Dy incidente ndaj inspektorëve policorë të Kumanovës janë shënuar ditëve të fundit. TV21 mëson se pas mesnatës të së martës është djegur vetura, që në përdorim e kishte V.M. kryeinspektor i krimeve kompjuterike në SPB-Kumanovë. Si pasojë është djegur edhe vetura tjetër që ishte e parkuar pranë. Nga Ministria e Brendshme dyshojnë se zjarri është i qëllimshëm dhe kanë nisur hetimin ndaj autorëve.

“Më 21.04.2026 në orën 01:11 në rrugën ‘Nikola Vapcarov’ të Kumanovës iu është vënë zjarri automjeteve të parkuara të pasagjerëve ‘Volkswagen Tiguan’ me targa të Kumanovës, në pronësi të A.S., dhe të dhëna në përdorim për V.M. nga Kumanova si dhe automjeti tjetër ‘Opel’ me targa të Kumanovës, në pronësi të E.F. nga Kumanova. Zjarri është shuar nga Njësia e Zjarrfikësve të Kumanovës, dhe nuk ka pasur të lënduar. Një ekip nga SPB Kumanovë ka kryer inspektim”, njofton MPB.

Po ashtu, nga burime jo zyrtare TV21 mëson që javës së kaluar një inspektor tjerë nga SPB-Kumanovë është therur me thikë përderisa ishte jashtë detyrës, në prani të familjes gjatë një pikniku në afërsi të Pendës së Likovës. Inspektori Sh.R. është jashtë rrezikut për jetë dhe po merr mjekimin e duhur. Nga MPB nuk japin detaje për ngjarjen, por e konfirmuan duke thënë se kanë filluar hetimet.

“Sektori për Punë të Brendshme në Kumanovë ka ndërmarrë të gjitha masat dhe veprimet për zbardhjen e rastit dhe si rrjedhojë do të dorëzohen të gjitha gjetjet përkatëse në Prokurorinë Themelore Publike të Kumanovës”, njoftoi MPB.

Nga Policia nuk japin shpjegime nëse të dy rastet kanë lidhshmëri, motivet apo edhe nëse autorët janë i njëjti. Thonë se kanë mbledhur provat materiale nga terreni dhe pamjet nga kamerat mbikëqyrëse si dhe kanë marrë në bisedë informative dëshmitarët okularë./TV21

Një tender për mirëmbajtjen e shatërvaneve në Shkup është 500.000 euro, ndërsa buxheti për viktimat e dhunës është një 20.000 euro mizerabël, reagoi deputetja e “Levicës”, Jovana Mojsoska.

Në seancën e Komisionit të Përhershëm Anketues për Mbrojtjen e Lirive dhe të Drejtave të Qytetarit, deputetja e Levicës iu referua raportit vjetor të punës së Komisionit për Kompensim me Para për Viktimat e Veprave Penale me Dhunë për vitin 2024, i cili në vend që të tregojë një sistem funksional mbrojtjeje, zbulon një kolaps të plotë institucional.

“Edhe pse qëllimi i këtij Komisioni është që shteti t’u sigurojë mbështetje viktimave, raporti tregon se gjatë gjithë vitit 2024 nuk është paguar asnjë denar dëmshpërblim. Ajo që tregon raporti për vitin 2024 është se nuk është paguar asnjë kompensim monetar për viktimat e veprave penale me dhunë, me çka mund të konstatohet se padyshim te ne viktimat janë lënë të gjenden vetë për shkak të mosinteresimit të autoriteteve,” porositi deputetja.

Ndërsa numërojmë statistikat e zeza të viktimave të dhunës, shton Mojsoska, Komisioni për Kompensim me Para për Viktimat e Dhunës (pranë Ministrisë së Drejtësisë) disponon me një buxhet mizerabël prej vetëm 20.000 eurosh.

“Për krahasim, tenderi për mirëmbajtjen e shatërvaneve në Shkup është 500.000 euro, ose e thënë ndryshe, ky shtet kujdeset më shumë për shatërvanet sesa për viktimat e dhunës,” theksoi Mojsoska. (INA)

Pjesa e dytë e ndërtimit të autostradës Shkup–Bllacë pritet të nisë së shpejti, pasi aktualisht po bëhet evaluimi i ofertave nga tenderi ndërkombëtar.

Ministri i Transportit dhe Lidhjeve, Aleksandar Nikoloski, deklaroi sot se procesi po udhëhiqet nga Banka Evropiane për Rindërtim dhe Zhvillim (BERZH), ndërsa në garë janë 11 kompani të njohura dhe vendimi përfundimtar pritet shumë shpejt, përcjell INA.

Një projekt i premtuar prej 15 vitesh

Autostrada Shkup–Bllacë me gjatësi totale prej 12.5 kilometrash është premtuar për më shumë se 15 vite nga të gjitha qeveritë – VMRO-DPMNE, LSDM dhe BDI – ndërsa ideja për ndërtimin e saj daton mbi 20 vite më parë. Megjithatë, asnjë qeveri nuk ka arritur ta përfundojë këtë projekt strategjik.

Ndërtimi zyrtarisht nisi në maj të vitit 2020, vetëm dy muaj para zgjedhjeve të parakohshme parlamentare, kur filluan punimet për segmentin e parë prej 2 kilometrash – nga pika kufitare deri te fshati Bllacë.

2 kilometra të përfunduara, por pa funksion

Segmenti i parë është ndërtuar, por nuk është vënë në funksion të plotë. Ai përfundon praktikisht pa lidhje funksionale me pjesën tjetër të rrugës – në një “humnerë”, pasi mungon vazhdimi i autostradës.

Autoritetet kanë sqaruar se kjo pjesë nuk mund të lëshohet në përdorim pa përfundimin e segmentit të dytë, për shkak të mungesës së lidhjes infrastrukturore dhe standardeve të sigurisë.

Segmenti kryesor ende nuk ka nisur

Pjesa më e rëndësishme e projektit – segmenti i dytë prej 10.5 kilometrash, nga nyja në Stenkovec deri te Bllaca – ende nuk ka filluar të ndërtohet, pavarësisht premtimeve të vazhdueshme ndër vite.

Kosto e dyfishuar – nga 14 në 28 milionë euro për 2 km

Edhe më problematike mbetet çështja e kostos. Segmenti i parë ishte tenderuar për 14 milionë euro, por në fund përfundoi duke kushtuar 28 milionë euro – dyfish më shumë.

Sipas Ligjit për Prokurim Publik, rritja përmes anekseve zakonisht nuk duhet të kalojë 20%, ndërsa në këtë rast është arritur një rritje prej 100%. Kjo e bën këtë segment një nga më të shtrenjtit për kilometër në vend.

Kontrast i fortë me Kosovën

Ndërkohë, nga ana e Kosovës, autostrada “Arbën Xhaferi” me gjatësi 65 kilometra – nga kufiri me Maqedoninë e Veriut deri në Prishtinë – është ndërtuar që para shtatë vitesh dhe është përfunduar për vetëm pesë vite.

Ky kontrast thekson edhe më shumë zvarritjen e projektit në anën e Maqedonisë së Veriut.

Pritet vendimi kyç

Tani gjithçka varet nga vendimi i BERZH-it për përzgjedhjen e kompanisë që do të ndërtojë segmentin e dytë. Vetëm pas kësaj pritet të shihet nëse një nga projektet më të përfolura infrastrukturore në vend do të dalë më në fund nga vendnumërimi.(INA)