Kryetari i Qeverisë së Republikës së Maqedonisë së Veriut, Hristijan Mickoski, sot, duke iu përgjigjur pyetjes gazetareske lidhur me këstin e ri të paguar si mbështetje për kompanitë vendore, efektet në ekonomi në aspektin e vendeve të reja të punës dhe hapjen e pjesëve të reja në këto kompani, deklaroi:

“Gjatë vitit të fundit janë krijuar më shumë se 15.000 vende të reja pune. Dhe po arrijmë në një gjendje ku aktualisht kemi rreth 710.000 të punësuar dhe nën 90.000 të papunë të regjistruar. Nëse në këta nën 90.000 të papunë kemi, të themi, rreth 30.000 bujq, ndërsa të papunët evidentohen si popullsi e aftë për punë nga 15 deri në 65 vjeç, ku përfshihen edhe dy gjenerata, 15 dhe 16 vjeç, nxënës të shkollave të mesme, ndërkohë që arsimi i mesëm është i detyrueshëm, atëherë arrijmë në një shifër prej afërsisht jo më shumë se 35.000 deri në 40.000 të papunë, që përfaqëson diku nën 5% të popullsisë së aftë për punë. Dhe ky është niveli historikisht më i ulët ndonjëherë, që nga ekzistenca e Maqedonisë së pavarur.

Cili është rezultati i një mbështetjeje të tillë nga Qeveria? Pra, aktivitet më i madh investues. Ne për gjashtë tremujorë radhazi kemi rritje reale prej 3,5%. Nëse shikohet prodhimi i brendshëm bruto nominal për vitin 2026, jo sipas Qeverisë, jo sipas Hristijanit, por sipas Fondit Monetar Ndërkombëtar, ai do të jetë rreth 22 miliardë dollarë. Dhe kur kjo periudhë e kësaj Qeverie krahasohet me periudhën e Qeverisë së mëparshme, rritja e prodhimit të brendshëm bruto nominal është tri herë më e madhe, në kushte kur prodhimi i brendshëm bruto në kuadër të Eurozonës rritet nën 1%. Ky është dallimi dhe këto janë të dhëna empirike, janë gjëra që krahasohen. Ne tani nuk mund të krahasojmë gjëra që nuk janë të krahasueshme. Ose të flasim mbi bazën e asaj që ne e imagjinojmë, këto janë shifra.

Dhe ky është rezultat i këtij aktiviteti investues nga ana e Qeverisë, jo vetëm mbështetja për ekonominë përmes kredive të subvencionuara, ku norma e interesit është nën 2%, përkatësisht 1,95%, por edhe përmes këtyre projekteve, njëri prej të cilëve është edhe ky që po e shohim këtu. Të tillë kemi më shumë se 1.200 aktualisht, pra 1.200 kantiere janë realizuar vetëm gjatë dy viteve të fundit, projekte që janë drejtpërdrejt për komunitetin përmes vetëqeverisjes lokale. Dhe këtu Qeveria nuk ka përzgjedhur nëse bëhet fjalë për kryetarë komunash nga VMRO-DPMNE apo nga koalicioni qeveritar, në të gjitha komunat investohet sipas kritereve të barabarta. Dhe vlerësoj se ky projekt, i cili deri tani ka akumuluar përafërsisht mbi gjysmë miliard euro, ka ndikuar mjaft në tërë këtë proces.”

Fondi i Sigurimeve Shëndetësore publikoi raportin e tij vjetor për vitin 2025, sipas të cilit buxheti i institucionit u rrit me 6.13 përqind, ndërsa bodet e kapitilacioneve për mjekët e amë u rrit me 33 përqind.

Fondi në vitin 2025 mbulon gjithsej 1.841,530 persona të siguruar, një rritje prej 1.993 personash të rinj. Struktura përfshin 558.469 punonjës aktivë, 358.716 pensionistë dhe 630.914 anëtarë të familjes. Trendi i plakjes së popullsisë së siguruar është i dukshëm — pensionistët po rriten më shpejt (+1.5 përqind) sesa punonjësit aktivë (+0.2 përqind).

Buxheti i Fondit të Sigurimeve Shëndetësore për vitin 2025 arriti në 51.5 miliardë denarë (afërsisht 836 milionë euro), me një rritje vjetore prej 6.13 përqind krahasuar me vitin e kaluar.

Të ardhurat arrijnë në 52.08 miliardë denarë, ndërsa shpenzimet janë 51.49 miliardë denarë. Shërbimet shëndetësore thithin 86.4 përqind të shpenzimeve totale — 44.5 miliardë denarë (afërsisht 723 milionë euro).

Në periudhën pesëvjeçare 2021–2025, buxheti i FSSH-së u rrit nga 35.5 në 51.5 miliardë denarë, me një rritje mesatare vjetore prej gati 8 përqind.

Pasi një ditë më herët ish-kryeministri i Maqedonisë së Veriut, Nikola Gruevski i cili ndodhet në arrati në Hungari, reagoi përmes rrjetit social Facebook ndaj ministrit të Drejtësisë Igor Filkov, duke shprehur pakënaqësi për mënyrën se si po trajtohet rasti i tij dhe për përpjekjet për nisjen e procedurave të ekstradimit, sot kanë reaguar edhe krerët politikë në vend.

Kryeministri Hristijan Mickoski, deklaroi se qëndrimi i Qeverisë për sundimin e ligjit mbetet i pandryshuar, duke theksuar se nuk do të ketë standarde të dyfishta. Sipas tij, çdo person që përballet me organet e drejtësisë gëzon të drejtat e garantuara me Kushtetutë dhe ligj, ndërsa institucionet do të veprojnë në përputhje me procedurat ligjore.

“Qëndrimi im është i njëjtë si para disa javësh dhe mbetet i pandryshuar. Nuk kemi standarde të dyfishta. Çdo qytetar që përballet me organet e drejtësisë ka të drejtat e garantuara me Kushtetutë dhe ligj. Institucionet do të veprojnë në përputhje me procedurat ligjore dhe në funksion të sundimit të ligjit.”, theksoi Mickoski.

Ndërkaq, lideri i opozitës maqedonase, Venko Filipçe, nuk pret që qeveria aktuale do të kërkojë ekstradimin e Gruevskit, pasi sipas tij, kjo qeveri nuk është serioze.

“Unë pres sikurse çdo shtet serioz, por fatkeqësisht kësi lloj qeverie nuk mundet të bëhet serioze dhe të udhëheqë shtet serioz dhe këtë e shohin ç’do ditë, qytetarët e ndjejnë. Të veprohet ashtu siç duhet, të kërkojë ekstradim, sidomos, pas deklaratës së kryeminsitrit hungarezë, që kriminelë të arratisur nuk do t’i mbajë, që është shembull se si kthehet demokracia në shtet, shembull, Europa e pranon atë, e atë duhet ta bëjë qeveria”, nënvizoi Filipçe.

Në lidhje me rastin e Nikolla Gruevski, kanë reaguar edhe nga Ministria e Drejtësisë, nga ku njoftojnë se po ndërmerren të gjitha hapat në përputhje me ligjin dhe marrëveshjet ndërkombëtare. Sipas tyre, procedurat zhvillohen në mënyrë institucionale dhe në bashkëpunim me autoritetet e Hungarisë, pa ndikim nga deklarata politike.