Lajme

BDI: Projekti ynë për Korridorin 8 konfirmohet dhe nuk mund të ndalet

Bashkimi Demokratik për Integrim ka përshëndetur zhvillimet e fundit lidhur me projektin e Korridorit 8, duke vlerësuar se ato konfirmojnë vazhdimësinë e një projekti strategjik që, sipas partisë, nuk mund të ndalet pavarësisht përpjekjeve politike për ta zvarritur apo ridimensionuar. Në një reagim publik, BDI thekson se zhvillimet e fundit tregojnë se projekti vazhdon të ecë sipas konceptit të projektuar në periudhën kur kjo parti ishte pjesë e Qeverisë, duke hedhur poshtë, siç thuhet, përpjekjet për të dobësuar lidhjen e korridorit me Shqipërinë.

Nga BDI vlerësojnë se shtyrja e vizitës së delegacionit të UNESCO nuk e vë në dyshim realizimin e projektit, por përkundrazi dëshmon seriozitetin me të cilin po trajtohet ai. Sipas partisë, kjo konfirmon nevojën që realizimi të bëhet mbi bazën e projektimit fillestar dhe në përputhje me standardet ndërkombëtare. Në reagim përmendet edhe ndryshimi i toneve nga ana e institucioneve qeveritare, duke theksuar se vetë ministri i Transportit tashmë nuk e vë më në diskutim ndërtimin e korridorit, por vetëm përzgjedhjen e trasesë më të përshtatshme. Sipas BDI-së, kjo paraqet tërheqje nga qëndrimet e mëhershme dhe pranim se projekti është i pashmangshëm.

BDI rikujton se Korridori 8 ka rëndësi strategjike për vendin dhe rajonin, duke lidhur lindjen me perëndimin, duke forcuar integrimin ekonomik dhe duke rritur lëvizjen e lirë të qytetarëve. Në reagim përmendet edhe mbështetja e Bashkimit Evropian dhe angazhimet nga Deklarata e Tiranës si dëshmi se ky projekt mbetet prioritet rajonal dhe evropian. Sipas partisë, korridori nuk ka vetëm dimension ekonomik, por edhe rëndësi të veçantë për sigurinë dhe stabilitetin rajonal, si dhe për zhvillimin afatgjatë të qëndrueshëm. BDI shpreh përkushtimin që projekti të realizohet i plotë dhe në funksion të interesit publik, duke theksuar se çdo përpjekje për ta penguar apo vonuar është e kotë, pasi, sipas tyre, Korridori 8 tashmë është “një realitet në ndërtim dhe një domosdoshmëri për të ardhmen evropiane të vendit”.

Lajme

Ahmeti: Populli nuk mund t’i dënoj çlirimtarët e vet!

Kryetari i BDI-së, Ali Ahmeti nga protesta për çlirimtarët në Shkup, deklaroi se populli nuk mund t’i dënoj çlirimtarët e vet.
Ahmeti tha se këto aktivitetet do të vazhdojnë në tërë Kosovën por edhe në tërë hapësirat ku jetojnë shqiptarët në Maqedoni.
“Sot në Sheshin Skënderbeu është vetëm fillimi dhe shqiptarët në Maqedoni, krahas shqiptarëtve të Kosovës do të demonstrojnë pakënaqësinë e tyre, revoltën e tyre se në emër të popullit shqiptarë nuk mund të dënohen çlirimtarët”, deklaroi Ahmeti, raporton SHENJA.
Ai tha se kjo çështje nuk është dashur të filloj fare me aktin e, siç e cilësoi ai, të turpshëm të Dik Martit.
“Për të njollosur tërë popullin shqiptar, dhe përderisa kemi ardhur këtu, sigurisht që duhet një aktivitet dhe punë e palodhur e institucioneve të Kosovës edhe të Shqipërisë në aktivitete të forta diplomatike për të sqaruar, shpjeguar tërë situatën para kancelarive të Evropës si financuese të kësaj Gjykata Speciale dhe shpalljen e tyre si të pafajshëm”, tha Ahmeti.

Lajme

Aliti: Kjo gjykatë është marrë me gjithçka përpos se me drejtësi

Rafiz Aliti, gjatë fjalimit të tij para protestuesve tha se gjykata e formuar me motive politike pa asnjë argument dënoi krerët e UÇK-së.
“Krerët e UÇK-së dhe njëkohësisht liderët janë mbajtur peng në Hagë për vite me radhë larg familjeve të tyre. Janë regrutuar dëshmitarë të rrejshëm nga BIA serbe dhe gjykatësi Jack Smith. Pikërisht dëshmitë e tyre të kafeneve luajtën rol në shqiptimin e dënimit”, tha Rafiz Aliti, komandant Mësuesi, raporton SHENJA.
Ai tha se nuk duhet të harruar kurrë se që çmimi që pagoi Kosova për lirinë është mbi 15 mijë të vrarë dhe mbi 1 milionë të zhvendosur nga shtëpitë e tyre.
Mësuesi tha se kriminelet serb nuk u përballën me drejtësinë dhe janë të lirë dhe lëvizin lirshëm nëpër botën.

Lajme

Sot në Shkup marsh protestues në mbështetje të ish-krerëve të UÇK-së

Sot, më 27 shtator, në Sheshin “Skënderbeu” në Shkup do të mbahet një marsh protestues në mbështetje të ish-krerëve të UÇK-së.

Ngjarja është thirrur për në ora 14:00, me qëllim të shprehjes së solidaritetit dhe qëndrimit qytetar përballë vendimeve të Gjykatës Speciale. Organizatorët bëjnë thirrje për një pjesëmarrje të qetë, dinjitoze dhe të bashkuar, për të dëshmuar se sakrifica, kujtesa dhe dinjiteti i luftës së Ushtrisë Çlirimtare të Kosovës nuk harrohen.

Në këtë marsh ftohen të marrin pjesë të gjithë qytetarët, familjet e dëshmorëve, veteranët, të rinjtë, studentët, intelektualët, shoqëria civile dhe gjithë personat që ndjejnë se kjo çështje i bashkon.