Lajme

Ahmeti bënë të ditur formimin e “Komitetit të Veteranëve” të BDI-së

Kryetari i BDI-së, Ali Ahmeti, mori pjesë në Kuvendin Zgjedhor të Degës së Çairit, ku theksoi rëndësinë e unitetit, respektit dhe bashkëpunimit brenda organizatës politike. Ahmeti vlerësoi kontributin e Komitetit të Veteranëve, si dhe angazhimin e nëndegëve dhe këshillave vendorë në komunikimin me qytetarët. Ai u shpreh se forcimi i kauzës politike dhe ruajtja e unitetit kombëtar mund të arrihen përmes angazhimit të përbashkët dhe respektit të ndërsjellë.

Në margjina të këtij postimi, Ahmeti njoftoi për herë të parë, se është formuar “Komiteti i Veteranëve të BDI-së”, komitet i papërmendur deri tani, transmeton Lideri.mk.

“Sot pata kënaqësinë të marr pjesë në Kuvendin Zgjedhor të Degës së Çairit, një takim që rikonfirmoi forcën e organizimit tonë dhe vlerat mbi të cilat ndërtojmë rrugëtimin tonë politik. Besoj fuqishëm se marrëdhëniet ndërnjerëzore janë themeli i çdo suksesi. Respekti, solidariteti dhe bashkëpunimi mes nesh janë ato që na mbajnë të bashkuar dhe na bëjnë më të fortë përballë çdo sfide. Me respekt të veçantë vlerësoj rolin e Komitetit të Veteranëve, të cilët me kontributin, përvojën dhe sakrificën e tyre vazhdojnë të jenë frymëzim për brezat e rinj. Njëkohësisht, falënderoj nëndegët dhe këshillat vendorë, të cilët janë zemra e organizimit tonë dhe ura më e fortë e komunikimit me qytetarët. I frymëzuar nga porositë e sotshme, mbetem i bindur se vetëm përmes unitetit, respektit të ndërsjellë dhe angazhimit të përbashkët mund ta forcojmë kauzën tonë dhe ta ruajmë vlerën më të madhe që kemi, unitetin kombëtar. Së bashku vazhdojmë përpara, më të bashkuar dhe më të vendosur se kurrë”, ka shkruar Ahmeti.

Lajme

Nga 12 tetori “Qyteti i sigurt” do të zbatohet në Ohër, Dibër, Kërçovë dhe Strugë

Në SPB Ohër po përfundojnë përgatitjet për vënien në funksion të sistemit “Qyteti i Sigurt”, i cili nga 12 tetori do të nisë të funksionojë në të gjithë territorin e SPB Ohër, përkatësisht në Ohër, Strugë, Kërçovë dhe Dibër. Ministri Pançe Toshkovski, gjatë vizitës në Ohër, tha se në takime është diskutuar edhe për luftën kundër krimit dhe korrupsionit, tregtinë ilegale dhe shpërndarjen e drogës. Nga MPB-ja njoftojnë gjithashtu se FRONTEX-i për herë të parë do t’i zgjerojë aktivitetet edhe në kufirin perëndimor, ndërsa aktivitetet e përbashkëta pritet të nisin në fillim të vitit të ardhshëm.

Lajme

Lajm i mirë për shoferët shqiptarë në Gjermani

Ndryshimi i ri në rregulloren gjermane përfshin shqipen ndër gjuhët në të cilat mund të zhvillohet provimi për kualifikimin e shoferëve profesionistë, transmeton albinfo.ch

Shoferët profesionistë shqipfolës që jetojnë dhe punojnë në Gjermani mund ta zhvillojnë tashmë në gjuhën shqipe provimin për kualifikimin profesional të shoferëve, të njohur si “Kodi 95”.

Sipas njoftimit të ODA e.V. Hamburg – Organisation deutsch-albanischer Akademiker, ndryshimi është përcaktuar me rregulloren e re gjermane të datës 12 gusht 2026, e cila është publikuar më 17 gusht në Gazetën Zyrtare Federale të Gjermanisë.

Në dokumentin zyrtar, shqipja është përfshirë ndër gjuhët në të cilat mund të zhvillohet provimi, krahas gjermanishtes dhe gjuhëve të tjera të përcaktuara në rregullore.

Sipas ODA e.V. Hamburg, në këtë proces ka kontribuar edhe anëtari i Odës, Driton Krasniqi.

Mundësia e zhvillimit të provimit në gjuhën shqipe pritet të lehtësojë procesin e kualifikimit profesional për shoferët shqipfolës dhe t’u mundësojë atyre qasje më të lehtë në kërkesat profesionale për punësim në sektorin gjerman të transportit./Albinfo.ch

Lajme

Biletat shtrenjtohen, studentët kërkojnë subvencione për transportin

Shtrenjtimi i transportit ndërurban me autobus ka nxitur reagimin e organizatave studentore, të cilat kërkojnë subvencionimin e biletave për studentët që studiojnë jashtë vendbanimit.

Sipas tyre, vetëm udhëtimet Tetovë–Shkup ose Kumanovë–Shkup mund t’u kushtojnë studentëve rreth 6.000 denarë në muaj.

Ministrja e Arsimit, Vesna Janevska, tha se deri tani nuk kanë pranuar ndonjë iniciativë zyrtare nga studentët. Ajo theksoi se kërkesa do të shqyrtohet dhe se vendimi do të varet nga mundësitë buxhetore.