Lajme

Detaje shokuese për arratisjen e Gruevskit, nuk iku nga Shkupi, por nga një hotel në Ohër

Detaje të reja janë publikuar lidhur me arratisjen e ish-kryeministrit Nikola Gruevski drejt Hungarisë në nëntor të vitit 2018.

Në një emision në Kanal5, Aleksandar Malenko ka deklaruar se Gruevski nuk u largua nga shtëpia e tij në Shkup, siç është besuar deri më tani, por nga hoteli “Royal View” në Ohër, i vendosur në bregun e Liqenit të Ohrit, përcjell INA.

Sipas Malenkos, arratisja ka ndodhur më 10 nëntor 2018, rreth orës 02:40 pas mesnate. Ai pretendon se personalisht ka hapur garazhin e hotelit për largimin e Gruevskit, i cili është nisur me një veturë “Passat”, të drejtuar nga shoferi i tij, ndërsa në automjet ndodheshin edhe pjesëtarë të sigurimit personal.

Familja e Gruevskit – bashkëshortja dhe vajzat – sipas tij, kanë mbetur në hotel dhe kanë vazhduar qëndrimin e planifikuar.

Malenko pohon se Gruevski kishte mbërritur në Ohër tre ditë më herët, më 7 nëntor 2018 në mbrëmje, me dy automjete: një automjet të MPB-së nga Drejtoria e Gjashtë për sigurim dhe përcjellje, si dhe veturën e tij private me shofer dhe sigurim.

Ai thotë se familja Gruevski ishte pritur në garazhin e hotelit dhe se qëndrimi ishte paralajmëruar sipas protokolleve të MPB-së si vizitë e mysafirëve VIP, pa u bërë i ditur identiteti i tyre, në përputhje me procedurat standarde të sigurisë.

Më vonë, Gruevski arriti në Budapest të Hungarisë në rrethana që vazhdojnë të mbeten të paqarta, pasi paraprakisht kishte kaluar përmes Shqipërisë, Malit të Zi dhe Serbisë.

Për arratisjen e tij në Maqedoninë e Veriut u hap hetim, por deri më sot askush nuk ka mbajtur përgjegjësi.(INA)

Lajme

Kjo është 10-shja më e votuar e VV’së deri tani

Komisioni Qendror i Zgjedhjeve ka nisur publikimin e rezultateve të para të votave për kandidatët për deputetë, ku deri më tani janë numëruar rreth 4% e votave.

Sipas të dhënave të deritanishme, listën e kandidatëve më të votuar nga Lëvizja Vetëvendosje e kryeson Albin Kurti me 6,466 vota.

Pas tij renditet Glauk Konjufca me 4,874 vota, ndërsa në vendin e tretë është Albulena Haxhiu me 2,605 vota.

Në top dhjetëshe figurojnë edhe Hekuran Murati, Donika Gërvalla-Schwarz, Xhelal Sveçla, Avni Dehari, Rufki Suma, Ejup Maqedonci dhe Ilir Kërçeli.

Numërimi i votave po vazhdon.

Lajme

Mickoski mohon takimet e fshehta me Ali Ahmetin: Menduh Thaçi ka informata të pasakta

Kryeministri Hristijan Mickoski, ka hedhur poshtë pretendimet se po zhvillon takime të fshehta me kryetarin e BDI-së, Ali Ahmeti.

Reagimi i Mickoskit vjen pasi kryetari i PDSH-së, Menduh Thaçi, deklaroi se disponon informacione nga burime brenda VMRO-DPMNE-së, sipas të cilave kryeministri dhe Ahmeti kanë zhvilluar takime jozyrtare.

Duke komentuar këto pretendime, Mickoski tha se informacionet e Thaçit nuk janë të sakta dhe mohoi kategorikisht se ka pasur takime të fshehta me liderin e BDI-së.

“Menduh Thaçi paska burime të gabuara në VMRO-DPMNE. Nuk kam pasur takime të fshehta me Ahmetin”, deklaroi Mickoski.

Deklarata e kryeministrit vjen në një periudhë kur në skenën politike të vendit po qarkullojnë spekulime të shumta për komunikime dhe kontakte mes partive kryesore politike, ndërsa VMRO-DPMNE dhe BDI vazhdojnë të mbeten kundërshtarë politikë në kampet e tyre përkatëse.

Me këtë reagim, Mickoski ka mohuar zyrtarisht zërat për takime të fshehta me Ali Ahmetin, duke i cilësuar si të pasakta informacionet e përmendura nga Menduh Thaçi. përcjell Zhurnal.mk .

Lajme

Rritet çmimi i naftës

Nga mesnata e sotme hyjnë në fuqi çmime të reja të karburanteve. Komisioni Rregullator për Energjetikë vendosi që benzina të ulet për dy denarë, ndërsa dizeli të rritet për 1,5 denarë. Sipas vendimit të KRRE-së, nga mesnata çmimi i ri i Eurosuper BS-95 do të jetë 86 denarë, Eurosuper BS-98 do të shitet për 88 denarë, ndërsa Eurodizeli për 87 denarë. Vaji ekstra i lehtë për amvisëri do të kushtojë 89 denarë për litër.