Drejtori i Drejtorisë për Udhëheqjen e Librave Amë, Faton Fazliu, ka bërë të ditur se gjatë një vizite zyrtare në Bruksel ka zhvilluar një takim me znj. Christine Pelfrenedear, Drejtoreshë e Departamentit të Çështjeve Civile të Qytetit të Brukselit.

Sipas Fazliut, takimi është fokusuar në shkëmbimin e përvojave lidhur me procesin e digjitalizimit të regjistrave civilë, dokumentet elektronike dhe përmirësimin e shërbimeve publike për qytetarët.

“Diskutuam për përvojat belge në digjitalizimin e regjistrave civilë, dokumentet elektronike dhe shërbimet moderne për qytetarët”, ka deklaruar Fazliu.

Ai theksoi se takime të tilla janë të rëndësishme për avancimin e reformave në administratën publike dhe për përvetësimin e praktikave më të mira ndërkombëtare.

“Takime të tilla janë të vlefshme për shkëmbimin e praktikave më të mira dhe avancimin e reformave në administratën publike”, u shpreh ai.

Në fund, Fazliu ka shprehur mirënjohje për mikpritjen dhe bashkëpunimin gjatë vizitës në Bruksel.

Katër ditë nga zhdukja dhe pas tri ditë kërkimesh intensive është gjetur kufoma e vogëlushit pesëvjeçar shqiptar Tian Rahimi. Këtë njoftim e dhanë për albinfo.ch burime nga vullnetarët që ishin angazhuar në kërkim të tij.

Siç është raportuar tashmë, Tiani pesëvjeçar, me prejardhje shqiptare nga Maqedonia e Veriut bashkë me familjen e tij ishin përfshirë në një aksident në lumin Reuss pranë lokalitetit Mühlau të shtunën, kur ishin në një gomone. Prindërit dhe motra e tij shtatëvjeçare arritën të notonin deri në breg, transmeton albinfo.ch. Pesëvjeçari është zhdukur që atëherë.

Ekipet e shpëtimit kanë kërkuar vazhdimisht djalin me një kontingjent të madh personeli të angazhuar. Përveç patrullave të policisë, në kërkim morën pjesë edhe dronë, anije, një helikopter shpëtimi, zjarrfikësit dhe zhytës të policisë.

Në vendbanimin Rasadnik kanë nisur aktivitetet për asfaltimin e disa rrugëve, si pjesë e projekteve për përmirësimin e infrastrukturës lokale dhe kushteve të jetesës për banorët.

Aktualisht po shtrohet asfalt i ri në rrugët “Angel Mojskovski”, “Aleksandar Grliçkov” dhe “Ljubinka Basotava”, me çka po vazhdon rinovimi i rrjetit rrugor në këtë pjesë të komunës.

Më herët janë realizuar edhe rikonstruksione në rrugën kryesore të lagjes, si dhe në rrugët 21 dhe 2, të cilat kanë marrë një pamje të re dhe më të përmirësuar.

Nga vetëqeverisja lokale theksojnë se investimet në infrastrukturë do të vazhdojnë edhe në zonat ku për vite me radhë nuk ka pasur investime të rëndësishme, me qëllim zhvillimin e barabartë dhe krijimin e kushteve më të mira për të gjithë banorët.

Me punimet e reja ndërtimore pritet të rritet siguria në komunikacion, të përmirësohet qasja dhe të ofrohet një përditshmëri më cilësore për qytetarët e Rasadnikut.

Nga autoritetet paralajmërojnë se projektet infrastrukturore do të vazhdojnë edhe në periudhën e ardhshme, si pjesë e planit për modernizimin dhe zhvillimin e komunës së Butelit.