Lajme

Granit Plava trondit gjykatën: Behgjet Pacolli ishte në dijeni për vrasjen e Liridona Ademajt

Një zhvillim i rëndë dhe thellësisht tronditës ka dalë sot në sallën e gjykatës, gjatë dëshmisë së të akuzuarit Granit Plava, në një nga rastet më makabre që ka prekur opinionin publik në Kosovë vitet e fundit.

Gjatë mbrojtjes së tij, Plava ka bërë një deklaratë që pritet të shkaktojë valë të forta reagimesh. Ai deklaroi se gjatë planifikimit të vrasjes së tani të ndjerës Liridona Ademaj, i akuzuari tjetër Naim Murseli i kishte thënë se për këtë krim ishte në dijeni edhe Behgjet Pacolli.

Sipas këtij rrëfimi, Murseli i kishte dhënë siguri Plavës se, për shkak të pushtetit dhe ndikimit që Naim Museli dhe Behxhet Pacolli kanë, ai nuk do të qëndronte më shumë se dy vite në burg, duke krijuar kështu një perceptim të frikshëm për një skemë të paramenduar dhe të mbështetur në besimin për imunitet nga drejtësia.

Ky deklarim, nëse provohet ose edhe vetëm nëse hetohet seriozisht, e ngre çështjen në një nivel krejt tjetër – nga një vrasje e rëndë familjare, në një aferë potencialisht me implikime të thella politike dhe institucionale.

Rasti i vrasjes së Liridona Ademaj ka qenë që nga fillimi një ndër ngjarjet më të rënda dhe më të diskutuara në vend. Fillimisht u raportua si grabitje që përfundoi me fatalitet, por hetimet zbuluan një skenar të dyshuar të organizuar, ku në qendër qëndronte bashkëshorti i saj.
Deklarimi i sotëm i Granit Plava pritet të nxisë reagime të menjëhershme dhe kërkesa për sqarime zyrtare, veçanërisht nëse emri i Behgjet Pacolli përfshihet në hetime apo trajtohet nga organet e drejtësisë.

Ngjarja vazhdon të mbetet një plagë e hapur për opinionin publik, një rast që jo vetëm tronditi për brutalitetin e tij, por që tashmë rrezikon të marrë përmasa edhe më të mëdha, me pretendime që prekin nivele të larta të ndikimit dhe besimit në sistemin e drejtësisë.

Procesi gjyqësor është në zhvillim, ndërsa çdo deklaratë e tillë duhet të trajtohet me kujdes maksimal nga organet kompetente.

A do ftohet Behxhet Pacolli si dëshmitar në gjykim apo ndaj tij do fillojë hetim, mbetët të shihet në ditët në vijim. /Sinjali

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.