Lajme

Rriten çmimet e derivateve nga mesnata – ja sa do të kushtojnë benzina dhe dizeli

Nga mesnata, përkatësisht pas orës 00:00 të 25 gushtit, në Maqedoninë e Veriut hyjnë në fuqi çmimet e reja të derivateve të naftës, të përcaktuara nga Komisioni Rregullator i Energjetikës.

Sipas vendimit të ri, Eurosuper BS-95 do të shitet me çmim maksimal prej 93 denarë për litër, ndërsa Eurosuper BS-98 do të kushtojë 95 denarë për litër.

Rritje më e ndjeshme vërehet te nafta. Eurodizeli do të shtrenjtohet në 101,5 denarë për litër, nga 98 denarë sa ishte çmimi paraprak.

Me çmim më të lartë do të shitet edhe vaji ekstra i lehtë EL-1, i cili nga 98,5 denarë rritet në 100,5 denarë për litër.

Ndryshim ka edhe te mazuti. Çmimi i Mazutit M-1 HC rritet në 45,576 denarë për kilogram.

Krahasimi me çmimet paraprake:
Eurosuper BS-95: nga 91,5 → 93 denarë (+1,5 denarë/litër)
Eurosuper BS-98: nga 93,5 → 95 denarë (+1,5 denarë/litër)
Eurodizel: nga 98 → 101,5 denarë (+3,5 denarë/litër)
EL-1: nga 98,5 → 100,5 denarë (+2 denarë/litër)
Mazuti M-1 HC: nga 43,726 → 45,576 denarë/kg (+1,85 denarë/kg)
Kështu, rritjen më të madhe në vlerë absolute e pëson dizeli, me 3,5 denarë për litër, ndërsa përqindja më e lartë e rritjes është te mazuti, rreth 4,2 për qind.

Çmimet e mëparshme të derivateve ishin vendosur nga RKE më 17 gusht, kur dizeli u rrit me 6,5 denarë, ndërsa benzina BS-95 dhe BS-98 u rritën me nga 4,5 denarë për litër.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.