Lajme

Zejdi i kërkon kryeministrit të hiqet termi 20% nga kushtetuta, Mickoski: Jeni patriot nga Ali Expressi

Deputeti i Frontit Evropian Skender Rexhepi Zejdi pyeti kryeministrin nëse vazhdon të mbajë qëndrimin e njëjtë që kur ishte në opozitë deklaronte se termi i 20%-shit që i referohet gjuhës shqipe duhet të hiqet nga Kushtetuta. Me këtë rast, deputeti Zejdi i kërkoi kryeministrit që të bëhen ndryshimet kushtetuese.

Skender Rexhepi, deputet i Frontit Evropian

“Kryeministër, a jeni të gatshëm t’i bëjmë ndryshimet kushtetuese, ju ta filloni, ashtu siç e keni premtuar 2020-2022, ju si kryeministër, ju t’i merrni meritat, që përfundimisht gjuha shqipe, gjuha ime të bëhet pjesë e Kushtetutës dhe të krijohet një harmoni ndëretnike e cila është më se e nevojshme për qytetarët. I keni numrat, i kemi numrat, mbi 100 deputetë”.

Mickoski u shpreh se për të nuk është e rëndësishme përqindja. Prandaj, ju kërkoi që deputetët e opozitës ta mbështesin Ligjin për përfaqësim të drejtë dhe adekuad, që do të hyj në Kuvend. Ndërsa, Mickoski ju kundërpërgjigj edhe akuzave të opozitës lidhur me provimin e jurisprudencës, për çka tha se kjo ka mundur të zgjidhet me kohë nga ministrat e BDI-së që për vite kanë qenë në krye të dikasterit të Drejtësisë.

Hristijan Mickoski, kryeministër

“Lidhur me provimin e jurisprudencës, nëse e keni lexuar ligjin, do të lexoni aty se provimi nuk rregullohet me ligji në çfarë gjuhe do të jetë, por rregullohet nga ministri, sa ministra drejtësie ishin nga koalicioni që mbështesni, pse nuk e rregulluan? Sepse jeni hipokritë, sepse jeni patriotë nga Ali Express kur jeni në opozitë, dhe në qeveri promovoni eko-axhenda të gjelbra, në opozitë doni të krijoni konflikt etnik aty ku nuk ka”.

Kryeministri kritikoi studentët që gjatë protestës së tyre krahas flamurit shqiptar nuk përdorën edhe flamurin shtetëror.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.

Lajme

Artan Grubi lirohet nga arresti shtëpiak

Ish-zëvendëskryeministri Artan Grubi, i cili është i akuzuari i dytë në rastin “Lotaria Shtetërore”, sot lirohet nga arresti shtëpiak, pasi skadon afati maksimal ligjor i paraparë për këtë masë.

Ndërkohë, mbrojtja e tij i ka dorëzuar gjykatës kërkesë për heqjen edhe të masave shtesë të kujdesit, ndërsa si garanci se ai do të jetë në dispozicion të organeve të ndjekjes gjatë procedurës penale është ofruar pasuri e paluajtshme në vlerë prej 335.707 euro.

Artan Grubit, përveç arrestit shtëpiak, i është caktuar edhe masa e sekuestrimit të përkohshëm të dokumentit të udhëtimit, si dhe ndalimi i lëshimit të dokumentit të udhëtimit ose dokumenteve të tjera për kalimin e kufirit shtetëror.

“Propozim-aktakuza, mbi bazën e të cilit është regjistruar lënda penale, është dorëzuar më 13 gusht të vitit 2026. Në përputhje me nenin 470 të Ligjit për procedurën penale, paraburgimi mund të zgjasë më së shumti 60 ditë nga dita e dorëzimit të propozim-aktakuzës. Për këtë arsye, siç është theksuar edhe më herët, dhe siç e ka theksuar edhe gjyqtari që e trajton lëndën, me fuqinë e ligjit masa e arrestit shtëpiak për këtë të akuzuar skadon më 13 tetor 2026. Krahas masës së arrestit shtëpiak, ndaj të akuzuarit është caktuar edhe masë shtesë e kujdesit, gjegjësisht sekuestrimi i përkohshëm i dokumentit të udhëtimit dhe ndalimi i lëshimit të dokumentit të udhëtimit ose dokumentit tjetër për kalimin e kufirit shtetëror, e cila do të vazhdojë të vlejë edhe pas skadimit të afatit ligjor prej 60 ditësh. Sa i përket kësaj mase të kujdesit, mbrojtja i ka dorëzuar gjykatës propozim, me të cilin, në përputhje me nenin 150 të Ligjit për procedurën penale, kërkon heqjen e saj duke caktuar garanci. Konkretisht, mbrojtja ka ofruar pasuri të paluajtshme në vlerë prej 335.707 euro si garanci se i akuzuari do të jetë në dispozicion të organeve të ndjekjes gjatë procedurës penale. Pas ofrimit të garancisë, është formuar lënda, e cila i është dërguar për mendim prokurorisë publike kompetente. Pas marrjes së mendimit, Këshilli Penal do të shqyrtojë propozimin dhe do ta informojë publikun”, informojnë nga Gjykata Themelore Penale, Shkup.

Edhe kryetarja e Gjykatës Penale, Daniela Dimovska, mbrëmë konfirmoi se ish-zëvendëskryeministri i parë, Artan Grubi, nga 13 tetor do të mbrohet në liri si i akuzuar në rastin “Lotaria Shtetërore”.

“E vetmja gjë që mund ta them me siguri është se, pavarësisht nga vendimi (i gjykatës), ai do ta presë atë në liri. Arrestit i Grubit i skadon afati më 13 tetor. Personi do ta ndjekë më tej procesin dhe do të mbrohet në liri”, tha Dimovska në një intervistë në një podkast.

Artan Grubi është i akuzuar në lëndën “Lotaria Shtetërore” për keqpërdorim të pozitës zyrtare dhe autorizimeve. Aktakuza kundër tij dhe shtatë personave të tjerë është ngritur më 13 gusht të vitit 2026. Grubi, në gjykimin është deklaruar i pafajshëm.

Ish-zëvendëskryeministri, pas më shumë se 14 muajsh i paarritshëm për organet e ndjekjes penale, u kthye në vend në shkurt të këtij viti dhe u arrestua në vendkalimin kufitar Bllacë.

Lajme

Nga 15 nëntori gjoba 45 euro për shoferët pa pajisje dimërore!

Nga 15 nëntori 2026, në Maqedoninë e Veriut hyn në fuqi detyrimi për pajisje dimërore në automjete. Shoferët që nuk respektojnë rregullat rrezikojnë gjobë prej 45 eurosh ose 25 pikë negative, sipas dispozitave ligjore.
Për automjetet deri në 3.500 kilogramë kërkohen goma dimërore në të gjitha rrotat, me thellësi minimale të profilit prej 4 mm. Si alternativë lejohen goma verore me profil të paktën 4 mm, por me zinxhirë bore për rrotat tërheqëse.
Për automjetet 4×4 dhe ato mbi 3.500 kilogramë, gomat dimërore duhet të kenë profil të paktën 6 mm, ndërsa përdorimi i gomave verore kërkon zinxhirë sipas kategorisë së automjetit.
Autobusët dhe kamionët që nuk mund të vendosin zinxhirë duhet të kenë goma dimërore në rrotat tërheqëse dhe pajisje ndihmëse.