Lajme

BDI: Të shtunën nis rezistenca qytetare për mbrojtjen e Marrëveshjes së Ohrit

BDI ka bërë sot thirrje zyrtare për pjesëmarrje në marshin e dytë protestues, i cili do të mbahet të shtunën në Tetovë, si reagim ndaj vendimit të Gjykatës Kushtetuese për shfuqizimin e vendimit për emërtimin e rrugëve dhe rikthimin e emrave të vjetër.

Në një konferencë për media, partia theksoi se protesta do të jetë paqësore dhe qytetare, me qëllim mbrojtjen e Marrëveshjes së Ohrit, rendit kushtetues dhe sigurisë juridike.

Sipas BDI-së, vendimi i Gjykatës Kushtetuese për emërtimet e rrugëve në Tetovë është shkaku i drejtpërdrejtë i mobilizimit qytetar, por shqetësimet, siç thuhet në reagim, janë më të gjera dhe lidhen me atë që partia e konsideron dobësim të mekanizmave që burojnë nga Marrëveshja e Ohrit.

BDI rikujton se Këshilli i Komunës së Tetovës e kishte miratuar vendimin për emërtimin e rrugëve në përputhje me ligjin dhe me shumicë të dyfishtë, ndërsa Qeveria, sipas tyre, nuk kishte reaguar brenda afatit ligjor, gjë që, sipas Ligjit për Vetëqeverisje Lokale, nënkupton miratim të aktit. Partia thekson se i njëjti vendim ishte miratuar edhe një herë për të shmangur dilemat procedurale dhe se edhe atëherë Qeveria nuk kishte ndërmarrë veprime.

Sipas BDI-së, akti kishte qenë pjesë e rendit juridik për rreth 20 vjet, ndërsa vendimi i fundit i Gjykatës Kushtetuese krijon një precedent që ngre pikëpyetje për sigurinë juridike dhe mënyrën e trajtimit të çështjeve që lidhen me Marrëveshjen e Ohrit.

Partia ka kritikuar edhe Komunën e Tetovës, duke theksuar se gjatë procedurës para Gjykatës Kushtetuese nuk iu përgjigj kërkesës për sqarime dhe dokumentacion, duke mos e mbrojtur juridikisht vendimin e saj.

Në deklaratë thuhet gjithashtu se vendimet e ardhshme të Gjykatës Kushtetuese, përfshirë atë që pritet për Ligjin për Përdorimin e Gjuhëve, duhet të bazohen në Kushtetutë, Marrëveshjen e Ohrit dhe parimin e sigurisë juridike.

BDI u ka bërë thirrje qytetarëve që t’i bashkohen marshit të së shtunës në mënyrë paqësore dhe dinjitoze, duke e cilësuar protestën si një akt në mbrojtje të rendit kushtetues, bashkëjetesës ndëretnike dhe orientimit euroatlantik të vendit.

Lajme

Qoku, Azizi dhe Murtezani përballen me ndalesë për hyrje në Shqipëri

Disa zyrtarë nga Maqedonia e Veriut janë përballur me ndalesë për hyrje në Shqipëri, raporton TV21.

Bëhet fjalë për koordinatorin e grupit parlamentar të VLEN-it, deputetin Bekim Qoku, deputetin Adnan Azizi dhe Hasim Murtezanin, zëvendëssekretar i përgjithshëm në Qeverinë e Maqedonisë së Veriut.

Sipas tyre, ngjarja ka ndodhur sot në pikën kufitare Qafë Thanë, ku ata tentuan të kalojnë kufirin me pasaporta diplomatike. Zyrtarët pretendojnë se janë mbajtur për rreth një orë në pritje, pa marrë sqarime.

Pas një ore, një pjesëtar i policisë kufitare u ka bërë të ditur se tre prej tyre mund të vazhdojnë udhëtimin, ndërsa personi i katërt që ishte me ta nuk lejohej të kalonte. Në shenjë revolte, ata vendosën të kthehen, ndërsa më pas, sipas deklarimeve të tyre, u është komunikuar se kanë ndalesë hyrjeje në Shqipëri.Sipas burimeve tona, kjo vjen pasi të njëjtit dyshohet se kanë qenë të përfshirë në organizimin e protestave në Tiranë, respektivisht dyshohet se ishin angazhuar në të ashtuquajturin “Revolucioni Flamingo”.
Kujtojmë se “Revolucioni Flamingo” është një lëvizja qytetare në Shqipëri, e cila nisi në fund të majit 2026 si protestë kundër ndërhyrjeve në zonën e mbrojtur të Laguna e Nartës, Zvërnec dhe projekteve të zhvillimit në Ishulli i Sazanit, por më pas u shndërrua në një lëvizje më të gjerë kundër qeverisë së kryeministrit të Shqipërisë, Edi Rama.

Lajme

Shqiptari që këshillon Erdoganin pozon krah Trumpit në Ankara

Sabri Demiri, shqiptari që është këshilltar i presidentit turk, Rexhep Tayyip Erdogan, është takuar në Ankara me presidentin e Shteteve të Bashkuara të Amerikës, Donald Trump.

Ai ka ndarë në rrjetet sociale një fotografi me liderin më të fuqishëm të botës.

Kjo fotografi është shkrepur para Pallatit Presidencial në Ankara.

Ndryshe, Trump po merr pjesë në samitin e NATO-s që po mbahet në kryeqytetin turk dhe ka pasur një takim të ngrohtë me liderin e Turqisë, Erdogan. /Klankosova.tv

Lajme

Kujdes, makinat me radarë po masin shpejtësinë në autostradat e Maqedonisë!

Shoferët që tranzitojnë nëpër Maqedoninë e Veriut, pra shtetas të huaj, do të përfshihen në sistemin e kamerave “Qyteti i Sigurt” (Safe City), por derisa të përfundojë përmirësimi i plotë i sistemit, dënimet nuk do t’u arrijnë në shtëpi.

Deri atëherë, të gjithë ata që ngasin shpejt nëpër autostradat e vendit me automjete me targa të huaja, do të ndëshkohen vetëm nga zyrtarët policorë me makina civile të pajisura me radarë (të njohur si “përgjuesit”), të cilët sipas MPB-së janë vazhdimisht prezentë në Korridorin 8 dhe 10, përcjell INA.

“Në lidhje me automjetet për të cilat pyetni, të ashtuquajturit ‘përgjues’, ju njoftojmë se të njëjtit janë vazhdimisht prezentë në korridoret 8 dhe 10 me qëllim të sanksionimit të shoferëve që shkelin rregullat dhe rregulloret e trafikut,” thonë nga MPB.

Më parë, Ministri i Brendshëm, Pançe Toshkovski, u bëri thirrje të gjithë atyre që tranzitojnë nëpër Korridorin 8 dhe 10 se kamerat e “Qytetit të Sigurt” janë funksionale, punojnë dhe regjistrojnë shkeljet e rregullave të komunikacionit.

Toshkovski deklaroi se pas qytetarëve të vendit, së shpejti edhe shtetasit e huaj dhe mërgimtarët që kalojnë tranzit do të marrin gjoba për shkeljet e bëra. Ai bëri thirrje për respektim të rregullave, duke theksuar se çdo jetë e shpëtuar është një gjest i madh. (INA)