Lajme

“Temu” gjobitet me 200 milionë euro nga BE-ja

Rregullatorët e Bashkimit Evropian e kanë gjobitur të enjten kompaninë “Temu” me një gjobë prej 200 milionë eurosh, pasi hetimi i bllokut zbuloi se shitësi me pakicë online kinez nuk bëri mjaftueshëm për të mbrojtur konsumatorët nga produktet e paligjshme.

Gjoba e BE-së me 27 vende vjen pas gjetjeve paraprake të vitit të kaluar se “Temu” po i ekspozonte konsumatorët ndaj një rreziku të lartë të produkteve të shitura në platformën e saj, si lodra për foshnje dhe pajisje të vogla elektronike që nuk përputheshin me rregullat e sigurisë së konsumatorit të bllokut.
Krahu ekzekutiv i bllokut ka lëshuar dënimin sipas Aktit të Shërbimeve Dixhitale, ose DSA, një rregullore e gjerë që kërkon që platformat online të bëjnë më shumë për të mbajtur përdoruesit e internetit të sigurt nga përmbajtja e dëmshme ose mallrat e dyshimta, nën kërcënimin e gjobave të rënda.

Kompania “Temu” është e njohur sepse ofron mallra të lira, nga veshjet te produktet shtëpiake, të dërguara nga shitësit në Kinë.
Platforma ka 92 milionë përdorues në BE dhe është në pronësi të PDD Holdings Inc., e cila zotëron gjithashtu faqen e njohur kineze të tregtisë elektronike “Pinduoduo”.

Komisioni Evropian ka thënë se “Temu” kishte dështuar të identifikonte, analizonte dhe vlerësonte rreziqet sistemike të mallrave të paligjshme për shitje në platformë dhe dëmin që rezultoi për konsumatorët evropianë.

Komisioni ka thënë po ashtu se moskryerja e vlerësimeve të duhura të rrezikut është një shkelje veçanërisht serioze e rregullave dixhitale të bllokut.

Lajme

Teleferiku i “Vodnos” pritet të rikthehet në funksion rreth Vitit të Ri

Pas rreth shtatë muajsh jashtë përdorimit, teleferiku i Vodnos në Shkup mund të rikthehet në funksion rreth Vitit të Ri, nëse punimet për rikonstruksionin përfundojnë sipas planit.

Nga Ndërmarrja Publike e Transportit (JSP) Shkup bëjnë të ditur se gjatë tetorit pritet të mbërrijnë ekipet e kompanisë austriake „Doppelmayr“, e cila do të kryejë riparimet dhe kontrollet teknike.

Teleferiku u ndal në maj, pasi gjatë kontrolleve u konstatuan disa mangësi teknike. Për riparimin e tyre është lidhur kontratë me kompaninë që e ka prodhuar dhe instaluar sistemin.

Oferta e „Doppelmayr“ arrin në 43,35 milionë denarë me TVSH, ndërsa kontrata ka vlerë maksimale prej 53,1 milionë denarësh me TVSH. Ajo përfshin furnizimin me pjesë rezervë, montimin, servisimin dhe testimin e pajisjeve.

Nga JSP theksojnë se teleferiku do të rikthehet në përdorim vetëm pasi të përmbushen të gjitha kushtet teknike dhe të sigurisë.

Lajme

Arenë “lufte” edhe sot në protestë, i vihet flaka institucionit financiar dhe Ministrisë së Arsimit

Sot mbahet dita e dytë e protestës studentore në Tiranë.
Studentët e shumë Universitetit të Mjekësisë, UBT-së, Politeknikut, fakultetit të Drejtësisë etj. janë grumbulluar para Ministrisë së Arsimit, ndërsa ka nisur hedhja e sendeve piroteknike drejt godinës, teksa para saj u pozicionua dhe policia.

Tensione ka pasur edhe në Fakultetin e Shkencave të Natyrës, ndërsa disa protestues kanë thyer derën kryesore dhe janë futur në ambientet e brendshme të fakultetit.
Gjimnazistët e shkollës “Partizani” i janë bashkuar studentëve dhe të rinjve në revoltë.
Gjithashtu, edhe në universitetet e Elbasanit dhe Shkodrës kanë nisur bojkotimi i mësimit, në shenjë solidariteti me studentët në Tiranë, ndërsa në Durrës, Vlorë dhe Gjirokastër çdo gjë vijon normalisht. /Topchannel

Lajme

Gani Geci do të qëndrojë 30 ditë në paraburgim

Gjykata Themelore në Prishtinë ka aprovuar kërkesën e Prokurorisë Themelore në Prishtinë, duke ia caktuar masën e paraburgimit në kohëzgjatje prej 30 ditësh ish-deputetit Gani Geci, i dyshuar për kanosjen e gazetarit Lirim Mehmetaj.

Geci po përballet me akuzën për kanosje ndaj gazetarit Lirim Mehmetaj.

Sipas Prokurorisë, ekziston dyshimi i bazuar mirë se më 11 tetor 2026, rreth orës 19:27, në zyrat e portalit “VOX Kosova” në Prishtinë, për shkak të një postimi të publikuar nga gazetari Lirim Mehmetaj në rrjetin social Facebook lidhur me deputetin Fatos Geci, me qëllim që ta detyrojë të dëmtuarin ta largojë ose ta ndryshojë përmbajtjen e postimit, pasi ky i fundit kishte refuzuar kërkesën e tij, thuhet se ka kanosur drejtpërdrejt me fjalët: “Nëse nuk e hek postimin ose nuk e ndryshon, kena me u vra“.