Lajme

Fasulja e Tetovës arrin çmime astronomike, kilogrami shkon deri në 700 denarë

Fasulja e Tetovës po arrin çmime rekord, ndërsa prodhimi i saj në fushat e Pollogut po zvogëlohet vit pas viti. Në fillim të korrjes së sivjetshme, një kilogram fasule autentike të Tetovës shitet nga 600 deri në 700 denarë, ndërsa fasulja e korrjes së vitit të kaluar në tregun e Tetovës shitet për rreth 500 denarë kilogrami.

Edhe pse fasulja e Tetovës prej dekadash është një nga produktet më të njohura bujqësore të Tetovës dhe Fushës së Pollogut, sot ajo gjendet gjithnjë e më rrallë në tregun e qytetit. Shkak për këtë janë temperaturat e larta, thatësira, mungesa e ujit për ujitje, por edhe interesimi gjithnjë e më i vogël i të rinjve për bujqësinë.

Uzeini, një shitës prej shumë vitesh në tregun e gjelbër të Tetovës, i cili më shumë se 40 vjet shet fasule, thotë se nuk mban mend që çmimi i këtij produkti të ketë qenë ndonjëherë kaq i lartë.

“Unë më shumë se 40 vjet shes fasule në tregun e Tetovës dhe çmimi i saj asnjëherë nuk ka qenë kaq i lartë në krahasim me produktet e tjera. Fasulja e korrjes së vitit të kaluar, po flas për fasulen origjinale të Tetovës, tani shitet 500 denarë, ndërsa fasulja që tani ka filluar të mblidhet më ofrohet me çmim prej 600 deri në 700 denarë për kilogram. Kjo ndodh sepse ka gjithnjë e më pak fasule të Tetovës për shkak të motit të nxehtë, por edhe sepse nuk ka kush ta kultivojë. Të rinjtë nuk duan të punojnë në ara, ndaj kanë mbetur vetëm njerëzit më të moshuar që e mbjellin, dhe zakonisht prodhojnë vetëm për nevojat e tyre, ndërsa shumë pak për shitje”, thotë Uzeini.

” “

Ai jep edhe këshilla se si konsumatorët mund ta dallojnë fasulen autentike të Tetovës nga ajo e importuar që shitet me këtë emër.

“Po, në treg mund të shihni në disa vende thasë me fasule ku shkruan se është fasule e Tetovës. Por nëse është vërtet ashtu, mund të kontrollohet shumë lehtë. Futeni dorën në thes, përzieni pak fasulet dhe kur ta nxirrni dorën, nëse në të ka diçka si pluhur i bardhë, atëherë, sipas meje, nuk është fasule e Tetovës. Fasulja e Tetovës nuk krijon një pluhur të tillë të bardhë. Ajo është e pastër dhe e çelët dhe, sado që ta përzieni në thes, dora do t’ju mbetet e pastër”, këshillon Uzeini.

Deri disa dekada më parë, fasulja e Tetovës ishte një nga produktet më të rëndësishme bujqësore dhe eksportuese të Fushës së Pollogut. Fasulja e Tetovës ushqente të gjithë ish-Jugosllavinë, ndërsa dërgohej edhe për eksport jashtë vendit.

Sot prodhohen sasi minimale dhe ekziston rreziku që fasulja e Tetovës të zhduket plotësisht nga arat dhe tryezat tona.

Bujqit thonë se problemet më të mëdha vijnë nga kushtet e vështira klimatike, veçanërisht temperaturat jashtëzakonisht të larta dhe thatësira, por ankohen edhe për mungesën e fuqisë punëtore. Të rinjtë, thonë ata, nuk janë më të interesuar të merren me bujqësi.

Abdulla Muaremi nga fshati Tearcë tregon se këtë vit ka mbjellë shumë më pak fasule për shkak të thatësirës dhe problemeve me ujitjen.

“Çdo vit kam mbjellë nga 3-4 dekarë me fasule, por tani mezi mbolla 2 dekarë për shkak të thatësirës së madhe. Për shkak të verave jashtëzakonisht të nxehta, tani fasulja duhet të ujitet deri në shtatë herë që të arrish të shpëtosh diçka nga rendimenti. Por edhe kjo vështirë realizohet, sepse kanali për ujitje është i mbyllur dhe nuk ka radhë për përdorimin e ujit. Më parë mjaftonte ta ujisnim fasulen vetëm dy herë dhe merrja 300 deri në 400 kilogramë për dekar, ndërsa tani mezi nxora 300 kilogramë nga 2 dekarë”, thotë Muaremi.

Sipas tij, numri i prodhuesve të fasules po zvogëlohet çdo vit, ndërsa mungesa e fuqisë punëtore po bëhet problem gjithnjë e më i madh.

“Gjithnjë e më shumë po zvogëlohet numri i prodhuesve të fasules, ndërsa nuk ka kush të punojë. Të rinjtë nuk duan të merren me bujqësi, e aq më pak me kultivimin e fasules”, thekson Muaremi.

Kështu, ndërsa çmimi i fasules së Tetovës ka arritur deri në 700 denarë për kilogram, prodhimi i saj po shkon drejt minimumit. Thatësira, mungesa e ujit dhe largimi i të rinjve nga bujqësia po kërcënojnë një prej produkteve më të njohura tradicionale të Tetovës, i cili dikur prodhohej në sasi të mëdha dhe eksportohej edhe jashtë vendit.

Lajme

Javën e ardhshme ulen çmimet e derivateve

Javën që vjen pritet ulje e vogël e çmimeve të derivative pasi në bursat botërore, një fuçi naftë është ulur për 3 dollarë, përkatësisht shënon 99,25 dollarë për fuçi. Përskaj kësaj siç pohoi kryeministri Hristijan Mickoski, Qeveria është në bisedime me furnizuesin e derivateve OKTA, që përskaj lirimit aktual të naftës për dy denarë, të ketë lirim shtesë periudhën që vijon. Sipas Mickoskit, Maqedonia e Veriut vazhdon të ketë çmimet më të ulëta të derivateve në rajon por ndoshta edhe në Evropë.

Pres sipas analizave të bursave si lëvizin nga java e kaluar, të kemi ulje të çmimit të dizelit dhe benzinës javën e ardhshme sepse në Qeveri këtë e analizojmë dhe e ndjekim. Por këtë do ta thotë Komisioni Rregullator për Energjetikë. Negociojmë me furnizuesin më të madh për derivate OKTA për një lirim shtesë, me çka do të jemi shtet me çmim më të ulët të derivateve në rajon por ndoshta edhe në Evropë.” Tha Hristijan Mickoski – Kryeministër

Ulja e çmimeve të derivateve mund të vijë edhe nga vendimi i djeshëm i anëtarëve të G7 të cilët vendosën të hapin rezervat e tyre të derivateve, përkatësisht 100 milion fuçi nafte. Kjo sipas presidentit francez Emanuel Makron, do të ndihmojë zbutjen e rritjes së çmimeve. Gjithashtu anëtaret e G7tës, janë pajtuar se nuk do të kufizojnë apo ndalojnë eksportimin e naftës mes vete. Megjithatë sipas ekspertëve, kjo paraqet një zgjidhje të përkohshme dhe nuk e zgjidhë problemin në periudhë afatgjate.

Ndonëse jemi në prag të sezonit të ngrohjes, kryeministri njoftoi se shteti është i përgatitur edhe përskaj krizës energjetike që ka kapluar kryesisht Evropën.

” “

Ne absolutisht mund të them se jemi të përgatitur. Termo blloqet në Manastir dhe Kërçovë po përfundojnë me rinovime apo do të përfundojnë deri në fund të muajit. Po përgatiten të gjitha resurset që TEC Oslomej dhe Manastir t’i përgjigjen sfidave. Hidro potenciali është diku 40% që paraqet mjaftueshëm për këtë periudhë të vitit.” Deklaroi Hristijan Mickoski – Kryeministër.

Mickoski gjithashtu theksoi se rishkimi i paralajmëruar i buxhetit do të ndodh nga mesi i muajit tetor./Alsat.mk

Lajme

Eli Fara më në fund del me reagimin e saj publik: Do vazhdoj me kokën lartë!

Këngëtarja e njohur Eli Fara ka reaguar këtë të shtunë pas publikimit të videove intime me kompozitorin Adrian Hila në rrjetet sociale, të cilat kanë qarkulluar ditët e fundit.

Në një reagim në rrjetin social Instagram, këngëtarja shprehet se është e lënduar, duke theksuar se nuk ka arsye të turpërohet. Ndërkohë, thekson se turpi u përket atyre që kanë filmuar ato video.

Sakaq, ajo ka theksuar se këtë rast do t’ia lërë në dorë drejtësisë.

Kam kaluar një jetë në skenë, duke ndarë me publikun këngën dhe dashurine për artin. Sot po përjetoj një dhimbje që nuk ia uroj asnjë gruaje: cenimin e privatësisë dhe përballjen me giykime e fyerje që prekin edhe familjen time.

Në këtë shoqëri, grave u kërkohet shpesh të mbajnë mbi supe edhe turpin e veprimeve që kryhen kundër tyre. U cenojnë privatësinë dhe pastaj u kërkojnë të japin llogari. I lëndojnë dhe pastaj i gjykojnë për mënyrën si e përballojnë dhimbjen. Asnjë grua nuk duhet të kalojë nëpër këtë poshtërim. Sot po e përjetoj vet sa e rëndë është të shohësh jetën tënde private te kthyer në spektakël dhe te ndiesh se, për disa njerëz, çdo gjë që ke ndërtuar vlen më pak se një moment intim.

Jam e lënduar, por nuk kam arsye të turpërohem. Turpi u përket atyre që filmojnë, publikojnë dhe shpërndajnë momente private pa dijeninë dhe pëlqimin e një njeriu. Intimiteti i një gruaje nuk është leje për ta poshtëruar.

Të qenit artiste nuk ma heq të drejtën për privatësi dhe dinjitet. Këtë të drejtë e ka çdo grua, pavarësisht emrit, profesionit apo zgjedhjeve të saj. Këtë çështje do t’ia lë në dorë drejtësisë. Nga

publiku kërkoj njerëzillëk dhe ndalimin e shpërndarjes. Përpara çdo gjykimi, mendoni për njeriun dhe familjen që lëndoni.

Falënderoj nga zemra familjen, miqtë, kolegët dhe të gjithë ata që me kanë mbështetur, publikisht apo privatisht. Dashuria dhe mirëkuptimi juaj me japin force.

Do të marr kohën që më duhet dhe do të vazhdoj përpara, me dinjitet dhe me kokën lart.

Lajme

Miliarderi rus financoi dasmën e Trump Jr./ Kush është Umar Kremlev dhe lidhjet e tij me Putinin

Umar Kremlev, 43 vjeç, një figurë e fuqishme e botës së boksit në Rusi dhe president i Shoqatës Ndërkombëtare të Boksit (IBA), është vënë në qendër të vëmendjes pas zbulimit se financoi një pjesë të festimeve të dasmës së Donald Trump Jr. në Bahamas.

Sipas një hetimi të ProPublica, Kremlev pagoi qindra mijëra dollarë për shpenzimet e dasmës, përfshirë marrjen me qira të një ishulli privat për disa net dhe një spektakël fishekzjarrësh. Çifti Trump Jr. dhe Bettina Trump e kanë konfirmuar se Kremlev organizoi dhe financoi dy net festimesh pas ceremonisë së martesës, duke e cilësuar pagesën si një dhuratë martese nga një mik.

Kremlev, i cili më parë njihej si Umar Lutfuloev, u rrit në Serpukhov, në jug të Moskës. Ai iu drejtua boksit që në moshë të re, por e ndërpreu karrierën sportive në moshën 19-vjeçare. Sipas burimeve të cituara në materialin investigativ, më pas ai u përfshi në organizimin e ndeshjeve të boksit.

Karriera e tij mori një kthesë të rëndësishme pas afrimit me rrethin e pushtetit në Rusi. Ai u bë pjesë e komunitetit të motoçiklistëve “Ujqërit e Natës”, të drejtuar nga Alexander Zaldostanov, i njohur si “Kirurgu”, i cili ka marrëdhënie të afërta me Vladimir Putinin.

Në vitin 2017, Kremlev mori drejtimin e Federatës Ruse të Boksit, ndërsa në vitin 2020 u zgjodh president i atëhershëm i Shoqatës Ndërkombëtare të Boksit Amator, AIBA, e cila më vonë u riemërtua IBA.

Nën drejtimin e tij, IBA forcoi marrëdhëniet me Gazprom-in, gjigantin shtetëror rus të energjisë. Organizata më pas u përplas me Komitetin Olimpik Ndërkombëtar, i cili në vitin 2023 i hoqi IBA-s statusin e federatës ndërkombëtare të njohur për boksin olimpik.

Kremlev ka qenë gjithashtu një figurë e zëshme në debatet rreth boksit të femrave. Gjatë Lojërave Olimpike të Parisit 2024, ai kritikoi vendimin e IOC për të lejuar Imane Khelif të garonte në kategorinë e femrave dhe i dërgoi një letër presidentit amerikan Donald Trump për këtë çështje.

Marrëdhënia mes Kremlev dhe Donald Trump Jr. u bë publike edhe përmes aktiviteteve të IBA-s. Të dy u shfaqën së bashku në një aktivitet në Stamboll, ku Kremlev e prezantoi Trump Jr. si mikun e tij. Sipas deklaratës së zëdhënësit të Trump Jr., ata u njohën përmes një miku të përbashkët dhe u afruan për shkak të interesit të përbashkët për gjuetinë, boksin dhe aktivitetet në natyrë.

Zbulimi se Kremlev kishte financuar një pjesë të konsiderueshme të festimeve të dasmës shkaktoi edhe një hetim në Kongresin amerikan. Robert Garcia, demokrati kryesor në Komitetin e Mbikëqyrjes së Dhomës së Përfaqësuesve, kërkoi të dhëna mbi marrëdhënien financiare dhe komunikimet mes Trump Jr. dhe Kremlev.

Donald Trump Jr. dhe bashkëshortja e tij e kanë mbrojtur marrëdhënien me Kremlev, duke thënë se pagesat ishin një dhuratë bujare nga një mik dhe se miqësia nuk kishte motiv politik. Zyra e Kremlev ka deklaruar gjithashtu se marrëdhënia mes dy burrave është miqësore dhe se ata janë takuar për herë të parë disa vite më parë.

Ndërkohë, vetë Donald Trump ka deklaruar se nuk e njeh Kremlevin dhe se nuk kishte dëgjuar më parë për të. Hetimi i ProPublica ka ngritur pyetje mbi natyrën e marrëdhënies mes Kremlev dhe Trump Jr., ndërsa vetë palët e përfshira e përshkruajnë atë si një marrëdhënie personale dhe miqësore.