Lajme

Bilall Kasami pret mbështetjen e deputetëve për Ligjin për Përfaqësim të Drejtë

Bilall Kasami nga VLEN beson se pavarësisht bindjeve politike, deputetët do të mbështesin Ligjin për Përfaqësim të Drejtë, ndërsa me këtë do t’i jepet fund keqpërdorimit me deklarimin e përkatësisë etnike gjatë punësimit.

“Përkundër dallimeve politike, besojmë fuqishëm se çdo deputet në Kuvendin e Maqedonisë së Veriut do të përkrahë një zhvillim të rëndësishëm në drejtim të përfaqësimit adekuat që është një kategori kushtetuese. Sigurisht që me këtë ligj përfundimisht do të përmbyllen të gjitha manipulimet dhe e deritanishme sa i përket keqpërdorimeve që janë bërë me mekanizmin e balancuesit”, deklaroi Bilall Kasami, VLEN.

Megjithatë BDI-ja opozitare e kundërshton me tone të ashpra propozim-ligjin, duke akuzuar VLEN-in se po e shet barazinë dhe po e varros të ardhmen.

“Kjo që po ndodh është më shumë se zhgënjim, është tradhti e hapur ndaj çdo arritjeje për të cilën është sakrifikuar me dekada. Sa herë mendojmë se kanë arritur fundin, ata gjejnë mënyrë të re për të rënë edhe më poshtë. Propozim-ligji për “përfaqësim të drejtë dhe adekuat”, i hartuar nga Karakamisheva dhe i përkrahur me bujë nga VLEN, nuk është arritje – është regres brutal”, thanë nga BDI.

Ligji për Përfaqësim, tradhti e hapur ndaj çdo arritje dhe sakrifice
Ligji për Përfaqësim nuk është arritje, por regres brutal
Propozim-ligji për Përfaqësim të Drejtë paraprakisht kaloi në Qeveri, ndërsa në periudhën e ardhshme pritet të dorëzohet në Kuvend për miratim. Ligji llogaritet pasardhës i Balancuesit, apo mekanizmit që rregullonte përfaqësimin e drejtë dhe adekuat nëpër institucionet shtetërore, e i cili u shfuqizua nga Gjykata Kushtetuese në tetor të vitit 2024. Me ligjin e ri, kriter bazë për punësimet parashihet të jetë përgatitja profesionale e kandidatit e jo përkatësia etnike. Siç deklaroi zëvendëskryeministri i parë Bekim Sali në intervistën për Alsat, me këtë ligj nuk do të ketë mundësi të rezervohen vende pune për bashkësitë etnike, ndërsa gjithashtu nuk do të mund të shqiptohen gjoba për shkelësit./Alsat.mk.

Lajme

Në fund të muajit nis ndërtimi i autostradës Shkup-Bllacë

Kryeministri Hristijan Mickoski paralajmëroi aktivitet të intensifikuar ndërtimor, duke paralajmëruar ndërtimin e gjashtë segmenteve të autostradave në të gjithë vendin në periudhën e ardhshme

Drejt fundit të këtij muaji, ndoshta më 26 gusht, tregoi Mickoski, do të fillojë ndërtimi i segmentit të autostradës Bllacë – Shkup, për të cilin, tha ai, kanë përfunduar të gjitha procedurat formale.

“Më në fund, për këtë projekt dhjetëvjeçar që u paralajmërua, kemi një kontraktor, është një kompani vendase, kemi mbikëqyrje, janë plotësuar të gjitha kushtet për të filluar ndërtimin e kësaj autostrade. Në shtator pres që të fillojë edhe një segment autostrade, pra Bukojçan – Kërçovë, dhe me dinamikë të shtuar të përfundojë autostrada Kërçovë – Ohër. Pres që segmenti nga Izvor deri në Vrbjan të fillojë në gjysmën e dytë të tetorit, ndërsa i gjithë segmenti të jetë në tremujorin e parë të vitit 2027”, tha Mickoski pasi inspektoi aktivitetet ndërtimore të fazës së parë të ndërtimit të sistemit të kanalizimit në Idrizovë në komunën e Gazi Babës.

Lajme

Hidhet bombë drejt një shtëpie në ‘fshatin e milionerave’ në Shkup

Një mjet shpërthyes është hedhur drejt një shtëpie në fshatin Bardovcë të Shkupit dhe ka shkaktuar dëme material.

Siç njoftoi policia, më 16.08.2026 rreth orës 02:35, K.B. (70) nga Shkupi ka raportuar se në fshatin Bardovcë të Shkupit, drejt shtëpisë së tij është hedhur një send që ka shkaktuar shpërthim dhe ka dëmtuar shkallët e hyrjes së shtëpisë.

Është thyer një dritare, si dhe është dëmtuar një automjet udhëtarësh, dera dhe sende të tjera, transmeton Lideri.mk. Fshati Bardovcë është i njohur për shtëpitë dhe rezidencat luksoze, si dhe banorët e saj të pasur./Lideri

Lajme

Nxënësit shqiptarë të Idrizovës pa mësim në shqip nga klasa e gjashtë

Në shkollën fillore “Njegosh” në Idrizovë të Komunës Gazi Babë, nxënësit shqiptarë edhe këtë vit mund të mësojnë në gjuhën shqipe deri në klasën e pestë. Nga klasa e gjashtë deri në të nëntën, ata duhet të vazhdojnë arsimin në shkolla të komunave të tjera. Pavarësisht që problemi është i kahmotshëm, edhe këtë vit nuk parashihet një zgjidhje konkrete. Ministrja e Arsimit, Vesna Janevska tha për Alsat se është mirë që fëmijët të mësojnë në gjuhën e tyre amtare. Mirëpo, për këtë rast ministrja Janevska nuk tha që dikasteri që ajo drejton nuk ka marrë ndonjë vendim për hapjen e paraleleve në shqip në Idrizovë.

“Në këtë moment nuk mund t’ju them saktësisht nëse dhe sa kërkesa eventualisht kemi, por dua të them se në këtë moment, ndoshta, nuk mund të pohoj me siguri, bëhet fjalë për punësime të reja. Dhe duke qenë se kemi të paktën 2.500 mësues që nuk kanë fond të plotë të orëve mësimore, ndërsa ne u paguajmë pagat, çdo punësim i ri përbën problem”,tha Vesna Janevska, ministre e Arsimit.

Ministrja Janevska çështjen e mësimit shqip në Idrizovë e lidh edhe me mungesën e nxënësve dhe me numrin e madh të mësuesve që aktualisht nuk kanë fond të plotë të orëve. Sipas saj, nëse në Idrizovë vërtetohet se nevojiten paralele në gjuhën shqipe, atëherë do të shqyrtohet edhe mundësia e angazhimit të mësuesve që tashmë janë në sistem. Janevska thotë se aktualisht nuk mund të konfirmojë nëse kërkesa për mësim në shqip do të nënkuptonte punësime të reja. Ajo thekson se Ministria nuk lejon punësime të reja përveç rasteve kur ato janë të domosdoshme.

“Optimizimin më intensiv e fillojmë këtë vit. Vitin e kaluar ishte shumë minimal, këtë vit gjithashtu minimal, duke pasur parasysh stafin dhe duke u kujdesur që racionalizimin ta bëjmë vetëm përmes pensionimeve. Mendoj se kemi filluar t’i afrohemi një gjendjeje normale, ose një numri normal të mësuesve që duhet të jenë të punësuar.Është e saktë se nuk lejojmë punësime, përveç rasteve kur ato janë të domosdoshme. Nëse konstatohet se edhe këtu është e domosdoshme, Ministria do të veprojë në përputhje me ligjin”, tha Vesna Janevska, ministre e Arsimit.

Ndërkohë, nga Komuna e Gazi Babës nuk japin një përgjigje konkrete nëse nga shtatori nxënësit shqiptarë të klasave të gjashta deri në të nëntat do të mund të mësojnë në shqip në Idrizovë. Nga komuna thonë se aktualisht po punohet për gjetjen e një lokacioni të përshtatshëm për ndërtimin e një shkolle të re fillore në Idrizovë.

“Bëhet fjalë për një projekt të rëndësishëm për banorët e Idrizovës nga të gjitha komunitetet etnike, veçanërisht për fëmijët dhe familjet e tyre. Prandaj, qëllimi ynë është që të gjitha procedurat e nevojshme të zhvillohen në mënyrë të plotë dhe në përputhje me procedurat ligjore”, theksojnë nga Komuna Gazi Babë.

Nga Komuna e Gazi Babës thanë se mbeten të përkushtuar për realizimin e këtij projekti dhe, pas përfundimit të procedurave përgatitore dhe administrative, do të mund të kalohet në fazat e ardhshme për ndërtimin e shkollës së re. /Alsat.mk