Pasi një ditë më herët ish-kryeministri i Maqedonisë së Veriut, Nikola Gruevski i cili ndodhet në arrati në Hungari, reagoi përmes rrjetit social Facebook ndaj ministrit të Drejtësisë Igor Filkov, duke shprehur pakënaqësi për mënyrën se si po trajtohet rasti i tij dhe për përpjekjet për nisjen e procedurave të ekstradimit, sot kanë reaguar edhe krerët politikë në vend.

Kryeministri Hristijan Mickoski, deklaroi se qëndrimi i Qeverisë për sundimin e ligjit mbetet i pandryshuar, duke theksuar se nuk do të ketë standarde të dyfishta. Sipas tij, çdo person që përballet me organet e drejtësisë gëzon të drejtat e garantuara me Kushtetutë dhe ligj, ndërsa institucionet do të veprojnë në përputhje me procedurat ligjore.

“Qëndrimi im është i njëjtë si para disa javësh dhe mbetet i pandryshuar. Nuk kemi standarde të dyfishta. Çdo qytetar që përballet me organet e drejtësisë ka të drejtat e garantuara me Kushtetutë dhe ligj. Institucionet do të veprojnë në përputhje me procedurat ligjore dhe në funksion të sundimit të ligjit.”, theksoi Mickoski.

Ndërkaq, lideri i opozitës maqedonase, Venko Filipçe, nuk pret që qeveria aktuale do të kërkojë ekstradimin e Gruevskit, pasi sipas tij, kjo qeveri nuk është serioze.

“Unë pres sikurse çdo shtet serioz, por fatkeqësisht kësi lloj qeverie nuk mundet të bëhet serioze dhe të udhëheqë shtet serioz dhe këtë e shohin ç’do ditë, qytetarët e ndjejnë. Të veprohet ashtu siç duhet, të kërkojë ekstradim, sidomos, pas deklaratës së kryeminsitrit hungarezë, që kriminelë të arratisur nuk do t’i mbajë, që është shembull se si kthehet demokracia në shtet, shembull, Europa e pranon atë, e atë duhet ta bëjë qeveria”, nënvizoi Filipçe.

Në lidhje me rastin e Nikolla Gruevski, kanë reaguar edhe nga Ministria e Drejtësisë, nga ku njoftojnë se po ndërmerren të gjitha hapat në përputhje me ligjin dhe marrëveshjet ndërkombëtare. Sipas tyre, procedurat zhvillohen në mënyrë institucionale dhe në bashkëpunim me autoritetet e Hungarisë, pa ndikim nga deklarata politike.

Në komunën e Tetovës pritet që 1025 nxënës të regjistrohen në shkollat fillore. Nëse bëjmë një krahasim me vitin e kaluar, ky numër është rritur për rreth 90 nxënës, por mbetet për t’u parë se sa nga këta fëmijë ndodhen aktualisht në Maqedoni dhe nuk janë shpërngulur.
Nga sektori për arsim në Komunën e Tetovës thonë se sot ka filluar regjistrimi dhe të dhënat nga librat amë tregojnë se ka një rritje të numrit të nxënësve. Problematikë edhe këtë vit mbeten prindërit që duan t’i regjistrojnë fëmijët në shkolla që nuk i përkasin rajonit të tyre.

“Të dhënat që kemi marrë nga Drejtoria e Librave Amë në Komunën e Tetovës tregojnë se gjithsej pritet të regjistrohen 1025 fëmijë për vitin akademik 2026/2027, në 12 shkollat fillore të rajonit tonë. Sipas informacioneve që kemi marrë sot në mëngjes, nuk kemi hasur ndonjë problematikë, përveç rasteve kur disa prindër kanë tentuar që përmes dokumenteve të noterizuara t’i regjistrojnë fëmijët në shkolla jashtë rajonit ku jetojnë. Përndryshe, gjithçka po shkon mirë. Vitin e kaluar kishim 939 nxënës të regjistruar të përkatësisë shqiptare, maqedonase dhe turke, ndërsa këtë vit presim fëmijët e lindur në vitin 2020 dhe janar të 2021-shit”, tha Valdin Ademi nga Sektori për Arsim në Komunën e Tetovës.

Nga shkolla fillore “Liria” thonë se këtë vit do të ketë gjashtë paralele, katër në gjuhën shqipe dhe dy në gjuhën maqedonase. Sipas drejtoreshës, pritet që numri i nxënësve të jetë i njëjtë me vitin e kaluar.

“Si çdo vit, edhe këtë vit fillon regjistrimi i nxënësve në klasë të parë. Kemi gjashtë paralele, dy në gjuhën maqedonase dhe katër në gjuhën shqipe. Si institucion jemi përgatitur plotësisht për këtë proces. Sipas listave që na kanë ardhur nga komuna, nuk kemi ulje të numrit të nxënësve, shifrat mbeten të qëndrueshme si vitin e kaluar”, u shpreh Farije Kasami – drejtoreshë e Shkollës “Liria”.

Procesi i regjistrimit të nxënësve në klasë të parë në Tetovë për vitin akademik 2026/2027 reflekton një paradoks midis statistikave zyrtare dhe realitetit demografik. Edhe pse të dhënat nga librat amë flasin për një rritje prej rreth 10% të numrit të nxënësve krahasuar me vitin paraprak , autoritetet mbeten skeptike për shkak të trendit të vazhdueshëm të migrimit të familjeve drejt jashtë shtetit. Përveç sfidës së shpërnguljes, komuna po përballet edhe me presionin administrativ të prindërve që tentojnë të anashkalojnë ndarjen rajonale të shkollave përmes dokumenteve të noterizuara, në kërkim të institucioneve të caktuara arsimore. (TV21)

Sektori për Krimin Kibernetik pranë Byrosë për Siguri Publike pranë Ministrisë së Brendshme njofton publikun se ditët e fundit është vërejtur një dukuri e shpeshtë e mesazheve mashtruese për shkelje të dyshuara të trafikut.

Sipas Ministrisë së Brendshme, persona të panjohur po u dërgojnë mesazhe përdoruesve maqedonas nëpërmjet një numri telefoni të huaj +639606963624 , duke kërkuar pagesë me kartë krediti në një faqe interneti të rreme që paraqitet si faqja e internetit e Ministrisë.

Mashtrimi funksionon duke e lidhur mesazhin me një faqe interneti të rreme të Ministrisë së Brendshme, ku qytetarëve u kërkohet të fusin numrin e targës së automjetit. Pastaj hapet një dritare e re që shfaq një shkelje të supozuar dhe kërkon një pagesë prej 1,500 denarësh .

Ministria e Brendshme u bën apel qytetarëve të jenë të kujdesshëm, të mos u besojnë mesazheve që vijnë nga faqet e internetit jolegjitime, të mos lënë të dhëna personale dhe të dhëna të kartave të pagesës, si dhe të mos hapin lidhje të dyshimta dhe dokumente të bashkangjitura nga dërgues të panjohur ose të paverifikuar.