Lajme

Ministri izraelit i Sigurisë Kombëtare thotë se “i gjithë Libani duhet të digjet” pas vrasjes së ushtarëve

Ministri izraelit i Sigurisë Kombëtare i ekstremit të djathtë, Itamar Ben-Gvir, bëri thirrje për intensifikimin e sulmeve në Liban pasi ushtria izraelite tha se katër ushtarë u vranë në luftime në jug, transmeton Anadolu.

Në një postim në platformën sociale të kompanisë amerikane X, Ben-Gvir tha se Izraeli duhet të përgjigjet me forcë pavarësisht presionit ndërkombëtar.

“Me gjithë respektin për amerikanët, Izraeli duhet t’ia bëjë të qartë gjithë botës se gjaku i djemve tanë dhe siguria e qytetarëve tanë nuk janë të negociueshme. I gjithë Libani duhet të digjet”, shkroi ai.

“Detyra jonë supreme është të mbrojmë qytetarët e Izraelit dhe ushtarët e IDF-së (ushtrisë), dhe ky angazhim ka përparësi ndaj çdo konsiderate tjetër”, shtoi ai.

Ben-Gvir tha se ia kishte përcjellë qëndrimin e tij drejtpërdrejt kryeministrit Benjamin Netanyahu. “I thashë kryeministrit, madje edhe në takimet tona private: Për çdo lot të një nëne izraelite, një mijë nëna libaneze duhet të qajnë”, tha ai

Duke bërë thirrje për një sulm më të ashpër, ministri i ekstremit të djathtë shtoi se në Lindjen e Mesme ishte e nevojshme “të tërbohesh. Të zhdukësh. Të shtypësh terrorin”.

Komentet erdhën pasi ushtria izraelite njoftoi se katër ushtarë ishin vrarë gjatë përleshjeve në jug të Libanit, mes tensioneve të vazhdueshme përgjatë kufirit Izrael-Liban.

Pavarësisht një marrëveshjeje SHBA-Iran që raportohej se përfshinte dispozita për t’i dhënë fund armiqësive në Liban, sulmet izraelite vazhduan pas mesnatës.

Më herët të premten, të paktën 24 persona u vranë dhe disa të tjerë u plagosën në një seri sulmesh izraelite në jug të Libanit, sipas Agjencisë Kombëtare të Lajmeve të Libanit (NNA).

Agjencia tha se sulmet goditën shtëpi të banuara në Al-Sharqiyah, Harouf dhe Kfar Sir në distriktin Nabatieh, duke lënë gjithashtu disa persona të zhdukur.

Sipas shifrave më të fundit zyrtare, ofensiva ushtarake e Izraelit në Liban, e cila filloi më 2 mars, ka vrarë 3.912 persona, ka plagosur 11.873 të tjerë dhe ka zhvendosur më shumë se një milion banorë.

Gjatë fushatës së fundit ushtarake, forcat izraelite avancuan më shumë se 10 kilometra brenda territorit libanez.

Lajme

Vrasja në Duqanxhik të Shkupit, MPB jep detaje

Dy sulmues me motoçikletë hapën zjarr ndaj një grupi prej pesë banorësh të Shkupit, duke goditur 26-vjeçarin A.M., i cili më vonë ndërroi jetë në spital nga plagët e marra.

Të shtënat u raportuan më 6 shtator rreth orës 23:30, pranë kryqëzimit të rrugëve “Prohor Pcinski” dhe Vojdan Çernodrinski” në Shkup.
Nga MPB thonë se D.G. (29), A.Xh. (24), K.B. (36), E.B. (25) dhe A.M. (26), të gjithë nga Shkupi, po qëndronin para një dritareje biznesi në atë moment.

Një një motoçikletë që ishin dy persona ndaloi përpara tyre, pas së cilës u qëllua me armë zjarri ndaj grupit. Sulmuesit ikën menjëherë.

Një nga plumbat goditi A.M., i cili u dërgua me ambulancë në Kompleksin e Klinikës Nënë Tereza, ku dhe ndërroi jetë.

Nga policia ende nuk kanë njoftuar për identitetin e sulmuesve, dhe arsyet incidentit.

Lajme

Një 27-vjeçar nga Maqedonia qëllohet për vdekje në Berlin, autorët në arrati

Në orët e para të mëngjesit të së hënës, në rrugën Sonnenallee në Neukölln në Berlin të Gjermanisë u qëllua për vdekje një 27 vjeçar nga Maqedonia e Veriut, raportuan mediat gjermane.

Sipas policisë, ngjarja ndodhi rreth orës 02:40 në kryqëzimin e rrugëve Planetenstraße dhe Sonnenallee, ndërsa i vdekur mbeti një shtetas i Maqedonisë së Veriut i moshës 27 vjeçare.

Policia e Berlinit njoftoi se, pavarësisht përpjekjeve të menjëhershme për reanimim personi i plagosur ndërroi jetë në vendngjarje.

Mbi viktimën u qëlluan gjashtë plumba njoftoi policia gjermane, ndërsa autori apo autorët e e sulmit dyshohet se janë larguar me një automjet të markës Mercedes.

Autoritetet e sigurisë po hetojnë nëse në ngjarje kanë qenë të përfshirë disa persona dhe nëse rasti ka lidhje me krimin e organizuar. Me urdhër të Prokurorisë, ka nisur hetimet.

Lajme

Përparim Bajrami në arrati, Gjykata vendosi ta gjykojë në mungesë

Për shkak se i akuzuari Përparim Bajrami vazhdon të jetë i pakapshëm për organet e përndjekjes, Gjykata vendosi që ta gjykojë në mungesë.

Familjarët e ish drejtorit të Lotarisë Shtetërore, Bajrami, kanë angazhuar Avokatin Elenko Millanov, i cili dorëzoi te gjyqtarja listën me prova. Bajrami është i akuzuari i parë. /Alsat.mk