Lajme

Teleferiku në Vodno këtë verë nuk do të funksionojë

Teleferiku i Shkupit, i cili u mbyll fillimisht më 25 prill për një kontroll rutinë dyditor, nuk do të hapet as gjatë muajve të verës. Shkak për këtë janë dëmtimet e rënda teknike të konstatuara nga kompania prodhuese austriake. Kryetari i Shkupit, Orce Gjorgjievski, bëri të ditur se kontrollet teknike kanë zbuluar defekte serioze që rrezikojnë sigurinë e udhëtarëve. Sipas raportit teknik, janë vërejtur pjesë gome të konsumuara si dhe sensorë jashtë funksionit. Këto defekte krijojnë një rrezik potencial për shkëputjen e kabinave nga kablloja mbajtëse. Gjorgjevski tha se është vendosur që asnjë kabinë të mos lëvizë pa u kryer një servis i plotë gjeneral, proces ky që nuk është bërë që nga lëshimi i tij në përdorim 15 vite më parë.

“Pas inspektimit, është konstatuar se teleferiku është në gjendje katastrofale dhe ka shumë mangësi që duhen riparuar në periudhën e ardhshme. Tashmë kemi kërkuar ofertë për të parë se sa do t’i kushtojë qytetit dhe ndërmarrjes publike servisimi i plotë dhe kthimi i teleferikut në një gjendje ku unë, mbi të gjitha, do të jem i sigurt se çdo fëmijë dhe çdo qytetar i Shkupit do të jetë i mbrojtur gjatë përdorimit të tij.Ne nuk na duhet një ‘Koçan i ri’ ose, mos e dhentë Zoti, ndonjë tragjedi pas së cilës do të duhet të vetëdijësohemi e të veprojmë. Na duhen aksione menjëherë, ku në plan të parë do të jenë gjithmonë qytetarët.” – Orce Gjorgjievski, kryetar i Qytetit të Shkupit.

Deri në sigurimin e mjeteve dhe përfundimin e servisit gjeneral nga kompania austriake, mjeti i vetëm për të arritur në majën e Vodnos mbetet vija rrugore ose shtigjet e ecjes.

Lajme

Nikolloski: Shteti ka rezerva të kerozinës për tre muaj

Ministri i Transportit, Aleksandar Nikolloski, informoi se vendi nuk ka probleme me furnizimin me kerozin dhe se aktualisht ka rezerva për 90 ditë. Nikolloski njoftoi gjithashtu hapjen e pesë destinacioneve të reja nga dy aeroportet, të cilat do të fillojnë të funksionojnë nga muaji i ardhshëm, transmeton Portalb.mk.

“Përveç faktit që furnizohen aeroporti i Shkupit dhe i Ohrit, me kerozinin tonë furnizohet plotësisht edhe aeroporti i Prishtinës dhe pjesërisht aeroporti i Nishit. Kemi rezerva për 90 ditë, edhe pse ligji parashikon 60 ditë. Në kushte kur po paralajmërohen anulime fluturimesh, ne gjatë muajit qershor planifikojmë pesë destinacione të reja nga aeroporti i Shkupit dhe i Ohrit. ‘Austrian Airlines’ do të fillojë për herë të parë të fluturojë nga Vjena drejt Ohrit. ‘Wizz Air’ do të fluturojë nga Ohri në Krakov dhe në Wrocław, dhe kemi dy destinacione të shkëlqyera turistike nga aeroporti i Shkupit: njëra është Palermo – Sicili, tjetra Alghero – Sardenjë”, tha Nikolloski.

Kujtojmë se, çmimi i karburantit për avionë (kerozina) është rritur me 122 përqind që nga fillimi i luftës me Iranin, sipas kompanisë konsulente Energex me seli në Londër. Së pari, probleme me furnizimin u raportuan në aeroportet aziatike, mdërkohë që ka vonesa të mëdha edhe në furnizimin me karburant në aeroportet në Itali.

Lajme

Kjo është përbërja e re që do të udhëheqë VLEN-in

Koalicioni VLEN ka zyrtarizuar strukturat e tij drejtuese gjatë punimeve të Kongresit të parë të mbajtur në Shkup, duke shënuar kalimin nga një aleancë partish në një subjekt të unifikuar politik.

Sipas vendimeve të miratuara nga delegatët, Izet Mexhiti dhe Bilall Kasami janë zgjedhur bashkëkryetarë të lëvizjes, ndërsa pozicioni i sekretarit të përgjithshëm i është besuar Bekim Salit, përcjell INA.

Për të kompletuar hierarkinë drejtuese, Kongresi emëroi Mimoza Musën dhe Bekim Qokun në postet e nënkryetarëve, duke përcaktuar kështu ekipin që do të udhëheqë organizimin dhe strategjinë e mëtejshme të subjektit në skenën politike të Maqedonisë së Veriut.

Ky proces i rëndësishëm i strukturimit të brendshëm pason diskutimet mbi platformën politike dhe synon të forcojë përfaqësimin e kësaj force brenda koalicionit qeverisës dhe përballë elektoratit.(INA)

Lajme

Shkodran Alili i bashkohet koalicionit VLEN

Avokati dhe humanisti Shkodran Alili, i njohur si kandidat i pavarur për Komunën e Kërçovës, tashmë i është bashkuar koalicionit VLEN.

Ky zhvillim paraqet një lëvizje të rëndësishme në skenën politike lokale, pasi Alili kishte ndërtuar profilin e tij politik jashtë partive tradicionale. Përfshirja e tij në VLEN pritet të ndikojë në forcimin e koalicionit në Kërçovë.(INA)