Lajme

Luna parku i ri në Shkup do të kushtojë 10 milionë euro

Parku i ri argëtues në Shkup, në vendin e Luna parkut të vjetër në Parkun e Qytetit, do të kushtojë 10 milionë euro. Qyteti i Shkupit ka nënshkruar kontratë për projektimin, furnizimin dhe instalimin e rekuizitave për parkun argëtues. Siç është njoftuar në faqen e internetit të Byrosë së Prokurimit Publik, kontrata është nënshkruar me kompaninë “Mastef” DOOEL nga Shkupi, transmeton Portalb.mk.

Parku i ri do të ndërtohet në një sipërfaqe më të madhe se ai i vjetri, gjegjësisht do të zgjerohet edhe në vendin ku ishin diskotekat verore në Parkun e Qytetit, të cilat u shembën dy muaj më parë.

Shkupi nuk ka pasur park argëtues për 10 vjet. Ish-kryetari i Qytetit Petre Shilegov, pasi mori detyrën në vitin 2017, e ndaloi projektin e filluar nga paraardhësi i tij Koce Trajanovski, duke shpjeguar se nuk ishte i mirë dhe se në vend të luna parkut, do të ndërtohet një park argëtues në Shkup, në një sipërfaqe më të madhe dhe me shumë më tepër rekuizita për të gjitha moshat.

Pastaj, studioja italiane arkitekturore “Basa” përgatiti një studim i cili u prezantua në vitin 2019 dhe iu dhurua Qytetit të Shkupit. Projekti duhet të përfshijë shtatë rekuizitat e blera gjatë kohës së Trajanovskit, por edhe të sigurojë vende për instalimin e 20 të rejave, siç janë një rrotë panoramike, një karusel, një tajfun, një anije pirate. Për shkak të pandemisë Covid-19, projekti u ndal gjatë kohës së Shilegovit dhe paratë u ripërdorën për projekte të tjera.

Sipas projektit, parku i argëtimit duhet të jetë i përmasave për t’u shërbyer rreth 3,000 vizitorëve në ditë. Është planifikuar të instalohen rekuizita argëtimi, disa prej të cilave janë plot adrenalinë, shumica e të cilave janë për fëmijë, dhe do të ketë edhe disa të përshtatshme për familje. Hapësira duhet të përfshijë edhe ambiente shoqëruese si një fushë ushqimi, shatërvan, biletari, dyqan suveniresh dhe tualete.

Me ardhjen e Danela Arsovskës në detyrë në vitin 2021, ky projekt u pezullua, përkatësisht nuk u bë asgjë për ta vazhduar atë.

Kryetari i Qytetit Orce Gjorgjievski, pasi mori detyrën në nëntor 2025, tha se menjëherë do të fillojë procedurën për ndërtimin e parkut të zbavitjes dhe në dhjetor u shpall tenderi për një kontraktor për punimet e ndërtimit dhe furnizimin e rekuizitave sipas projektit nga koha e Shilegovit.

Lajme

Nga korriku, makinat do të jenë më të shtrenjta deri në 1,500 euro

Faza e fundit e standardeve të reja të sigurisë së automjeteve do të hyjë në fuqi në Bashkimin Evropian më 7 korrik, gjë që do të sjellë kosto shtesë për prodhuesit dhe, si rrjedhojë, një rritje të re të çmimit të makinave.
Sipas vlerësimeve, çmimet e automjeteve të reja mund të rriten me 400 deri në 1.500 euro, varësisht nga modeli dhe niveli i pajisjeve.

Ky është zbatimi i plotë i Direktivës së BE-së 2019/2144, e njohur si Rregullorja e Përgjithshme e Sigurisë. Me përfundimin e periudhës së tranzicionit, nga korriku asnjë makinë e re nuk mund të regjistrohet në Evropë nëse nuk i plotëson të gjitha standardet e reja të sigurisë, pavarësisht se kur është projektuar modeli. Kjo do të thotë që shumë platforma të vjetra dhe modele më të lira do të duhet t’i nënshtrohen përmirësimeve shtesë teknike për të qëndruar në treg.

Ndër sistemet e detyrueshme që çdo automjet i ri do të duhet të ketë tani janë frenimi automatik emergjent me njohjen e këmbësorëve dhe çiklistëve, si dhe dritat adaptive të frenave që ndizen me shpejtësi gjatë frenimit të menjëhershëm.

Dritat adaptive të frenave, ose ESS (Sinjali i Ndalesës Emergjente), janë një sistem që shumë prodhues premium e kanë ofruar në modelet e tyre për vite me radhë. Mercedes, BMW, Audi, Volvo dhe marka të tjera e kanë përfshirë atë si pajisje standarde në modelet e nivelit të lartë për një dekadë tani.

Këto teknologji deri më tani kanë qenë standarde kryesisht në modelet më të shtrenjta dhe premium, por që tani e tutje ato do të duhet të jenë të disponueshme edhe në makinat më të lira të qytetit.

Frenimi automatik emergjent (“AEB”), me zbulimin e këmbësorëve dhe çiklistëve pranë automjetit, u prezantua në korrik 2024, por jo të gjitha modelet e kishin. Tani do të duhet të instalohet edhe në makinat më të lira në treg.

Edhe pse sistemet e sigurisë duhet të kontribuojnë në uljen e numrit të aksidenteve rrugore, ekspertët paralajmërojnë se barra më e madhe do të bjerë mbi blerësit e makinave më të lira. Një shtesë prej 1,000 eurosh për një makinë me vlerë rreth 15,000 euro do të thotë një rritje çmimi prej gati shtatë përqind, ndërsa për modelet luksoze do të jetë një goditje shumë më e vogël në krahasim me çmimin përfundimtar.

Industria e automobilave ka paralajmëruar prej kohësh se rregulloret evropiane po rrisin ndjeshëm kostot e prodhimit. Në vitet e fundit, prodhuesit kanë paralajmëruar gjithashtu për rritje shtesë të çmimeve në lidhje me standardet mjedisore Euro 7, me disa kompani që vlerësojnë se disa modele mund të bëhen disa mijëra euro më të shtrenjta.

Makinat e vogla të qytetit dhe modelet e nivelit të ulët mund të goditen më rëndë, pasi çdo kosto shtesë ndryshon ndjeshëm çmimin përfundimtar të shitjes. Disa analistë paralajmërojnë se standardet e reja mund të shkaktojnë zhdukjen krejtësisht të disa modeleve të lira nga tregu evropian.

Lajme

Pagoi 1.000 euro për veturë nga jashtë, por tetovari mbeti pa para dhe pa automjet

SPB Tetovë ka ngritur kallëzim penal kundër A.L. (46) nga Shkupi për veprën penale “mashtrim”, si dhe kundër J.A. (34) nga fshati Opajë i komunës së Likovës për “bashkëkryerje”, pas dyshimeve se kanë mashtruar një qytetar nga rrethina e Tetovës lidhur me transportimin e një automjeti nga jashtë vendit.

Sipas policisë, më 7 korrik 2025, viktima kishte realizuar pagesë prej 1.000 eurosh përmes transferit të shpejtë të parave, me marrëveshje që të denoncuarit t’i sillnin një automjet nga një shtet i huaj. Megjithatë, deri në momentin e paraqitjes së rastit në polici, transporti nuk ishte realizuar dhe automjeti nuk ishte dorëzuar.

Lajme

Shkupjani ia “lëshoi briskun” kumanovarit, me 30 mijë euro për “Mercedesin”

Një qytetar i Kumanovës ka mbetur pa 30 mijë euro, që kur shkupjani nëpërmjet kompanisë së tij, e kishte blerë mercedesin luksoz, por që nuk e kishte paguar shumën e parave për të cilën kishin rënë dakort paraprakisht.
Sektorit per Punë të Brendshme (SPB) Kumanovë, ka parashtruar padi penale ndaj personit me inciale S.Gj (61) nga Shkupi dhe kundër personit juridik poashtu nga Shkupi, për shkak të ekzistimit të dyshimit për kryerjen e veprës penale “mashtrim”.

Sipas Policisë së Kumanovës, i paraqituri me anë të faktete të rreme e ka mashtuar qytetarin nga Kumanova, gjegjësisht ia ka marrë veturën e tipit “Mercedes Vito”, kurse ndërkohë ai nuk e ka bërë pagesën ashtu sic janë marrë vesh paraprakisht.