “Lotarinë Shtetërore”, megjithatë për dallim nga herët e kaluara, Grubi do të paraqitet në Gjykatë pa shoqërim policor.

Grubi gjykohet për “keqpërdorimin e detyrës zyrtare” pasi ka udhëhequr mbledhjen e Qeverisë ku është miratuar pika e rendit të ditës për nisjen e organizimit të pavarur të lojërave elektronike të fatit, ndonëse sipas Prokurorisë kjo nuk ka qenë e ligjshme. Sipas tyre, këtë e ka bërë në bashkëpunim me të akuzuarin e parë, ish drejtorin Përparim Bajrami.

Me këtë, Prokuroria pretendon se Grubi ka hapur rrugën që Lotaria Shtetërore t’i blejë VLT aparatet në vlerë mbi 9,7 milionë euro edhe pse të njëjtat nuk kanë qenë të nevojshme.

Pretendimet e këtilla Grubi i ka hedhur poshtë nën arsyetimin se për vendimin në mbledhje të Qeverisë kanë votuar 20 anëtarë, të gjithë “për”. Nga ana tjetër, teza e mbrojtjes së Grubit, por edhe të akuzuarve të tjerë është se ata kanë mbrojtur interesin shtetëror, me qëllim që përfitimi të shkojë direkt te Lotaria Shtetërore dhe jo të ndahet me partnerë të tjerë.

Lënda u hap në dhjetor të vitit 2024, rreth një javë pasi Shtetet e Bashkuara të Amerikës e futën në Listë të Zezë për korrupsion së bashku me ish gjyqtarin e Apelit Enver Bexheti. SHBA-ja i akuzoi për përfshirje në korrupsion të rëndësishëm, duke pretenduar se kishin pranuar ryshfet për të penguar proceset gjyqësore të lidhura me dënimin e ish shefit të Policisë Sekrete Sasho Mijallkov.

Megjithatë, Artan Grubi u largua nga Maqedonia më 15 dhjetor, duke kaluar pikën kufitare të Bllacës drejt Kosovës. Pas alarmit për arratisje, Grubi njoftoi në Facebook se ka udhëtuar për vizitë private dhe sapo t’i kryejë obligimet do të kthehet në shtëpi.

Megjithatë, obligimet e Grubit zgjatën mbi 14 muaj, për çka shteti shpalli fletëarrest të brendshëm ndërkombëtar. Në mëngjesin e 23 shkurtit, Grubi në Maqedoni hyri nga kishte dalë. Nëpër media dolën filmimet në të cilat shihej Grubi me pranga, pasi ishte vetëdorëzuar. Prej Pikës Kufitare Bllacë, Grubi dërgohet në Burgun e Shutkës, megjithatë vetëm pas disa orësh ai dërgohet në shtëpi pasi organet e sigurisë kishin alarmuar se rrezikohet jeta e Grubit në paraburgim. Për vendimin e këtillë pati reagime të ashpra në opinion.

Lajme

Astrit Iseni pas suspendimit të gjashtë policëve: Askush nuk është mbi ligjin

Gjashtë policë janë suspenduar pas dhunës brutale të ushtruar ndaj dy të rinjëve nga Saraji, Institucionet reaguan në kohë rekord, rasti nuk u la pa përgjigje, kështu deklaroi zëvendësministri i Punëve të Brendshme, Astrit Iseni, nga VLEN, I cili theksoi se MPB-ja ka kryer pjesën e saj të punës, ndërsa procedurat e mëtejshme i udhëheq Prokuroria. Sipas tij dhuna policore nuk ka vend në vendin tone dhe se uniforma është për ta mbrojtur qytetarin, jo për ta rrahur.

Iseni tha se sapo dolën pamjet, opozita shqiptare ka tentuar ta kthente dhunën ndaj dy të rinjve në betejë politike. Ku sic tha Iseni filluan akuzat, propaganda dhe përpjekjet për t’i dhënë ngjyrim etnik këtij rasti.

ASTRIT ISENI-ZËVENDËSMINISTËR I PUNËVE TË BRENDSHME

“Nuk harrohet “Sopoti”, ku i latë njerëzit të kalben burgjeve. Nuk harrohet djegia e dyqaneve shqiptare, ndërsa ju vazhdonit të rrinit si dekor në pushtet. Nuk harrohet “Monstra”, as fyerja ndaj shqiptarëve me termin “indijanci”. Nuk harrohet vdekja e Rexhail Qerimit në burg. Nuk harrohet vrasja e Harun Aliut. Nuk harrohet as vrasja e Xhemail Rexhepit (Komandant Shqiponjës). Për të gjitha këto raste, dhe shumë të tjera, çka bëtë JU? Asgjë. Heshtët!”.

Iseni theksoi se BDI për njëzet vjet ishin në pushtet, dhe se gjatë qeverisjes së tyre kanë ndodhur ngjarjet makabre, ku shumë prej rasteve janë lidhur me veprimet e policisë dhe të institucioneve të drejtësisë. Ai gjithashtu shtoi se sado që BDI mundohen t’i fshehin me gomë nga memoria kolektive e shqiptarëve, nuk do t’ia dalin sepse sic tha ai shqiptarët e mbajnë mend mirë. Ju jeni parti me shumë mëkate, fund e krye, deklaroi Iseni.

Lajme

40 kamera të reja në funksion, “Safe City” shtrihet në pesë komuna!

Sistemi i kamerave “Safe City” ka nisur funksionimin edhe në rajonin e Ohrit, me rreth 40 kamera të vendosura në disa komuna dhe akse të rëndësishme rrugore.

Kamerat do të mbulojnë Ohrin, Strugën, Kërçovën, Debërcën dhe Dibrën, si dhe rrugët drejt pikës kufitare Qafasan, Shën Naumit dhe autostradën Ohër–Kërçovë.

Sistemi do të regjistrojë shkeljet në trafik, përfshirë tejkalimin e shpejtësisë, parkimin e parregullt dhe kalimin në semafor të kuq.

Nga policia u bëjnë thirrje shoferëve të respektojnë rregullat dhe kufizimet e shpejtësisë, me qëllim rritjen e sigurisë dhe uljen e aksidenteve rrugore.