Analisti Faruk Nevzati ka publikuar një analizë historike dhe demografike për pozitën e shqiptarëve në Rajonin e Shkupit, duke vënë në pah kontrastin ndërmjet përfaqësimit të tyre në komunat periferike dhe atyre qendrore.

Sipas të dhënave të Entit Shtetëror të Statistikave, shqiptarët përbëjnë shumicën në 13 nga gjithsej 17 komunat e Rajonit të Shkupit.

Në këto 13 komuna jetojnë 167.926 shqiptarë, përkatësisht 43,29 për qind e popullsisë, kundrejt 141.874 maqedonasve. Kjo do të thotë se shqiptarët janë grupi më i madh etnik, me 26.052 banorë më shumë.

Megjithatë, Nevzati thekson se në katër komunat qendrore, Qendër, Karposh, Aerodrom dhe Kisella Vodë, shqiptarët kanë mbetur me përfaqësim shumë më të kufizuar.

Ai këtë realitet e cilëson si paradoks historik dhe e lidh me politikat e dikurshme të banimit, urbanizimit, investimeve publike dhe diskriminimin institucional ndaj shqiptarëve.

“Shkupi është më shumë se qendra e tij. Edhe historia e tij është më e gjerë se ajo që shohim sot në qendër!”, thekson Nevzati.

Një përleshje fizike në një kazino në Tetovë ka përfunduar me dy persona të lënduar rëndë nga një mjet i mprehtë, ndërsa disa persona janë ndaluar nga policia.

Sipas njoftimit të SPB Tetovë, ngjarja është raportuar më 13 nëntor, në orën 01:45, pasi në Spitalin Klinik të Tetovës janë dërguar me lëndime të rënda J.R. (48) nga Bërvenica dhe S.T. (50) nga Saraqina.
Sipas raportimit, ata janë lënduar gjatë përpjekjes për të ndarë disa persona që ishin përfshirë në një përleshje fizike në kazino. Në konflikt dyshohet se ishin përfshirë V.A. (44) nga Xhepçishti, A.I. (33), S.I. (26) dhe Sh.S. (26) nga Treboshi.

Për shkak të seriozitetit të lëndimeve, J.R. është transferuar në Kompleksin e Klinikave „Nënë Tereza” në Shkup, ndërsa S.T. ka mbetur për trajtim në Spitalin Klinik të Tetovës.
Policia ka arrestuar edhe F.H. (34) nga Treboshi, i punësuar në kazino, nën dyshimin për kryerjen e veprës penale „ndihmë” në lidhje me dhunën. Statusin e personit të privuar nga liria e ka edhe V.A., i cili për shkak të përkeqësimit të gjendjes shëndetësore është ndaluar nën mbikëqyrje policore në spital.

Ndërkohë, në orën 08:50, në Stacionin Policor të Tetovës janë paraqitur vetë edhe A.I., S.I. dhe Sh.S., të cilët janë ndaluar për procedurë të mëtejshme.

Policia bën të ditur se pas zbardhjes dhe dokumentimit të plotë të rastit do të pasojnë kallëzimet përkatëse.

BDI ka reaguar ndaj akuzave të partisë VLEN lidhur me shitjen e aksioneve shtetërore në “Stopanska Banka” të Manastirit, duke i cilësuar ato si përpjekje për të zhvendosur përgjegjësinë nga Qeveria aktuale. BDI pretendon se vendimet që mundësuan hyrjen e Alta Bankës nga Beogradi në tregun maqedonas janë marrë gjatë qeverisjes së VMRO-DPMNE-së dhe VLEN-it.

Në reagimin e BDI-së thuhet se ata kishin paralajmëruar për rreziqet që, sipas tyre, lidhen me Alta Bankën dhe akuzon funksionarët e VLEN-it se kanë nënshkruar vendimet përkatëse.

“Ne i paralajmëruam para se Alta Banka të hynte në Maqedoninë e Veriut. Ua thamë publikisht se kjo bankë ka lidhje të dyshimta me të ashtuquajturën ‘Bota Serbe’. Ata nuk deshën të dëgjojnë. Qeveria e VMRO-DPMNE-së dhe funksionarët e saj nga VLEN-i vrapuan t’ia hapnin dyert bankës së Vuçiqit.

Tani që po dalin në shesh dyshimet për prapavijën e kësaj pune, bëhen sikur kanë rënë nga hëna. Nuk dinë gjë, nuk kanë parë gjë, nuk kanë dëgjuar gjë. Vetëm se kanë harruar një gjë: nënshkrimet e tyre janë në dokumente!

Funksionarët e VMRO-së nga VLEN-i mund të bërtasin sa të duan, por nuk mund të jesh në qeveri kur ndahet kulaçi dhe të bëhesh opozitë kur vjen puna për të dhënë llogari.

Ju paralajmëruam. Ju e dinit. Ju i morët vendimet. Ju i vutë firmat. Tani mos kërkoni fajtorin në derë të huaj!

Alta Bankën nuk e solli era. Ia hapët derën ju! Alta Banka është kopili juaj dhe kopilin tuaj nuk mund ta lini në derë të huaj!”, thuhet në reagimin e BDI-së.