Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!

I dyshuari ka marrë 30 ditë paraburgim. Ai është kapur në flagrancë gjatë dorëzimit të 500 eurove, si pjesë e shumës prej 1.500 eurosh që kishte kërkuar, të cilat paraprakisht ishin shënuar, njoftoi Prokuroria.

Një prokuror publik nga Prokuroria Themelore Publike për Ndjekjen e Krimit të Organizuar dhe Korrupsionit, duke vepruar pas kallëzimit penal të paraqitur nga Njësia për Korrupsion pranë Byrosë për Siguri Publike, ka nxjerrë urdhër për zhvillimin e procedurës hetimore ndaj një personi të punësuar në Shërbimin për Çështje të Përgjithshme dhe të Përbashkëta të Qeverisë së Republikës së Maqedonisë së Veriut.

Ekziston dyshimi i bazuar se i dyshuari ka kryer veprën penale “Marrja e shpërblimit për ndikim të kundërligjshëm”.

Procedura është iniciuar pas kallëzimit të një qytetari, nga i cili i dyshuari, gjatë periudhës 24 korrik – 4 shtator 2026, kishte kërkuar 1.500 euro për të shfrytëzuar ndikimin e tij të pretenduar.

I dyshuari, i cili kishte punuar si shofer i një zyrtari të lartë qeveritar, i kishte premtuar të dëmtuarit se do të ndërmjetësonte te zyrtarët në Qytetin e Shkupit, lidhur me punësimin pas shpalljes së konkursit për pranimin e zjarrfikësve. (Plusinfo.mk)

Kryetari i Komunës së Gostivarit, Valbon Limani, i është përgjigjur deklaratave të Bilall Kasamit lidhur me zërat për një përfshirje të mundshme të tij në VLEN.

Limani ka mohuar se ka bisedime apo negociata për kalimin e tij në VLEN, duke theksuar se bashkëpunimi me kolegët që ushtrojnë të njëjtin funksion do të vazhdojë të jetë në nivelin e duhur.

“Bashkëpunimi dhe respekti me të gjithë kolegët që bartin të njëjtin funksion do të jenë gjithmonë në nivelin e duhur. Sa u përket çështjeve të tjera, përveç bisedave kolegiale që lidhen me bashkëpunimin ndërkomunal, në kuadër të Rajonit të Pollogut apo programeve qeveritare, nuk ka asnjë lloj bisede apo negocimi tjetër në vazhdim”, ka deklaruar Limani.

Ai ka theksuar se vazhdon të jetë pjesë e Aleancës për Shqiptarët, duke e cilësuar atë si parti autonome.

“Jam anëtar i Aleancës për Shqiptarët, e cila mbetet parti autonome, dhe nuk ekziston asnjë zhvillim që do të sugjeronte bisedime apo rikonfigurime të skenës politike”, është shprehur Limani.

Limani ka bërë të ditur gjithashtu se fokusi i tij aktual mbetet te përgatitjet për Kongresin e Aleancës për Shqiptarët dhe puna në Komunën e Gostivarit.

“Në të njëjtën kohë, vazhdojmë përgatitjet për Kongresin e Aleancës për Shqiptarët, i cili do të mbahet së shpejti. Fokusi im mbetet në mbarëvajtjen e punëve në Komunën e Gostivarit, realizimin e projekteve dhe shërbimin ndaj qytetarëve, larg spekulimeve mediatike që nuk kanë mbështetje në fakte”, ka përfunduar Limani.