Me rastin e 4 Korrikut , Ditës së Pavarësisë së Shteteve të Bashkuara të Amerikës dhe 250-vjetorit të Shpalljes së Pavarësisë, Shoqata “Jehona e Malësisë” shpreh urimet më të përzemërta për popullin amerikan, si dhe për të gjithë bashkatdhetarët shqiptarë që jetojnë dhe veprojnë në Shtetet e Bashkuara.

Kjo ditë e shënuar përkujton lindjen e një kombi të ndërtuar mbi idealet e lirisë, demokracisë, barazisë dhe mundësive për të gjithë. Për shqiptarët, Amerika ka qenë dhe mbetet një vend shprese, mikpritjeje dhe mundësish, ku breza të tërë kanë ndërtuar jetën e tyre me punë, përkushtim dhe ndershmëri, duke ruajtur njëkohësisht gjuhën, kulturën dhe traditat shqiptare.

Shoqata “Jehona e Malësisë” vlerëson miqësinë e qëndrueshme ndërmjet popullit shqiptar dhe atij amerikan, si dhe kontributin e jashtëzakonshëm të komunitetit shqiptaro-amerikan në forcimin e kësaj miqësie dhe në promovimin e vlerave tona kombëtare.
Në këtë ditë festive, urojmë që idealet e lirisë, paqes dhe demokracisë të vazhdojnë të udhëheqin brezat e sotëm dhe të ardhshëm.

Gëzuar 4 Korrikun – Ditën e Pavarësisë së Shteteve të Bashkuara të Amerikës!
Zoti e bekoftë Amerikën, popullin amerikan dhe kombin shqiptar!
Shoqata “Jehona e Malësisë”

Ja postimi plotë:

🇺🇸 Gëzuar 4 Korrikun! 🇺🇸

Sot, me krenari dhe mirënjohje, festojmë Ditën e Pavarësisë së Shteteve të Bashkuara të Amerikës dhe 250-vjetorin e këtij kombi të madh, të ndërtuar mbi idealet e lirisë, demokracisë dhe mundësive për të gjithë.

Amerika ka qenë një vend shprese dhe mundësish për breza të tërë shqiptarësh, të cilët kanë gjetur këtu një atdhe të dytë, duke kontribuar me punë, përkushtim dhe dashuri për këtë vend, pa harruar kurrë rrënjët e tyre.

Në këtë ditë të shënuar, nderojmë vlerat që na bashkojnë dhe shprehim mirënjohjen tonë për vendin që na ka dhënë mundësinë të jetojmë të lirë, të ruajmë identitetin tonë dhe të ndërtojmë një të ardhme më të mirë për familjet tona.

Nga Jehona e Malësisë, urojmë të gjithë anëtarët, miqtë dhe bashkatdhetarët tanë:

Gëzuar Ditën e Pavarësisë së Shteteve të Bashkuara të Amerikës! 🇺🇸

Zoti e bekoftë Amerikën dhe komunitetin tonë! 🇦🇱🇦🇱🇦🇱

Kryetar i shoqatës “Jehona e Malësisë”,
Zef Berishaj

Çmimet e pasurive të paluajtshme në Shkup vazhdojnë të rriten, por me një ritëm më të ngadalshëm krahasuar me periudhën e mëparshme.

Banka Popullore ka publikuar të dhënat më të fundit për çmimet e banesave në tremujorin e dytë të vitit 2026. Sipas këtyre të dhënave, gjatë tremujorit të dytë çmimet e pasurive të paluajtshme janë rritur me 13,3% në baza vjetore, ndërsa krahasuar me tremujorin e parë, rritja është 5,5%.

“Indeksi i çmimeve të banesave, i cili i referohet vetëm territorit të qytetit të Shkupit dhe llogaritet mbi bazën e çmimeve të shpallura për shitje, e jo të çmimeve të realizuara në transaksione, në tremujorin e dytë të vitit 2026 shënon rritje.

Në baza tremujore, çmimet e pasurive të paluajtshme u rritën me 5,5%, ndërsa rritja vjetore vazhdon të ngadalësohet dhe arrin në 13,3%, kundrejt 16,6% në tremujorin paraprak”, thuhet në njoftimin e Bankës Popullore.(INA)

Komuna e Çairit ka reaguar ndaj deklaratave të këshilltarëve komunalë të opozitës, duke theksuar se pretendimet për mungesën e një komisioni për evidentimin dhe vlerësimin e dëmeve nga reshjet e fundit nuk qëndrojnë.

Sipas Komunës, Komisioni për vlerësimin dhe përcaktimin e lartësisë së dëmeve nga fatkeqësitë natyrore dhe fatkeqësitë e tjera është formuar me vendim të Këshillit të Komunës që në muajin maj, në përputhje me legjislacionin në fuqi.

“Nuk presim të ndodhin fatkeqësi për të reaguar, por ndërtojmë mekanizma institucionalë paraprakisht për të siguruar gatishmëri dhe reagim të shpejtë”, thuhet në reagimin e Komunës.

Komuna njofton se menjëherë pas reshjeve të dendura, ekipet komunale, Shtabi i Krizave, ndërmarrjet publike dhe institucionet kompetente kanë dalë në terren dhe kanë ndërhyrë në të gjitha lokacionet ku është paraqitur nevoja.

Paralelisht, sipas reagimit, ka nisur evidentimi i dëmeve, ndërsa komisioni do të vazhdojë procedurat e vlerësimit dhe përpunimit të tyre në përputhje me metodologjinë dhe afatet e përcaktuara me ligj.

Komuna thekson se kërkesa e opozitës për formimin e komisionit është e pabazuar, pasi ai tashmë ekziston dhe është miratuar nga vetë Këshilli Komunal, ku kanë marrë pjesë edhe këshilltarët e opozitës.

Në fund, Komuna e Çairit rithekson se mbetet e përkushtuar për trajtimin me seriozitet, profesionalizëm dhe transparencë të çdo rasti të paraqitur nga qytetarët, ndërsa kompensimi i dëmeve do të realizohet sipas procedurave ligjore dhe kompetencave institucionale. Gjithashtu, u bën thirrje subjekteve politike që në situata që prekin qytetarët të kontribuojnë me informim të saktë dhe konstruktiv, duke shmangur krijimin e perceptimeve të pasakta.